ພາຍຫລັງຄະດີແກ໊ງຄ້າຂາຍຢາເສບຕິດລາຍໃຫຍ່ທ້າວ
ໜໍ່ຄຳ ໄດ້ສິ້ນສຸດລົງ ໂດຍການປະສານສົມທົບຮ່ວມໄມ້ຮ່ວມມືຢ່າງສະໜິດແໜ້ນລະ
ຫວ່າງກຳລັງປ້ອງກັນຄວາມສະຫງົບ ລາວ-ຈີນ ສາມາດຈັບທ້າວ ໜໍ່ຄຳ ພ້ອມພັກພວກສົ່ງໃຫ້ສານປະຊາ
ຊົນແຂວງຢຸນນານ ສປ ຈີນ ຕັດສິນປະ ຫານຊີວິດເຈົ້າພໍ່ມາເຟຍ ແລະ ພວກສັງຫານໂຫດດັ່ງກ່າວ
ແລະ ໃນວັນທີ 19 ມີນາ 2013 ຜ່ານມານີ້ ກໍໂດຍການຮ່ວມມືຢ່າງສະໜິດແໜ້ນຂອງກຳລັງປ້ອງກັນຄວາມສະຫງົບລາວ-ຈີນ
ສາມາດຈັບຂະບວນ ການຂົນສົ່ງຢາເສບຕິດລາຍໃຫຍ່ຢູ່ຕາມແມ່ນ້ຳຂອງຕອນເໜືອຂອງລາວ
ເຊິ່ງມີຜູ້ຕ້ອງຫາເປັນຊາວຕ່າງຊາດຈຳນວນ 5 ຄົນ ແລະ ສາ ມາດຍຶດຂອງກາງເປັນຢາບ້າຈຳນວນ
20 ເປົາ ລວມມີ ນ້ຳໜັກ 579 ກິໂລກຣາມ ໃນເຮືອຂົນສົ່ງສິນຄ້າລຳໜຶ່ງຂອງຈີນຢູ່ທີ່ຫາດປາແລວ
ເຂດບ້ານດອນມຸມ ຂຶ້ນກັບເມືອງເມິງ ແຂວງບໍ່ແກ້ວ.
ເຈົ້າໜ້າທີ່ສະກັດກັ້ນ ແລະ ຕ້ານຢາເສບຕິດແຂວງບໍ່ແກ້ວ
ໃຫ້ຮູ້ວ່າ: ໃນມື້ນັ້ນຈາກການປະ ສານງານລະຫວ່າງທະຫານປ້ອງກັນຊາຍແດນຂອງລາວທີ່ປະຈຳ
ການຢູ່ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ກັບຕຳຫລວດແຂວງຢຸນນານ ສປ ຈີນ
ໄດ້ອອກລາດຕະເວນຕາມນ້ຳຂອງຂຶ້ນເມືອທາງເໜືອ ເພື່ອຕາມຫາເຮືອຕ້ອງສົງໄສຂົນສົ່ງຢາເສບຕິດໜຶ່ງ
ພໍລາດຕະເວນຮອດເຂດບ້ານນ້ຳ ບັງລະຫວ່າງກິໂລແມັດທີ 24-25 ເບື້ອງຝັ່ງລາວແມ່ນບ້ານດອນມຸມ
ເມືອງເມິງ ແລະ ເບື້ອງຝັ່ງມຽນ ມາແມ່ນຫາດປາແລວ ກໍໄດ້ພົບເຫັນເຮືອຂົນສົ່ງສິນຄ້າທີ່ຕ້ອງສົງໄສດັ່ງກ່າວ.
ເຮືອລາດຕະເວນຂອງກຳລັງຮັກສາຄວາມສະ ຫງົບຈຳນວນ 5 ລຳ ໄດ້ເຂົ້າ ສະກັດເຮືອຕ້ອງສົງໄສລຳນັ້ນ
ແລະ ກວດຄົ້ນພົບເຫັນຢາເສບຕິດປະເພດຢາບ້າຈຳນວນ 20 ເປົາ ລວມມີນ້ຳໜັກ
579 ກິໂລກຣາມ
ເທົ່າກັບ 5 ລ້ານເມັດ ພ້ອມທັງຍຶດໄດ້ເງິນຢວນຈີນ 130.950 ຢວນ, ເງິນບາດໄທ
131.380 ບາດ, ຈັບ ແລະ ກັກຕົວຜູ້ຕ້ອງສົງໄສ 5 ຄົນ ຄືທ້າວ ແກ້ວ ອາຍຸ 36 ປີ ສັນຊາດໄທ
ຢູ່ບ້ານ ແລະ ເມືອງຊຽງແສນ ແຂວງຊຽງລາຍ ຂອງໄທ, ທ້າວ ຊຽງຊຸນຍິງ ອາຍຸ 45 ປີ ສັນຊາດຈີນ
ຢູ່ບ້ານ ແລະ ເມືອງຊຽງຮຸ່ງ, ທ້າວ ຊຶທຸນສຽງ ອາຍຸ 45 ປີ ສັນ ຊາດຈີນ ຢູ່ບ້ານໂຄລູ່
ເມືອງຊຽງຮຸ່ງ,ທ້າວ ວັງເຈຍ ອາຍຸ 29 ປີ ສັນຊາດຈີນ ຢູ່ບ້ານລິມິງ ເມືອງເນົາເອີ
ແລະ ທ້າວ ລົວເຈຍແຊນ ອາຍຸ 35 ປີ ສັນຊາຈີນ ຢູ່ບ້ານ ແລະ ເມືອງຊຽງຮຸ່ງ ເຊິ່ງຜູ້ຕ້ອງຫາທັງ
4 ລ້ວນແຕ່ແມ່ນພົນລະເມືອງແຂວງຢຸນນານ ສປຈີນ.
ຜ່ານການສືບສວນ-ສອບສວນຜູ້ຕ້ອງຫາສັນຊາດໄທໃຫ້ການຕໍ່ເຈົ້າໜ້າທີ່ວ່າ:
ຕົນເອງໄດ້ຮັບ ຈ້າງຈາກທ້າວ ອາຊັງ ສັນຊາດມຽນມາ ໃນຄ່າຈ້າງ 1,5 ລ້ານບາດໄທ ແລະ
ຄ່າເຮືອ 2,5 ລ້ານບາດໄທ ເມື່ອວັນທີ 16 ມີນາຜ່ານມາ ແລະ ໄດ້ຂີ່ເຮືອອອກຈາກເມືອງຕົ້ນເຜິ້ງ
ແຂວງບໍ່ແກ້ວ ມຸ່ງໜ້າໄປເຂດບ້ານສົບໂລຍ ເພື່ອໄປເອົາຢາບ້າມາສົ່ງຢູ່ທ່າເຮືອບ້ານມ້ອມ
ແຂວງບໍ່ແກ້ວ ແລະ ມາຮອດວັນທີ 18 ມີນາ ເມື່ອເວລາປະມານທ່ຽງຄືນ,ທ້າວ ອາຊັງ
ໄດ້ສົ່ງລູກນ້ອງຈຳນວນ 6 ຄົນ ມາສົມທົບກັບຕົນເອງຂົນສົ່ງຢາບ້າຈຳນວນ 20 ເປົາ
ນັ້ນຂຶ້ນໃສ່ເຮືອຂອງທ້າວ ຊຽງຊຸນຍິງ ແລະ ຮອດ 7 ໂມງເຊົ້າຂອງມື້ຕໍ່ມາ ພວກ ຕົນກໍໄດ້ລ່ອງເຮືອຕາມແມ່
ນ້ຳຂອງ ຈຶ່ງຖືກເຈົ້າໜ້າທີ່ກັກພ້ອມຂອງກາງດັ່ງກ່າວ.
ປັດຈຸບັນຄະດີຢາເສບຕິດລາຍໃຫຍ່ນີ້,ເຈົ້າໜ້າທີ່ຕຳຫລວດສະ
ກັດກັ້ນ ແລະ ຕ້ານຢາເສບຕິດກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບພວມດຳເນີນການສືບສວນ-ສອບສວນຂະຫຍາຍຜົນຕໍ່ໄປ
ເພື່ອສົ່ງຟ້ອງໄອຍະການ ແລະ ສານຕັດສິນລົງໂທດຜູ້ກະ ທຳຜິດຕາມລະບຽບກົດໝາຍ.
No comments:
Post a Comment