laophatthananewspaper: ລັດຖະມົນຕີວ່າການກະຊວງສຶກສາທິການ ແລະ ກິລາຊີ້ແຈງຄວາມສົນໃຈຂອງ ສສຊ

ມື້ທີສາມຂອງວາລະການດຳເນີນກອງປະຊຸມສະໄໝສາ ມັນເທື່ອທີ 8 ຂອງສະພາແຫ່ງຊາດຊຸດທີ VII ວັນທີ 11 ທັນວາ 2014, ພາຍໃຕ້ການເປັນປະທານຂອງທ່ານ ນາງ ປານີ ຢາທໍ່ຕູ້ ປະ ທານສະພາແຫ່ງຊາດ ບັນດາລັດຖະມົນຕີວ່າການ, ຊ່ວຍວ່າ ການຈາກກະຊວງຕ່າງໆກໍໄດ້ຂຶ້ນຕອບຖຳຊັກຖາມ ແລະ ຂຶ້ນອະທິບາຍຊີ້ແຈງຕໍ່ຄວາມສົນໃຈ ຫລື ຄຳຖາມເຈາະຈີ້ມຂອງບັນ ດາສະມາຊິກສະພາແຫ່ງຊາດ (ສສຊ) ໃນຂົງເຂດວຽກງານ ຂອງຕົນດ້ວຍຄວາມຮັບຜິດຊອບຢ່າງກົງໄປກົງມາ ແລະ ມີເຫດມີຜົນເຮັດໃຫ້ມີຄວາມເຂົ້າໃຈກັນຫລາຍຂຶ້ນ.

ທ່ານ ດຣ.ພັນຄຳ ວິພາວັນ ຮອງນາຍົກລັດຖະມົນຕີ, ລັດ ຖະມົນຕີວ່າການກະຊວງສຶກສາທິການ ແລະ ກິລາ ກໍໄດ້ຊີ້ແຈງ ຕອບຄຳຊັກຖາມຂອງ ສສຊ ກ່ຽວກັບວຽກງານສຶກສາ ແລະ ກິລາເປັນຕົ້ນກໍແມ່ນການສ້າງບຸກຄະລາກອນທາງດ້ານສາຍອາຊິວະສຶກສາເພື່ອສະໜອງທາງດ້ານຕະຫລາດແຮງງານໃຫ້ແກ່ຂະແໜງການຕ່າງໆໃນສັງຄົມ. ພ້ອມກັນນີ້ຂະແໜງການທີ່ກ່ຽວຂ້ອງຈະໄດ້ເລັ່ງໃສ່ໃນການຄຸ້ມຄອງວຽກງານອາຊິວະສຶກສາ ແລະ ວຽງການອື່ນໆເພື່ອເຮັດໃຫ້ວຽກງານສຶກສາ ແລະ

ກິລາບັນລຸຜົນໂດຍສະເພາະແມ່ນວຽກງານອາຊິວະເພື່ອສະໜອງໃຫ້ແກ່ຕະຫລາດແຮງງານມີຄຸນນະພາບ ແລະ ສະໜອງໃຫ້ແກ່ຂະແໜງການກໍຄືໜ້າທີ່ວຽກງານແຕ່ລະພາກສ່ວນຕ່າງໆທີ່ມີຄວາມຕ້ອງການໂດຍສະເພາະກໍແມ່ນການສ້າງສີມືແຮງງານໃຫ້ມີຄຸນນະພາບເພື່ອຮອງຮັບກັບຄວາມຕ້ອງການຂອງສັງຄົມ ໂດຍຮອງນາຍົກລັດຖະມົນຕີ ໄດ້ຊີ້ແຈງຢ່າງລະອຽດຖີ່ຖ້ວນ ໃນການພັດທະນາສີມືແຮງງານ ໃຫ້ເປັນ ລະບົບຕໍ່ເນື່ອງ ເຊິ່ງທ່ານ ກ່າວວ່າ: ມາຮອດດຽວນີ້ ກະ ຊວງສຶກສາທິການ ແລະ ກິລາ ໄດ້ມີກົດໝາຍວ່າດ້ວຍອາຊີວະ ສຶກສາເຊິ່ງ ກົດໝາຍດັ່ງກ່າວໄດ້ກຳນົດໜ້າທີ່ຂອງກະຊວງສຶກສາທິການ ແລະ ກິລາ ແລະ ກະ ຊວງແຮງງານ ແລະ ສະຫວັດ ດີການສັງຄົມຢ່າງ ຄັກແນ່ ແລະ ກໍໄດ້ສົມທົບກັບກະຊວງແຮງງານກຳນົດຂອບວຸດ ທິການສຶກສາແຫ່ງຊາດຢ່າງລະອຽດ, ພ້ອມທັງມີການຮ່ວມມືກັບ ພາກສ່ວນເອກະຊົນໃນດ້ານການພັດທະນາຊັບພະຍາກອນ ມະນຸດ ເປັນຕົ້ນການສືບຕໍ່ຮ່ວມມືກັບບໍລິສັດລົງທຶນພາຍໃນ ແລະ ຕ່າງ ປະເທດ. ນອກຈາກນີ້ ກະຊວງ ດັ່ງກ່າວໄດ້ພະ ຍາຍາມເຮັດໃຫ້ ຂອບວຸດທິການສຶກສາຂອງ ສປປ ລາວ ມີການເຊື່ອມໂຍງ ກັບພາກ ພື້ນ ແລະ ສາກົນ ເພື່ອ ເຮັດໃຫ້ການສຶກ ສາຂອງປະເທດເຮົາກັບພາກພື້ນອາຊຽນຫຍັບມໍ່ ເຂົາຫາກັນເທື່ອລະກ້າວ.

ໃນມື້ດຽວກັນ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ໄດ້ ຊີ້ແຈງກ່ຽວກັບ ການຄ້ຳປະກັນສະບຽງອາຫານເພື່ອຮັບປະກັນສະບຽງອາຫານ ແລະ ເປັນສິນຄ້າເຊິ່ງສ່ວນຫຼາຍແລ້ວບັນດາສະມາຊິກສະພາແຫ່ງຊາດທີ່ໃຫ້ຄວາມສົນໃຈຕໍ່ກັບບັນຫາດັ່ງກ່າວນັ້ນກໍແມ່ນບັນ ຫາທີ່ດິນຜະລິດກະສິກຳໂດຍສະເພາະການປູກເຂົ້າ, ລ້ຽງສັດ ລວມທັງມາດຕະການໃຫ້ບັນລຸຄາດໝາຍຜະລິດເຂົ້າໃຫ້ບັນລຸສະມັດຕະພາບ 4,5 ໂຕນ/ເຮັກ ຕາ, ມາດຕະການໃນການຄຸ້ມຄອງທີ່ດິນກະສິກຳເປັນຕົ້ນແມ່ນເຂດທີ່ມີຊົນລະປະທານໃນການສະໜອງນ້ຳເພື່ອຮັບປະກັນໃຫ້ສາມາດຜະລິດເຂົ້າ ແລະ ຜະລິດເປັນສິນຄ້າແບບຍືນຍົງ, ການສະ ໜອງແນວພັນພຶດ, ສັດ, ການສົ່ງເສີມວິຊາການເຕັກນິກເຂົ້າໃນເຂດຈຸດສຸມຜະລິດໃຫ້ເປັນສິນຄ້າ ແລະ ບັນຫາອື່ນໆອີກຈຳນວນໜຶ່ງ.

ຈາກນັ້ນ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້ຊີ້ແຈງກ່ຽວກັບການສົ່ງເສີມນະໂຍບາຍການຜະລິດເປັນສິນຄ້າຂອງປະຊາ ຊົນໂດຍສະເພາະກໍແມ່ນການຜະ ລິດຂະໜາດນ້ອຍ ແລະ ຂະໜາດກາງ ເຊິ່ງສ່ວນຫລາຍທີ່ບັນຫາສະມາຊິກສະພາແຫ່ງຊາດໃຫ້ຄວາມສົນໃຈກໍແມ່ນການສ້າງນິຕິກຳ ແລະ ການາຄຸ້ມຄອງຊຸກຍູ້ການຜະລິດເປັນສິນຄ້າເພື່ອຕອບສະໜອງກ່ຽວກັບຕະຫຼາດ, ການຜະລິດກໍໃຫ້ຫັນເປັນອຸດສາຫະກຳຂະໜາດນ້ອຍ ແລະ ກາງໃຫ້ກວ້າງຂວາງ, ພ້ອມກັນນັ້ນກໍໃຫ້ມີການກຳນົດໃຫ້ເປັນຈຸດສຸມຂອງສິນຄ້າໃຫ້ລະອຽດ ນອກນີ້ ແຜນການໃນປີ 2015 ນີ້ກໍໃຫ້ມີການກຳນົດຄັກແນ່ ແລະ ບັນຫາອື່ນໆ.