ໂຄງການທົດລອງເຂດຕົວເມືອງປະຫວັດສາດ ຫລື
ວຽງຈັນທົດລອງ 2015 ການຟື້ນຟູຕົວເມືອງປະຫວັດສາດເປັນໂຄງການໃໝ່ທີ່ຫາກໍເກີດຂຶ້ນເມື່ອບໍ່ດົນມານີ້,
ນັບວ່າເປັນໂຄງການດີໆເພື່ອນຳສະເໜີສິ່ງທີ່ເກີດມາຈາກ ສີໄມ້ ລາຍມືຂອງຄົນລາວເຮົາເອງເຊັ່ນ:
ງານສິລະປະ, ສາທິດເຄື່ອງຫັດຖະກຳ, ການແຕ້ມຮູບຄ້າຍຄື, ການ ວາງສະແດງຮູບຖ່າຍ ແລະ
ຮູບແຕ້ມ. ລວມເຖິງການສະແດງສິລະປະພື້ນເມືອງຕາມຖະໜົນອີກດ້ວຍ.
ພາກສ່ວນຮັບຜິດຊອບໂຄງການດັ່ງກ່າວ ໃຫ້ຮູ້ວ່າ:
ວຽງຈັນທົດລອງ 2015 ແມ່ນວຽກໜຶ່ງພາຍໃຕ້ໂຄງການຄຸ້ມຄອງການພັດທະນາຕົວເມືອງຢູ່ນະຄອນຫລວງວຽງຈັນ
ໂດຍການຮ່ວມມືລະຫວ່າງອົງການໄຈກ້າ,ກະຊວງໂຍທາທິການ ແລະ ຂົນສົ່ງ ແລະ ນະຄອນຫລວງວຽງຈັນ,
ເຊິ່ງໄດ້ຮັບການສະໜັບສະໜູນຈາກລັດຖະບານຍີ່ປຸ່ນຜ່ານອົງການໄຈກ້າ, ໂຄງການດັ່ງກ່າວປະກອບມີຄື:
ການປັບປຸງແຜນຜັງການນຳໃຊ້ທີ່ດິນລວມຂອງນະຄອນຫລວງວຽງຈັນ, ການສ້າງແຜນຜັງລະອຽດ
ແລະ ກົດລະບຽບຄຸ້ມຄອງການນຳໃຊ້ທີ່ດິນຢູ່ເຂດຕົວເມືອງຊັ້ນໃນ,
ພ້ອມໆກັບການສ້າງລະບຽບຄວບຄຸມທິວທັດຕົວເມືອງຢູ່ເຂດຕົວເມືອງເກົ່າປະຫວັດສາດ
ໂດຍມີການຈັດຕັ້ງປະຕິບັດຕົວຈິງຮ່ວມກັນລະຫວ່າງທີມງານຊ່ຽວຊານໄຈກ້າ ແລະ ທີມງານກົມເຄຫາ
ແລະ ຜັງເມືອງຂອງກະຊວງໂຍທາທິການ ແລະ ຂົນສົ່ງ ແລະ ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ.
ຈຸດປະສົງຫລັກແມ່ນເພື່ອເປັນການສ້າງ ແລະ
ປູກຈິດສຳນຶກໃຫ້ແກ່ປະຊາຊົນຊາວນະຄອນຫລວງວຽງຈັນເວົ້າລວມ, ເວົ້າສະເພາະແມ່ນບັນດາເຈົ້າຂອງຫ້າງຮ້ານ,
ຜູ້ປະກອບການ, ນັກທຸລະກິດ ແລະ ປະຊາຊົນທີ່ອາໄສຢູ່ເຂດອະນຸລັກປະຫວັດສາດ (ແຄມຂອງ)
ໃຫ້ຮັບຮູ້ ແລະ ເຂົ້າໃຈຄວາມສຳຄັນໃນການປົກປັກຮັກສາເຂດດັ່ງກ່າວໃຫ້ມີຄວາມເປັນເອກະລັກ
ແລະ ວັດທະນະທຳອັນເກົ່າແກ່ໄປພ້ອມກັບການປັບປຸງ,ສົ່ງເສີມ ແລະ ສ້າງຄວາມດຶງດູດດ້ານການທ່ອງທ່ຽວຂອງນະຄອນຫລວງວຽງຈັນ
ໂດຍສະເພາະຢູ່ເຂດຕົວເມືອງເກົ່າປະຫວັດສາດ.ນອກນັ້ນ ຍັງຈະເປັນການທົດລອງເພື່ອຖອດຖອນໄດ້ບົດຮຽນດ້ານດີ
ແລະ ຂໍ້ຄົງຄ້າງຈະຕ້ອງປັບປຸງສຳລັບການຈັດກິດຈະກຳໃນຕໍ່ໜ້າໃຫ້ມີປະສິດທິຜົນ
ແລະ ມີຄວາມຍືນຍົງ.
ກິດຈະກຳຂອງໂຄງການປະກອບດ້ວຍ 3 ກິດຈະກຳຫລັກຄື
:1. ກິດຈະກຳສ້າງ ແລະ ປູດຈິດສຳນຶກໃຫ້ແກ່ປະຊາຊົນພາຍໃນເຂດກ່ຽວກັບຄຸນຄ່າ
ແລະ ຄວາມສຳຄັນຂອງການຟື້ນຟູ ແລະ ປັບປຸງທິວທັດຕົວເມືອງ ໂດຍຜ່ານການຈັດກອງປະຊຸມສຳມະນາ.
2. ຈັດງານກິດຈະກຳເພື່ອສົ່ງເສີມ ແລະ ສ້າງຄວາມດຶງດູດການທ່ອງທ່ຽວຢູ່ເຂດຕົວເມືອງເກົ່າປະກອບດ້ວຍການແຂ່ງຂັນປະກວດແຕ້ມຮູບ
ແລະ ຖ່າຍພາບໃນຫົວຂໍ້ “ປະຫວັດສດ ແລະ ວັດທະນະ ທຳຂອງນະຄອນຫລວງວຽງຈັນ”, ກິດຈະກຳຖະໜົນປອດລົດ
ຫລື ຖະໜົນຄົນຍ່າງ ເຊິ່ງໃນໄລຍະວັນເສົາ ແລະ ວັນອາທິດຂອງໄລຍະຈັດງານໄດ້ມີການອັດທາງ
ເພື່ອສ້າງພື້ນທີ່ໃຫ້ແກ່ຄົນຍ່າງ ບໍ່ວ່າຈະເປັນນັກທ່ອງທ່ຽວ,ແຂກ ແລະ ປະຊາຊົນພາຍໃນ
ແລະ ພາຍນອກທີ່ມາຢ້ຽມຢາມເຂດດັ່ງກ່າວໃຫ້ໄດ້ຮັບຄວາມສະດວກສະບາຍ ແລະ ຮູ້ສຶກປອດໄພຈາກການສັນຈອນຢູ່ຕາມຖະໜົນທີ່ຈັດກິດຈະກຳ
ເຊິ່ງຄັ້ງນີ້ໄດ້ເລືອກເອົາຖະໜົນຝຣັ່ງຊົວງີນ, ເຈົ້າອານຸ ແລະ ຫລັງວັດອົງຕື້.
ພ້ອມນັ້ນຍັງມີການສະແດງສິລະປະ, ວາງສະແດງຜະລິດຕະພັນ ແລະ ການປະດັບປະດາໄຟຍາມຄ່ຳຄືນ
ແລະ ການຈັດນຳທ່ຽວພາຍໃນເຂດຕົວເມືອງເກົ່າ ໂດຍນ້ອງນັກສຶກສາຈາກພາກວິຊາຜັງເມືອງ
ມະຫາ ວິທະຍາໄລແຫ່ງຊາດ ແລະ ກິດຈະກຳທີ່ໜ້າສົນໃຈອື່ນໆອີກຈຳນວນໜຶ່ງ. 3. ກິດຈະກຳຟື້ນຟູທິວທັດຕົວເມືອງເຂດ
ໂດຍການປັບປຸງບັນດາປ້າຍຮ້ານ, ປ້າຍໂຄສະນາໃຫ້ແທດເໝາະກັບເຂດ, ການຕິດຕັ້ງແຜ່ນປ້າຍອະທິບາຍຄວາມເປັນມາ
ແລະ ບອກທີ່ຕັ້ງຂອງເຂດຕົວເມືອງເກົ່າ, ການປັບປຸງ ແລະ ປະດັບປະດາຖະໜົນ ແລະ
ທາງຍ່າງບາງເສັ້ນ.
ສຳລັບການຕອບຮັບຈາກປະຊາຊົນຕໍ່ໂຄງການດັ່ງກ່າວໂດຍລວມແມ່ນມີສຽງຕອບຮັບເປັນຢ່າງດີທັງຜູ້ທີ່ອາໄສຢູ່ພາຍໃນ
ແລະ ບໍລິເວນໃກ້ຄຽງ ແລະ ຜູ້ທີ່ມາຢ້ຽມຊົມງານ, ເຊິ່ງມັນສະແດງອອກໃນການສຳຫລວດຕົວຈິງເຫັນວ່າຈຳນວນແຂກທີ່ເຂົ້າມາຢ້ຽມຊົມໃນລະຫວ່າງວັນເສົາ
ແລະ ວັນອາທິດໄລຍະຈັດງານແມ່ນເພີ່ມຂຶ້ນເກືອບ 3 ເທົ່າ ຖ້າທຽບໃສ່ຈຳນວນແຂກທີ່ມາໃນວັນເສົາ
ແລະ ວັນອາທິດກ່ອນການຈັດງານ. ນອກຈາກຈຳນວນຜູ້ມາຢ້ຽມຢາມຢູ່ເຂດຈະເພີ່ມຂຶ້ນແລ້ວຍັງມີຫລາຍທ່ານທີ່ສະແດງຄວາມເພິ່ງພໍໃຈຕໍ່ງານ
ແລະ ສະເໜີໃຫ້ຈັດງານກິດຈະກຳດີໆແບບນີ້ອີກໃນອະນາຄົດ.
No comments:
Post a Comment