ເນື່ອງໃນໂອກາດສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ (22/3/1955-22/3/2015) ໃນຕອນເຊົ້າວັນທີ 21 ມີນາ 2015, ບັນດາຜູ້ນຳ ພັກ-ລັດ ສປປ ລາວ ນຳໂດຍ ສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ, ຜູ້ປະຈຳການຄະນເລຂາທິການສູນກາງພັກປະຊາຊົນປະຕິວັດລາວ, ຮອງປະ ທານປະເທດ ແຫ່ງສາທາລະນະລັດ ປະຊາທິປະ ໄຕ ປະຊາຊົນລາວ, ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ; ສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ, ນາຍົກລັດ ຖະມົນຕີ , ສະຫາຍ ສະໝານ ວິຍະເກດ ອະດີດກຳມະການກົມການເມືອງສູນກາງພັກ, ອະດີດປະທານສະພາ ແຫ່ງຊາດ ລາວ, ມີບັນດາສະຫາຍກົມການເມືອງສູນກາງພັກ, ກຳມະການສູນກາງພັກ ໄດ້ນຳເອົາກະຕ່າດອກໄມ້ມາ ວາງຢູ່ຕໍ່ ໜ້າຮູບປັ້ນ ປະ ທານໄກສອນ ພົມວິຫານ ໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ ເພື່ອເປັນການສະແດງຄວາມຄຳນັບ, ຄວາມເຄົາລົບຮັກ ແລະ ສັນລະເສີນເຖິງຄຸນງາມຄວາມດີ ແລະ ຜົນງານອັນໃຫຍ່ຫລວງ
ຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິຕົນຕະຫລອດຊີວິດ ເພື່ອປະເທດຊາດ ນຳພາປະຊາ ຊົນລາວບັນດາເຜົ່າ ລຸກຮື້ຂຶ້ນຕໍ່ສູ້ຕ້ານພວກລ່າເມືອງຂຶ້ນທັງເກົ່າ ແລະ ໃໝ່ ອັນໄດ້ເຮັດໃຫ້ຂະບວນການຕໍ່ສູ້ດັ່ງກ່າວ ໄດ້ຮັບໄຊຊະນະຢ່າງສົມບູນ ໃນວັນທີ 2 ທັນວາ 1975 ແລະ ສືບຕໍ່ນຳພາປະຊາຊົນລາວສ້າງສາພັດທະນາປະເທດຊາດ ໃຫ້ມັ່ງຄັ່ງເຂັ້ມແຂງ, ປະຊາຊົນມີຄວາມຜາສຸກ ສັງຄົມມີຄວາມສີວິໄລ ແລະ ຍຸຕິທຳ.
ໃນວັນດຽວກັນ, ບັນດາຜູ້ນຳພັກ-ລັດ ກໍໄດ້ເຂົ້າວາງພວງມາລາອານຸສາວະລີນັກຮົບນິລະນາມ ທີ່ເດີ່ນພະທາດຫລວງນະຄອນຫລວງວຽງຈັນ ເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ ແລະ ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນ ຂອງບັນພະບູລຸດລາວ ກໍຄືບັນດານັກຮົບປະຕິວັດ ທີ່ເສຍສະຫລະຊີວິດ, ເລືອດເນື້ອເພື່ອປະເທດຊາດ ແລະ ປະຊາຊົນຢ່າງອົງອາດກ້າຫານພາຍໃຕ້ການຊີ້ນຳນຳພາຂອງພັກປະຊາຊົນປະຕິວັດລາວ ໄດ້ຮັບໄຊຊະນະເປັນກ້າວໆມາ ແລະ ສາມາດສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ເຊິ່ງຄຸນງາມຄວາມດີ ແລະ ຜົນງານອັນໃຫຍ່ຫລວງດັ່ງກ່າວ ໄດ້ຖືກຈາລຶກໄວ້ໃນຊີວິດຈິດໃຈຂອງທົ່ວປວງຊົນລາວທັງຊາດຕະຫລອດໄປ.
ໂອກາດດຽວກັນນີ້ ຍັງມີບັນດາຄະນະພັກ, ຄະນະນຳຈາກສະພາແຫ່ງຊາດ, ຫ້ອງວ່າການລັດຖະບານ, ຫ້ອງ ວ່າການສູນກາງພັກ, ບັນດາກະຊວງ, ນະຄອນຫລວງວຽງຈັນ, ສູນກາງຊາວໜຸ່ມປະຊາຊົນປະຕິວັດລາວ, ສູນກາງກຳ ມະບານ, ສູນກາງສະຫະພັນແມ່ຍິງລາວ, ສະຫະພັນນັກຮົບເກົ່າແຫ່ງຊາດ, ທະນາຄານແຫ່ງ ສປປ ລາວ ແລະ ພາກ ສ່ວນກ່ຽວຂ້ອງຕ່າງໆເຂົ້າວາງພວງມະລາ ຈົນຮອດວັນທີ 22 ມີນາ 2015.
ອະນຸກຳມະການເນື້ອໃນຮ່ວມກັບຫໍພິພິທະພັນ ໄກສອນ ພົມວິຫານ ໄດ້ຈັດງານວາງສະແດງຮູບພາບພາຍໃຕ້ຫົວເລື່ອງ “60 ປີ ແຫ່ງການຊີ້ນຳ-ນຳພາຂອງພັກປະຊາຊົນ ປະຕິວັດລາວ (1955-2015)” ທີ່ສະທ້ອນໃຫ້ເຫັນວິວັດທະນາການແຫ່ງການກຳເນີດເກີດຂຶ້ນ, ການເຕີບໃຫຍ່ເຂັ້ມແຂງ ແລະ ນຳພາມີໄຊສະຫງ່າງາມຂອງພັກປະຊາຊົນປະຕິວັດລາວຂຶ້ນທີ່ຫໍພິພິທະພັນ ໄກສອນ ພົມວິຫານ ໂດຍມີສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ມີສະຫາຍ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ, ມີບັນດາສະຫາຍກຳມະການກົມການເມືອງສູນກາງພັກ, ເລຂາທິການສູນກາງພັກ, ກຳມະການສູນກາງພັກ ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ.
ສະຫາຍ ສຈ. ດຣ. ກິແກ້ວ ໄຂຄຳພິທູນ ກຳມະການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ, ຫົວໜ້າອະນຸກຳມະການເນື້ອໃນສະເຫລີມສະຫລອງ 2 ວັນປະຫວັດສາດ ປີ 2015 ມີຄຳເຫັນໃນພິທີເປີດງານສະແດງດັ່ງກ່າວວ່າ: ງານວາງສະແດງຮູບພາບ “60 ປີ ແຫ່ງການຊີ້ນຳ-ນຳພາຂອງພັກປະຊາຊົນ ປະຕິວັດລາວ (1955-2015)” ປະກອບມີບັນດາຮູບພາບ, ເອກະສານ, ວັດຖຸພັນເກືອບ 300 ຢ່າງ ຈາກເຫດການອັນສຳຄັນ, ໂດດເດັ່ນ, ເລິກເຊິ່ງ ແລະ ປະທັບໃຈທີ່ສຸດໃນຂະບວນວິວັດແຫ່ງການກຳເນີດເກີດຂຶ້ນ, ການເຕີບໃຫຍ່ເຂັ້ມແຂງ ແລະ ນຳພາມີໄຊສະຫງ່າງາມຂອງພັກປະຊາຊົນ ປະຕິວັດລາວ ທີ່ມີກຽດສະຫງ່າ, ສ່ອງແສງໃຫ້ເຫັນວິລະກຳອັນລ້ຳເລີດຂອງພັກເຮົາໃນການຊີ້ນຳ-ນຳພາປວງຊົນລາວທັງຊາດ ເຮັດສຳເລັດການປະຕິວັດຕໍ່ສູ້ກູ້ເອົາເອກະລາດ, ອິດສະລະພາບ ແລະ ຜືນແຜ່ນດິນອັນຄົບຖ້ວນຂອງຊາດ, ຊີ້ໃຫ້ເຫັນຄວາມປີຊາສາມາດຂອງພັກເຮົາໃນການກ້າວຂຶ້ນສູ່ຄວາມຈະເລີນວັດທະນາຕາມຸຈດໝາຍ ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ. ງານວາງແດງຮູບພາບຄັ້ງນີ້ ຍັງເປັນການປະກອບສ່ວນອັນສຳຄັນເຂົ້າໃນການສຶກສາອົບຮົມມູນເຊື້ອອັນສະຫງ່າງາມຂອງພັກເຮົາ ກໍຄືສຶກສາຮ່ຳຮຽນເອົາແບບຢ່າງອັນດີເດັ່ນ, ໃສແຈ້ງແຫ່ງຄຸນສົມບັດສິນທຳປະຕິວັດຂອງບັນດາສະຫາຍອະດີດການນຳຂອງພັກ ອັນມີປະທານ ໄກສອນ ພົມວິຫານ ທີ່ເຄົາລົບຮັກເປັນຜູ້ນຳພາທາງ ແລະ ຄວາມເສຍສະລະທັງເຫື່ອແຮງ, ຈິດໃຈ ແລະ ສະຕິປັນຍາ ພ້ອມທັງຊີວິດອັນລ້ຳຄ່າຂອງບັນດາສະຫາຍພະນັກງານສະມາຊິກພັກໃນແຕ່ລະໄລຍະຂອງການປະຕິວັດ ເພື່ອເຊີດຊູຄັນທຸງຊະນະເລີດຂອງພັກ, ເພື່ອຄວາມຈະເລີນວັດທະນາຂອງປະເທດຊາດອັນແສນຮັກ, ເພື່ອຄວາມຢູ່ເຢັນເປັນສຸກຂອງປະຊາຊົນ ແລະ ເພື່ອເຮັດໃຫ້ຄົນຮຸ້ນຫລັງ ໂດຍສະເພາະຄົນຮຸ້ນໜຸ່ມໃຫ້ຢຶດໝັ້ນໃນອຸດົມການຂອງພັກ, ສືບທອດມູນເຊື້ອຂອງນັກປະຕິວັດຮຸ້ນອາວຸໂສ, ເດັດດ່ຽວນຳພາປະເທດຊາດກ້າວຂຶ້ນຢ່າງໜັກແໜ້ນຕາມຈຸດໝາຍທີ່ພັກ ແລະ ປະຊາຊົນໄດ້ເລືອກໄວ້.
ໃນງານວາງສະແດງດັ່ງກ່າວ ຍັງມີບັນດາບໍລິສັດ, ຫ້າງຮ້ານ ໄດ້ນຳເອົາສິນຄ້າຜະລິດຕະພັນ ໜຶ່ງເມືອງ ໜຶ່ງຜະລິດຕະພັນ ແລະ ສິນຄ້າໂອດ໊ອບ ເຊິ່ງມີປະເພດອາຫານ, ເຄື່ອງດື່ມ, ເຄື່ອງແກະສະຫລັກ ແລະ ອື່ນໆ ທີ່ເປັນສີໄມ້ລາຍມືຂອງຄົນລາວມາວາງສະແດງ ແລະ ຂາຍມີຈຳນວນຫລວງຫລາຍ.
ພ້ອມດຽວກັນນີ້ ກໍມີການສະແດງສິລະປະວັດທະນະທຳ ເພື່ອຂ່ຳນັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 60 ປີ (22/3/1955-22/3/2015) ໄດ້ຈັດຂຶ້ນຢ່າງຄຶກຄື້ນ ໃນຕອນຄ່ຳວັນທີ 20 ມີນານີ້ ຢູ່ຫໍວັດທະນະທຳແຫ່ງຊາດ ໂດຍມີສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະ ທານປະເທດ ແຫ່ງ ສປປ ລາວ ພ້ອມພັນລະຍາ, ມີບັນດາສະຫາຍກຳມະການກົມການເມືອງສູນກາງພັກ, ກຳມະການສູນກາງພັກ ແລະ ພະນັກງານ, ທະຫານ, ຕຳຫລວດພ້ອມມວນຊົນເຂົ້າຮ່ວມເປັນຈຳນວນຫລາຍ.
ສະຫາຍ ສຈ. ດຣ. ບໍ່ແສງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຄະນະອະນຸກຳມະການໂຄສະນາ-ວັດທະນະທຳສະຫລອງ 2 ວັນປະຫວັດ ສາດ ປີ 2015 ໄດ້ກ່າວວ່າ: ເພື່ອເປັນການສ້າງບັນຍາກາດເບີກບານມ່ວນຊື່ນໃນການສະເຫລີມສະຫລອງວັນປະຫວັດສາດອັນສຳຄັນ ແລະ ມີຄວາມໝາຍໃນຄັ້ງນີ້, ຄະນະຮັບຜິດຊອບການສະແດງໄດ້ປະສານສົມທົບກັບຂະແໜງການຕ່າງໆທັງພາກລັດ ແລະ ສັງຄົມ ເຕົ້າໂຮມເອົາສິລະປິນທີ່ມາຈາກກອງສິລະປະກອນແຫ່ງຊາດ, ກອງສິລະປະກອນກອງທັບປະຊາຊົນລາວ, ກອງສິລະປະກອນກະຊວງປ້ອງກັນຄວາມສະຫງົບ, ໂຮງຮຽນສິລະປະແຫ່ງຊາດ, ກອງລະຄອນເວົ້າແຫ່ງຊາດ, ກອງລະຄອນຕຸກກະຕາແຫ່ງຊາດ, ກອງລະຄອນລຳແຫ່ງຊາດ, ວິທະຍາໄລລັດຕະນະບໍລິຫານທຸລະກິດພ້ອມສິລະປິນຈາກຄ້າຍເພງຕ່າງໆ ຈຳນວນເກືອບ 500 ຄົນ, ໃນນັ້ນ ສິ່ງທີ່ໂດດເດັ່ນໃນລາຍການສະແດງຄັ້ງນີ້ ແມ່ນໄດ້ປະຕິບັດຕາມການຊີ້ນຳຂອງຂັ້ນເທິງ ໂດຍສະເພາະການຊີ້ນຳອັນຈົດຈໍ່ຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໂດຍໄດ້ສ້າງວົງດົນຕີສາກົນແບບອໍເກດສະຕຣາຂອງລາວເຮົາຂຶ້ນ ເຊິ່ງປະກອບດ້ວຍນັກດົນຕີ ແລະ ນັກຮ້ອງທີ່ເປັນລູກຫລານລາວເຮົາ ຈຳນວນ 300 ຄົນ ຖືໄດ້ວ່າເປັນວົງດົນຕີສາກົນປະສົມແບບອໍເກດສະຕຣາຄັ້ງທຳອິດໃນປະຫວັດສາດການບັນເທີງຂອງປະເທດເຮົາ. ນອກນັ້ນ ຍັງໄດ້ປະດິດຄິດແຕ່ງ ແລະ ສ້າງລາຍການໃໝ່ເປັນສ່ວນໃຫຍ່ຂອງລາຍການສະແດງໃນຄັ້ງນີ້ ເຊິ່ງລ້ວນແລ້ວແຕ່ມີເນື້ອໃນສັນລະເສີນມູນເຊື້ອການນຳພາອັນປີຊາສາມາດຂອງພັກປະຊາຊົນ ປະຕິວັດລາວ ໃນພາລະກິດການຕໍ່ສູ້ປົດປ່ອຍປະເທດຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດໃນຕະຫລອດໄລຍະ 60 ປີຜ່ານມາ.
No comments:
Post a Comment