ທ່ານ ດຣ ນາງ. Geraldine Richmond, ທູດວິທະຍາສາດຂອງສະຫະລັດອາເມລິກາ
ໄດ້ເດີນທາງມານະຄອນຫຼວງວຽງຈັນ ໃນວັນທີ 8 ມີນາ, 2015 ແລະ ພັກຢູ່ເປັນເວລາ
4 ວັນ ເພື່ອເຮັດວຽກການພົບປະກັບບັນດາເຈົ້າໜ້າທີຂອງລັດຖະບານລາວ ຊຶ່ງປະກອບມີບັນດາກະຊວງ,
ມະຫາວິທະຍາໄລ ແລະ ອົງການຈັດຕັ້ງສັງຄົມ. ເພື່ອການພັດທະນາ ແລະ ສ້າງຄວາມເຂັ້ມແຂງໃຫ້ແກ່ເຄື່ອຂ່າຍການຮ່ວມມືໃນຂະແໜງການຄົ້ນຄວ້າລະຫວ່າງ
ບັນດານັກວິທະຍາສາດ ກໍຄືວິຊະວະກອນ ຂອງສະຫະລັດອາເມລິກາ ແລະ ລາວ. ນີ້ແມ່ນການເດີນທາງມາຢ້ຽມຢາມຂົງເຂດອາຊີຕາເວັນອອກສຽງໃຕ້ເປັນຄັ້ງທີສອງຂອງເພິ່ນ
ນັບຕັ້ງແຕ່ເພິ່ນໄດ້ຖືກແຕ່ງຕັ້ງເປັນທູດວິທະຍາສາດ ໂດຍປະທານາທິບໍດີ
Obama ໃນປີຜ່ານມາ ແລະ ກໍເປັນຄັ້ງທຳອິດທີ່ໄດ້ມາຢ້ຽມຢາມ ສປປ ລາວ.
ທ່ານ ດຣ ນາງ. Richmond ໄດ້ສະເຫຼີມສະຫຼອງວັນແມ່ຍິງສາກົນ
ໂດຍການໄປຢ້ຽມຢາມບັນດານັກທຸລະກິດຍິງທ້ອງຖິ່ນ ແລະ ບັນດາສະຖານທີ່ທາງວັດທະນາທຳຂອງລາວ.
ໃນຊ່ວງໄລຍະການຢ້ຽມຢາມທີ່ເຫຼືອ, ທ່ານ ດຣ. Richmond ຈະໄດ້ພົບປະກັບທ່ານ
ດຣ. ບໍ່ວຽງຄຳ ວົງດາລາ, ລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ,
ແລະ ບັນດາຜູ້ຕາງໜ້າຈາກ ກະຊວງສາທາລະນະສຸກ, ກະຊວງກະສິກຳ ແລະ ປ່າໄມ້,
ກະຊວງພະລັງງານ ແລະ ບໍ່ແຮ່. ນອກຈາກນັ້ນ,
ທ່ານຍັງໄດ້ໄປຢ້ຽມຢາມມະຫາວິທະຍາໄລແຫ່ງຊາດຂອງລາວ
ແລະ ມະຫາວິທະຍາໄລວິທະຍາສາດສຸຂະພາບ ຊຶ່ງທ່ານຈະໄດ້ພົບປະກັບບັນດາສະມາຊິກສະຫະພັນແມ່ຍິງລາວຂອງສະຖາບັນຄົ້ນຄວ້າຫຼັງມະຫາ.
ທ່ານ ດຣ ນາງ. Richmond ເປັນປະທານຄະນະເຄມີສາດຂອງມະຫາວິທະຍາໄລ
Oregon, ແລະ ທັງເປັນສະມາຊິກຂອງສະຖາບັນວິທະຍາສາດແຫ່ງຊາດ. ທ່ານເປັນຜູ້ໜຶ່ງທີ່ຮັບຮູ້ດີໃນເວທີສາກົນ
ເປັນຕົ້ນໃນຂົງເຂດຊີວະສາດ complex surface chemistry ຊຶ່ງເພິ່ນມີຄວາມສົນໃຈໃນຂະແໜງການຜະລິດພະລັງງານ,
ພະລັງງານຈາກສິ່ງແວດລ້ອມ, ເຄມີສາດຂະແໜງບັນຍາກາດ ແລະ ເປືອກນອກໂມເລກູນຊີວະສາດ.
ທ່ານຍັງເປັນປະທານສະມາຄົມເພື່ອຄວາມກ້າວໜ້າທາງດ້ານວິທະຍາສາດຂອງອາເມລິກາ
ແລະ ເປັນຜູ້ໄດ້ຮັບການແຕ່ງຕັ້ງໃຫ້ແກ່ຄະນະບໍລິຫານວິທະຍາສາດແຫ່ງຊາດ.
ທ່ານ ດຣ. Richmond ອຸທິດຕົນປະກອບສ່ວນເຂົ້າໃນພາລະກິດວຽກງານໃນການຊຸກຍູ້ພາລະບົດບາດຂອງແມ່ຍິງໃນຂົງເຂດວິທະຍາສາດ
ແລະ ວິຊະວະກອນ ຊຶ່ງເປັນຜູ້ສ້າງຕັ້ງ ແລະ ເປັນປະທານຄະນະກຳມາທິການເພື່ອຄວາມກ້າວໜ້າຂອງບັນດານັກເຄມີສາດເພດຍິງ,
ເປັນອົງການຮາກຖານເຮັດໜ້າທີ່ໃຫ້ການຝຶກອົບຮົມລະດັບມືອາຊີບ ແລະ ສ້າງເຄື່ອຂ່າຍກັບບັນດານັກວິທະຍາສາດແມ່ຍິງຫຼາຍກວ່າ
12,000 ຄົນໃນທົ່ວສະຫະລັດອາເມລິກາ ແລະ ບັນດາປະເທດກຳລັງພັດທະນາ.
ແຜນງານການທູດທາງດ້ານວິທະຍາສາດຂອງສະຫະລັດອາເມລິກາ
ແມ່ນອົງປະກອບພັນທະຄວາມຕັ້ງໃຈໜຶ່ງຂອງສະຫະລັດອາເມລິກາ ໃນພັນທະສັນຍາສາກົນຂອງຂະແໜງວິທະຍາສາດ
ແລະ ເຕັກໂນໂລຊີ. ປະທານາທິບໍດີ Obama ໄດ້ປະກາດແຜນງານດັ່ງກ່າວ ທີ່ນະຄອນຫຼວງ
Cairo ໃນເດືອນ ມິຖຸນາ 2009. ນັບຕັ້ງແຕ່ໄດ້ລິເລີ່ມແຜນງານດັ່ງກ່າວ, ທູດວິທະຍາສາດໄດ້ເດີນທາງໄປຢ້ຽມຢາມ
27 ປະເທດ.
ທູດວິທະຍາສາດໄດ້ເດີນທາງໃນຖານະພົນລະເຮືອນ
ແລະ ໄດ້ແບ່ງປັນຄວາມຮູ້ ແລະ ຄວາມສາມາດທີ່ໄດ້ຮັບຈາກຕ່າງປະເທດກັບປະຊາຄົມວິທະຍາສາດຂອງສະຫະລັດອາເມລິກາພາຍຫຼັງກັບຄືນເມື່ອ.
ການແລກປ່ຽນຄວາມຮູ້ດັ່ງກ່າວ ໄດ້ປະກອບສ່ວນໃຫ້ແກ່ການຮ່ວມມືໃນຕໍ່ໜ້າ ກໍຄືການພົບປະສົນທະນາກັບບັນດາຄູ່ຮ່ວມງານທີ່ສຳຄັນ.
No comments:
Post a Comment