ກອງປະຊຸມສຸດຍອດອາຊີ-ອາຟຣິກາ
ເພື່ອສະເຫລີມສະຫລອງຄົບຮອບ
60 ປີ, ຂອງການປະຊຸມອາຊີ-ອາຟຣິກາ ປີ 1955 ແລະ ຄົບຮອບ 10 ຂອງການຈັດຕັ້ງປະຕິ ບັດການເປັນຄູ່ຮ່ວມຍຸດທະສາດໃໝ່ລະຫວ່າງສອງທະວີບອາຊີບ-ອາຟລິກາ ໄດ້ຈັດຂຶ້ນລະຫວ່າງວັນທີ
19-24 ເມສານີ້, ຢູ່ນະຄອນຫລວງຈາກາຕາ ປະເທດອິນໂດເນເຊຍ. ຕາງໜ້າໃຫ້ລັດ ຖະບານແຫ່ງ ສປປ
ລາວ, ໂດຍແມ່ນທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ,
ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມດັ່ງກ່າວ. ພາຍຫລັງກອງປະຊຸມສຸດຍອດໄດ້ມີການຈັດຕັ້ງພິທີສະເຫລີມສະຫອງຄົບຮອບ 60 ປີ ຂອງກອງປະຊຸມສຸດຍອດອາຊີ-ອາຟຣິກາ ຂຶ້ນໃນວັນທີ 24
ເມສານີ້, ທີ່ເມືອງບັນດຸງ ປະເທດອິນໂດເນເຊຍ, ເຊິ່ງເປັນສະຖານທີ່ປະຫວັດສາດ ທີ່ກອງ
ປະຊຸມອາຊີ-ອາຟຣິກາ, ໄດ້ຖືກຈັດຕັ້ງຂຶ້ນໃນເດືອນເມສາ
1955. ເຂົ້າຮ່ວມກອງປະຊຸມສຸດຍອດສະເຫລີມສະຫລອງດັ່ງກ່າວໃນຄັ້ງນີ້ ປະກອບມີຄະນະຜູ້ແທນຂັ້ນສູງຈາກສອງທະວີບ ລວມທັງໝົດ 93 ຄະນະ, ໃນນັ້ນມີປະມຸກລັດ ແລະ ຫົວ ໜ້າລັດຖະບານ
24 ທ່ານ, ຮອງປະທານນາທິບໍດີ ແລະ ຮອງນາຍົກລັດຖະມົນຕີ 13 ທ່ານ ແລະ ລັດຖະມົນຕີຕ່າງປະເທດ 44 ທ່ານ ແລະ ຜູ້ຕາງໜ້າພິເສດຂອງລັດຖະບານອີກຈຳນວນໜຶ່ງ.
ກອງປະຊຸມຄັ້ງນີ້
ໄດ້ດຳເນີນພາຍໃຕ້ຫົວຂໍ້: “ ຮັດແໜ້ນການຮ່ວມມືໃຕ້-ໃຕ້ ເພື່ອສົ່ງເສີມສັນຕິພາບ
ແລະ ຄວາມຈະເລີນຮຸ່ງເຮືອງຂອງໂລກ”, ຊຶ່ງມີຄວາມສອດຄ່ອງກັບສະພາບຄວາມເປັນຈິງຂອງໂລກໃນປັດຈຸບັນ,
ໂດຍສະເພາະການຢ້ຳຄືນເຖິງເນື້ອໃນຈິດໃຈຂອງຖະແຫລງການບັນດຸງ ປີ 1955 ກໍຄືການສ້າງຄວາມສາມາດ ແລະ ຄວາມກຽມພ້ອມເພື່ອສືບຕໍ່ຮ່ວມກັນແກ້ໄຂ ແລະ ຮັບມືກັບບັນຫາ
ແລະ ສິ່ງທ້າທາຍທີ່ພົ້ນເດັ່ນຕ່າງໆ ທີ່ພວມເກີດຂຶ້ນໃນໂລກໃນປັດຈຸບັນ. ໃນກອງປະຊຸມສຸດຍອດຄັ້ງນີ້,
ທ່ານຮອງນາຍົກລັດຖະມົນຕີ
ທອງລຸນ ສີສຸລິດ ໄດ້ຂຶ້ນກ່າວຄຳປາໄສ ໂດຍໄດ້ທົບທວນຄືນສະພາບການເມືອງ ພາກພື້ນ
ແລະ ສາກົນ ທີ່ພົ້ນເດັ່ນຕະຫລອດ 60 ປີທີ່ຜ່ານມາ, ນັບແຕ່ມີການຮັບຮອງເອົາຖະແຫລງການບັນດຸງ ໂດຍສະເພາະສະພາບການເມືອງພາຍໃນຂອງລາວ ພາຍຫລັງທີ່ພັກປະຊາຊົນປະຕິວັດລາວ
ໄດ້ຮັບການສ້າງຕັ້ງຂຶ້ນ
ແລະ ໄດ້ນຳພາປະຊາຊົນລາວບັນດາເຜົ່າຕໍ່ສູ້ເພື່ອຄວາມເປັນເອກະລາດແຫ່ງຊາດ,
ອະທິປະ ໄຕ ແລະ ຜືນແຜ່ນດິນອັນຄົບຖ້ວນຂອງຕົນ. ຕະຫລອດໄລຍະຜ່ານມາ ເນື້ອໃນຈິດໃຈ ຂອງຖະແຫລງການບັນດຸງ ໄດ້ສະທ້ອນໃຫ້ເຫັນຢ່າງຈະແຈ້ງ
ທັງເປັນການປຸກລະດົມ ຈິດໃຈອັນໃຫຍ່ຫລວງ ໃຫ້ແກ່ການປະຕິວັດລາວ ຈົນສາມາດຍາດໄດ້ຜົນສຳເລັດອັນ
ໃຫຍ່ຫລວງ ກໍຄືການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2
ທັນວາ 1975, ເຮັດໃຫ້ປະເທດຊາດມີຄວາມສະຫງົບສະຕິ,
ປະຊາຊົນ ເປັນເຈົ້າຂອງປະເທດຊາດຢ່າງແທ້ຈິງ ແລະ ພົນລະເມືອງລາວທຸກຄົນມີສິດສະເໝີພາບ
ເທົ່າທຽມກັນ ທັງມີໂອກາດໄດ້ພັດທະນາຕົນເອງກ້າວຂຶ້ນ ຄຽງຄູ່ກັບການສ້າງສາພັດທະ ນາປະເທດຊາດ.
ໃນກອງປະຊຸມສຸດຍອດອາຊີ-ອາຟຣິກາຄັ້ງນີ້ ບັນດາຜູ້ນຳທັງສອງ
ທະວີບໄດ້ຮັບຮອງເອົາເອກະສາສຳຄັນ 3 ສະບັບຄື: ຖະແຫລງການບັນດຸງ 2015, ຖະ ແຫລງການວ່າດ້ວຍການເປັນຄູ່ຮ່ວມຍຸດທະສາດໃໝ່
ລະຫວ່າງອາຊີ-ອາຟຣິກາ ແລະ ຖະແຫລງການກ່ຽວກັບປາແລັດສະຕິນ.
ໃນໂອກາດດັ່ງກ່າວນີ້, ຄະນະຜູ້ແທນ ສປປ ລາວ
ໄດ້ມີໂອກາດພົບປະສອງຝ່າຍກັບປະເທດເພື່ອນມິດຈຳນວນໜຶ່ງເຊັ່ນ: ສປ
ຈີນ, ຍີ່ປຸ່ນ, ອິນເດຍ ແລະ ໂຮນລັງ
ເພື່ອເປັນການແລກປ່ຽນທັດສະນະກ່ຽວກັບການພົວພັນ ຮ່ວມມືໃນເວທີສາກົນ ແລະ ການຮ່ວມມືສອງຝ່າຍ.
ກອງປະຊຸມສຸດຍອດອາຊີ-ອາຟຣິກາ ໃນປີ 1955 ຖືເປັນເຫດການສຳຄັນທາງດ້ານປະຫວັດສາດ ແລະ
ການເມືອງຂອງໂລກ, ຊຶ່ງກອງປະຊຸມດັ່ງກ່າວໄດ້ຮັບຮອງເອົາ ຖະແຫລງການບັນດຸງ ທີ່ກຳນົດ 10 ຫລັກການພື້ນຖານ ເພື່ອປົກປັກຮັກສາສັນຕິພາບ
ແລະ ຢູ່ຮ່ວມກັນໂດຍສັນຕິ, ເຊິ່ງໄດ້ກາຍເປັນຫລັກການພື້ນຖານຂອງການພົວພັນ ແລະ ການຮ່ວມມືສາກົນ,
ໂດຍສະເພາະລະຫວ່າງບັນດາປະເທດກຳລັງພັດທະນາ,
ເຊິ່ງນຳມາສູ່ການສ້າງຕັ້ງຂະບວນການບໍ່ຮ່ວມກຸ່ມ ໃນປີ 1961 ແລະ ການຮ່ວມມືໃຕ້-ໃຕ້.
No comments:
Post a Comment