ເນື່ອງໃນໂອກາດໄຂສົກຮຽນໃໝ່ 2015-2016 ຈະມີຂຶ້ນໃນວັນທີ 1 ກັນຍານີ້, ທ່ານ ດຣ.
ພັນຄຳ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາທິການ ແລະ ກິລາ ໄດ້ຕາງໜ້າໃຫ້ພັກ, ລັດຖະບານ ແລະ ໃນນາມການນຳກະຊວງສຶກສາທິການ ແລະ ກິລາ ໄດ້ມີຄຳເຫັນຝາກຄວາມຢື້ຢາມຖາມຂ່າວ, ຄວາມສາມັກຄີຮັກແພງມາຍັງຜູ້ບໍລິຫານການສຶກສາ-ກິລາ, ຄູ-ອາຈານ ແລະ ນັກຮຽນ-ນັກສຶກສາ, ຜູ້ປົກຄອງ ແລະ ພໍ່ແມ່ນັກຮຽນ ໃນຂອບເຂດທົ່ວປະເທດດ້ວຍຄວາມສະໜິດສະໜົມ ແລະ ໄດ້ແນະນຳວ່າ: ເພື່ອໃຫ້ສົກຮຽນໃໝ່ໄດ້ດຳເນີນໄປຢ່າງມີຜົນສຳເລັດ ແລະ ມີຄຸນນະພາບນັ້ນ ຈະຕ້ອງໄດ້ເອົາໃຈໃສ່ປະຕິບັດ 4 ວຽກຈຸດສຸມຄື:
1. ສືບຕໍ່ເສີມຂະຫຍາຍຢ່າງແຂງແຮງຜົນສຳເລັດຂອງການດຳເນີນການປະຕິຮູບລະບົບການສຶກສາ ແລະ ການປັບປຸງວຽກງານກິລາ-ກາຍະກຳໃນສົກຮຽນ 2014-2015 ຜ່ານມາໃຫ້ກວ້າງຂວາງທົ່ວເຖິງ ແລະ ເລິກເຊິ່ງເຖິງຖອງກວ່າເກົ່າ, ສູ້ຊົນຈັດຕັ້ງປະຕິບັດບັນດາຄາດໝາຍທີ່ວາງໄວ້ໃນແຜນພັດທະນາການສຶກສາ ແລະ ກິລາ
ສົກຮຽນ 2015-2016 ເຊິ່ງໄດ້ຮັບຮອງໃນມະຕິກອງປະຊຸມຜູ້ບໍລິຫານການສຶກສາ ແລະ ກິລາທົ່ວປະເທດ ປະຈຳປີ
2015 ເຊິ່ງໄດ້ຈັດຂຶ້ນໃນວັນທີ 23-24 ມິຖຸນາ 2015 ທີ່ນະຄອນຫລວງວຽງຈັນໃຫ້ປາກົດຜົນເປັນຈິງ.
2. ສືບຕໍ່ຈັດສັນຄືນໃໝ່ແຜນທີ່ການສຶກສາໃຫ້ແທດເໝາະກັບລະບົບຕາໜ່າງໂຮງຮຽນຂອງແຕ່ລະຊັ້ນ, ແຕ່ລະສາຍ ໂດຍສະເພາະການຈັດສັນໂຮງຮຽນລ້ຽງເດັກ ແລະ ອະນຸບານ,
ໂຮງຮຽນປະຖົມ ແລະ ມັດທະຍົມສຶກສາ ໃຫ້ຕິດພັນກັບການຈັດສັນພູມລຳເນົາ, ການຈັດສັນບ້ານ, ການໂຮມບ້ານ, ບ້ານ 3 ສ້າງ ເພື່ອເປັນຂໍ້ມູນທີ່ຈະແຈ້ງໃຫ້ແກ່ການກະກຽມກ້າວເຂົ້າສູ່ການປະຕິບັດການສຶກສາພາກບັງຄັບ 9 ປີຮຽນ ທີ່ກຳນົດໃນກົດໝາຍວ່າດ້ວຍການສຶກສາສະບັບປັບປຸງໃໝ່ປີ
2015 ທີ່ຈະປະກາດນຳໃຊ້ໃນບໍ່ດົນນີ້.
3. ຕັ້ງໜ້າປະຕິບັດບັນດານິຕິກຳທີ່ກ່ຽວຂ້ອງກັບຫລັກສູດ, ກ່ຽວກັບການສອນ-ການຮຽນໃຫ້ເປັນຮູບປະທຳ,
ເອົາໃຈໃສ່ເປັນພິເສດຕໍ່ການສອນ-ການຮຽນຂອງຊັ້ນປະຖົມສຶກສາ ໂດຍສືບຕໍ່ປະຕິບັດການເລື່ອນຂັ້ນແບບຕໍ່ເນື່ອງໃຫ້ທົ່ວເຖິງ ແລະ ຖືກຕ້ອງ, ເຂັ້ມງວດຕາມລະບຽບຫລັກການ, ຕັ້ງໜ້າສອນບຳລຸງນັກຮຽນອ່ອນຢ່າງເປັນລະບົບ. ພ້ອມກັນນັ້ນ ກໍຕັ້ງໜ້າສົ່ງເສີມນັກຮຽນເກັ່ງ ແລະ ນັກຮຽນພອນສະຫວັນໃຫ້ແຂງແຮງ, ສືບຕໍ່ເອົາໃຈໃສ່ຈັດການຮຽນ-ການສອນບຳລຸງຍົກລະດັບການສຶກສາຕິດພັນກັບການເຝິກອົບຮົມວິຊາຊີບຂັ້ນພື້ນຖານໃຫ້ປະຊາຊົນບັນດາເຜົ່າມີລະດັບການສຶກສາສູງຂຶ້ນ, ມີອາຊີບໃດໜຶ່ງທີ່ໝັ້ນຄົງ. ປັບປຸງການຮຽນ-ການສອນອາຊີວະສຶກສາ ແລະ ການສຶກສາຊັ້ນສູງ ນັບທັງສາຍສ້າງຄູ
ໂດຍເນັ້ນພາກປະຕິບັດຕົວຈິງ, ການຄົ້ນຄວ້າວິໄຈທາງດ້ານວິທະຍາສາດໃຫ້ຫລາຍຂຶ້ນ.
4. ກະກຽມສະຫລຸບຂະບວນການແຂ່ງຂັນ-ຍ້ອງຍໍການປະຕິບັດ 3 ຂໍ້ແຂ່ງຂັນຂອງຂະແໜງການສຶກສາ ແລະ ກິລາ ຕິດພັນກັບການສະຫລຸບຂະບວນການແຂ່ງຂັນຮັກຊາດ ແລະ ການສະເຫລີມສະຫລອງວັນສຳຄັນຂອງຊາດ ໂດຍສະເພາະວັນຊາດທີ
2 ທັນວາ ຄົບຮອບ
40 ປີ
ແລະ ຄຳນັບຮັບຕ້ອນກອງປະຊຸມໃຫຍ່ຄັ້ງທີ X ຂອງພັກ ແລະ ຄັ້ງທີ
VIII ຂອງອົງຄະນະພັກກະຊວງສຶກສາທິການ ແລະ ກິລາ
ທີ່ຈະເປີດຂຶ້ນໃນບໍ່ດົນນີ້.
ໃນໂອກາດໄຂສົກຮຽນໃໝ່ 2015-2016 ນີ້, ຂ້າພະເຈົ້າ ຂໍຮຽກຮ້ອງມາຍັງຜູ້ບໍລິຫານການສຶກສາ ແລະ ກິລາທຸກຂັ້ນ, ຄູ-ອາຈານສອນທຸກຄົນ ຈົ່ງເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ສູງຂຶ້ນ, ເຄົາລົບ, ນັບຖື ແລະ ປະຕິບັດລະບຽບກົດໝາຍໃຫ້ເຂັ້ມງວດ ແລະ ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ຕ້ານ ແລະ ສະກັດກັ້ນທຸກປາກົດການຫຍໍ້ທໍ້ທີ່ຈະເກີດຂຶ້ນໃນຂະແໜງການສຶກສາ ແລະ ກິລາ, ຜ່ານຜ່າທຸກຄວາມຫຍຸ້ງຍາກ ເພື່ອສຳເລັດໜ້າທີ່ທີ່ໄດ້ຮັບມອບໝາຍ, ຮຽກຮ້ອງເຖິງນັກຮຽນ-ນັກສຶກສາໃນທຸກລະດັບ, ທຸກຂົງເຂດໃນທົ່ວປະເທດຈົ່ງເພີ່ມທະວີຄວາມຮັບຜິດຊອບ ແລະ ຕັ້ງໃຈຄົ້ນຄວ້າຮ່ຳຮຽນດ້ວຍຕົນເອງໃຫ້ຫລາຍຂຶ້ນ, ຮຽນໃຫ້ມີຄວາມຮູ້, ມີຄວາມສາມາດ ແລະ ຮຽນໃຫ້ມີວິຊາຊີບໃດໜຶ່ງທີ່ໝັ້ນຄົງ, ເຝິກຝົນຫລໍ່ຫລອມຕົນເອງໃຫ້ກາຍເປັນນັກຮຽນດີຂອງຄູ-ອາຈານ, ກາຍເປັນລູກຫລານທີ່ດີຂອງພໍ່ແມ່, ປ້າ-ລຸງ, ເປັນພົນລະເມືອງດີຂອງຊາດ ກຽມພ້ອມປະກອບສ່ວນປົກປັກຮັກສາ ແລະ ສ້າງສາປະເທດຊາດອັນແສນຮັກຂອງພວກເຮົາ, ຮຽກຮ້ອງມາຍັງຄອບຄົວ, ຜູ້ປົກຄອງນັກຮຽນ-ນັກສຶກສາ ແລະ ໃນທົ່ວສັງຄົມ ຈົ່ງພ້ອມກັນຊ່ວຍຕັກເຕືອນບອກສອນ, ສຶກສາອົບຮົມໃຫ້ລູກຫລານຂອງຕົນໃຫ້ເອົາໃຈໃສ່ຕໍ່ການສຶກສາຄົ້ນຄວ້າຮ່ຳຮຽນ, ຮູ້ຄຸນຄ່າຂອງຕົນ, ຊຸກຍູ້ສົ່ງເສີມໃຫ້ລູກຫລານທີ່ຢູ່ໃນເກນອາຍຸເຂົ້າຮຽນໄປໂຮງຮຽນ ແລະ ຮຽນຕໍ່ໃຫ້ສູງຂຶ້ນຕາມຄວາມສາມາດຂອງເຂົາເຈົ້າ, ບັນຫາສຳຄັນຮຽນຈົບແລ້ວໃຫ້ມີອາຊີບ, ມີວຽກເຮັດງານທຳ, ມີລາຍຮັບໃຫ້ແກ່ຕົນເອງ ແລະ ຄອບຄົວ,
ຮຽກຮ້ອງເຖິງອົງການຈັດຕັ້ງທຸກພາກສ່ວນ ທັງພາກລັດ ແລະ ພາກເອກະຊົນທັງພາຍໃນ
ແລະ ຕ່າງປະເທດ ຈົ່ງສືບຕໍ່ໃຫ້ການສະໜັບສະໜູນຊ່ວຍເຫລືອການສຶກສາ ແລະ ກິລາ ຖືເອົາການສຶກສາ ແລະ ກິລາເປັນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນໃນທົ່ວສັງຄົມ.
No comments:
Post a Comment