ຄະນະຜູ້ແທນຂອງກະຊວງວິທະຍາສາດ ແລະ
ເຕັກໂນໂລຊີ ນໍາໂດຍທ່ານ ຫຸມພັນ ອິນທະຣາດ ລັດຖະມົນຕີຊ່ວຍວ່າການກະຊວງດັ່ງກ່າວ ໄດ້ເຂົ້າຮ່ວມກອງປະຊຸມລະດັບລັດຖະມົນຕີ
ໂອອີຊີດີ (ອົງການພັດທະນາ ແລະ ສົ່ງເສີມການຮ່ວມມືທາງດ້ານເສດຖະກິດ) ເຊິ່ງຈັດຂຶ້ນໂດຍການເປັນເຈົ້າພາບຂອງກະຊວງວິທະຍາສາດ, ໄອຊີທີ ແລະ
ການວາງແຜນການໃນອະນາຄົດ, ສະຖາບັນນະໂຍບາຍທາງດ້ານວິທະຍາສາດ ແລະ ເຕັກໂນໂລຊີ ແລະ
ໂອອີຊີດີ ສ.ເກົາຫລີ ລະຫວ່າງວັນທີ 19-21 ຕຸລາ 2015
ທີ່ເມືອງເດຈອງ ແລະ ກອງປະຊຸມຄະນະກໍາມະການຮ່ວມ ຄັ້ງທີ 2
ລະຫວ່າງອາຊຽນ-ເກົາຫຼີ ດ້ານວິທະຍາສາດ ແລະ ເຕັກໂນໂລຊີ ແລະ ກອງປະຊຸມອາຊຽນ+3 ລະດັບລັດຖະມົນຕີ ດ້ານວິທະຍາສາດ ແລະ ເຕັກໂນໂລຊີ. ກອງປະຊຸມຄັ້ງນີ້ແມ່ນເປັນ
ເວທີຂອງການປຶກສາຫາລືກ່ຽວກັບບົດບາດຂອງວິທະຍາສາດ,
ເຕັກໂນໂລຊີ ແລະ ນະວັດຕະກໍາ ເຊິ່ງຈະເປັນຕົວຂັບເຄື່ອນທີ່ສໍາຄັນໃຫ້ແກ່ການຂະຫຍາຍຕົວແບບຍືນຍົງ ແລະ ສ້າງຄວາມຜາສຸກຢູ່ໃນສະພາບເງື່ອນໄຂຂອງເສດຖະກິດທີ່ບໍ່ມີຄວາມແນ່ນອນ.
ພ້ອມກັນນັ້ນ, ຍັງຈະໄດ້ປຶກສາຫາລືກ່ຽວກັບການນໍາໃຊ້ວິທະຍາສາດ ແລະ ເຕັກໂນໂລຊີ
ເພື່ອແກ້ໄຂບັນຫາສໍາຄັນຂອງໂລກ ລວມທັງບັນຫາການປ່ຽນແປງອາກາດ, ຄວາມທຸກຍາກ ແລະ
ສິ່ງທ້າທາຍທາງດ້ານສັງຄົມ.
ພ້ອມດຽວກັນນັ້ນ ຍັງມີການຈັດງານວາງສະແດງ ເຊິ່ງມີຜູ້ເຂົ້າຮ່ວມປະມານ 3.000 ກວ່າຄົນ ຈາກ 57 ປະເທດ
ແລະ 12 ອົງການຈັດຕັ້ງສາກົນ ແລະ ຍັງມີການຈັດກອງປະຊຸມວິຊາການ ເພື່ອຖອດຖອນບົດຮຽນ ແລະ ປະສົບການອັນມີຄ່າໃຫ້ແກ່ຜູ້ເຂົ້າຮ່ວມກອງປະຊຸມໃນຄັ້ງນີ້ເຊັ່ນ:
ທ່ານ ໂນໂຍຣິ ຣິວຈິ ຜູ້ໄດ້ຮັບລາງວັນໂນແບນທາງດ້ານເຄມີ ໃນປີ 2001, ທ່ານ ຊີຮາໂນເວິ ສາສະດາຈານທາງດ້ານມະເຮັງ
ຂອງສູນຄົ້ນຊີວະວິທະຍາທາງເສັ້ນເລືອດ, ທ່ານ ເຈເຣມີ ຣິຟກີນ ຜູ້ກໍ່ຕັ້ງກອງທຶນກ່ຽວກັບທ່າອຽງທາງດ້ານເສດຖະກິດ.
ໃນກອງປະຊຸມລະດັບລັດຖະມົນຕີອາຊຽນ+3, ທ່ານລັດຖະມົນຕີຊ່ວຍວ່າການກະຊວງວິທະຍາສາດ ແລະ ເຕັກໂນໂລຊີ ໄດ້ມີຄຳເຫັນຕໍ່ກອງປະຊຸມ ແລະ ໄດ້ເນັ້ນເຖິງຄວາມສໍາຄັນຂອງການຮ່ວມມືລະຫວ່າງພາກລັດ, ມະຫາວິທະຍາໄລ ແລະ
ຂະແໜງການເອກະຊົນໃນການແກ້ໄຂບັນຫາລວມ ແລະ ໄດ້ຊັກຊວນໃຫ້ຜູ້ຕາງໜ້າບັນດາປະເທດສະມາຊິກອາຊຽນໄດ້ໃຫ້ການສະໜັບສະໜູນໃນການຮັບຮອງເອົາຮ່າງແຜນປະຕິບັດງານອາຊຽນ
ແຕ່ປີ 2016-2025 ເຊິ່ງຈະໄດ້ມີການພິຈາລະນາຢູ່ກອງປະຊຸມລະດັບຖະມົນຕີອາຊຽນ
ຄັ້ງທີ 16 ເຊິ່ງຈະຈັດຂຶ້ນໃນວັນທີ 6 ພະຈິກ 2015
ຢູ່ນະຄອນຫຼວງວຽງຈັນ.
No comments:
Post a Comment