ເຈົ້າໜ້າທີ່ມອດໄຟ ນະຄອນຫລວງວຽງຈັນ ໃຫ້ຮູ້ວ່າ: ໃນເວລາທ່ຽງຄືນຂອງວັນທີ
30 ຕຸລາຜ່ານມານີ້, ໄດ້ເກີດເຫດໄຟໄໝ້ເຮືອນວິລາ 3 ຊັ້ນ ຫລັງໜຶ່ງເສຍຫາຍໝົດກ້ຽງ ແລະ
ເຮືອນກໍ່ຊັ້ນດຽວຫລັງຫນຶ່ງໄດ້ຮັບຜົນກະທົບ ຢູ່ບ້ານໜອງບົວທອງໃຕ້ ເມືອງສີໂຄດຕະບອງ ນະຄອນຫລວງວຽງຈັນ ຫລັງຈາກເຈົ້າໜ້າທີ່ໄດ້ຮັບແຈ້ງເຫດຈາກພົນລະເມືອງຜູ້ທີ່ເຫັນເຫດການກໍໄດ້ຮີບນຳລົດນ້ຳຈຳນວນ 2 ຄັນ, ພ້ອມກຳລັງຈຳນວນໜຶ່ງລົງມອດໄຟທີ່ກຳລັງລຸກໄໝ້ຢ່າງແຮງ,ຈົນຜ່ານໄປເກືອບ 1 ຊົ່ວໂມງຈຶ່ງສາມາດຄວບຄຸມໄຟໄວ້ໄດ້ ແລະ ໂຊກດີບໍ່ມີຜູ້ໄດ້ຮັບບາດເຈັບ ແລະ ເສຍຊີວິດ. ພາຍຫລັງສືບສວນ-ສອບສວນ ເຈົ້າໜ້າທີ່ ໃຫ້ຮູ້ວ່າ: ສາເຫດຂອງການເກີດອັກຄີໄພຄັ້ງນີ້ກໍແມ່ນໄຟຟ້າລັດວົງຈອນ, ຍ້ອນການໃຊ້ໄຟເກີນຂະໜາດເປັນເວລາດົນ, ຊຶ່ງຄາດວ່າຈະມີມູນຄ່າເສຍຫາຍຫລາຍຢ່າງໜ້ອຍ 650 ລ້ານກີບ.
ເຈົ້າໜ້າທີ່ ໃຫ້ຮູ້ອີກວ່າ:
ເວລາປະມານ 3 ໂມງເຊົ້າມືດຂອງວັນດຽວກັນ, ກໍໄດ້ເກີດເຫດໄຟໄໝ້ຕຶກອາຄານຂອງທະນາຄານພົງສະຫວັນ ສາຂາໂພນໂຮງ (ຫລັກ 52) ແຂວງວຽງຈັນ, ເຊິ່ງໄດ້ສ້າງຄວາມເສຍຫາຍເປັນຈຳນວນບໍ່ໜ້ອຍ
ເຮັດໃຫ້ເຄື່ອງໃຊ້ໄຟຟ້າ ແລະ ອຸປະກອນຮັບໃຊ້ຫ້ອງການຈຳນວນໜຶ່ງຖືກໄຟໄໝ້, ແຕ່ໂຊກດີສຳລັບຊັບສິນ ແລະ ວັດຖຸມີຄ່າຂອງທະນາຄານບໍ່ໄດ້ຮັບຄວາມເສຍຫາຍແຕ່ຢ່າງໃດ. ສ່ວນສາເຫດ ແລະ ມູນຄ່າເສຍຫາຍ ຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່.
No comments:
Post a Comment