ເຈົ້າໜ້າທີ່ຕໍາຫລວດນະຄອນຫລວງວຽງຈັນ, ໄດ້ອອກມາສະແດງຄວາມຂອບໃຈຕໍ່ມວນຊົນຊາວນະຄອນຫລວງວຽງຈັນ, ທີ່ໄດ້ເປັນເຈົ້າການມີສະຕິລະວັງຕົວຮອບດ້ານໃນການຮັກສາຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພໃນຊ່ວງໄລຍະບຸນອອກພັນສາປະວໍລະນາ
ແລະ ບຸນຊ່ວງເຮືອປະເພນີປະຈໍາປີທີ່ທ່າວັດຈັນ ເມືອງຈັນທະບູລີ ນະຄອນຫລວງວຽງຈັນ ໄດ້ມີບັນຍາກາດຟົດຟື້ນມ່ວນຊື່ນຕາມຮີດຄອງປະເພນີ
ແລະ ວັດທະນາທໍາອັນດີງາມຂອງຊາດ, ທັງຮັບປະກັນໄດ້ຄວາມເປັນລະບຽບຮຽບຮ້ອຍ
ແລະ ສະຫງົບປອດໄພໂດຍພື້ນຖານ, ໂດຍສະເພາະການສັນຈອນໃນເສັ້ນທາງອ້ອມຮອບສະຖານທີ່ຈັດງານບຸນດັ່ງກ່າວມີຄວາມຄ່ອງຕົວ
ແລະ
ການຈອດລົດຂອງຜູ້ທີ່ມາທ່ຽວບຸນກໍມີຄວາມເປັນລະບຽບຕາມຈຸດທີ່ເຈົ້າໜ້າທີ່ໄດ້ຈັດສັນໄວ້, ອັນໄດ້ເຮັດໃຫ້ການສັນຈອນບໍ່ມີຄວາມແອອັດຕິດຂັດເປັນອໍາມະພາດ ແລະ
ສ່ວນອຸປະຕິເຫດບົນທ້ອງຖະໜົນໃນໄລຍະດັ່ງກ່າວກໍເຫັນວ່າຫລຸດລົງຫລາຍເມື່ອທຽບກັບຫລາຍປີຜ່ານມາ. ສ່ວນປາກົດຫຍໍ້ທໍ້ອື່ນໆເຊັ່ນ: ການປຸ້ນຈີ້-ຊິງຊັບ, ຂີ້ລັກງັດແງະ, ກໍມີທ່າອ່ຽງຫລຸດລົງ, ແຕ່ສະເພາະຢູ່ໃນງານບຸນຊ່ວງເຮືອແມ່ນມີການແຫກກະເປົາເກີດຂຶ້ນ 4 ກໍລະນີ, ລັກຈົກກະເປົາ 2 ກໍລະນີ ແລະ
ລັກຊັບເກີດຂຶ້ນ 2 ກໍລະນີ, ມີຊັບສີນ
ເສຍຫາຍຫລາຍກວ່າ
20 ລ້ານກີບ ແລະ
ເຈົ້າໜ້າທີ່ສາມາດຈັບຄົນຮ້າຍທີ່ກໍເຫດມາດໍາເນີນຄະດີຕາມລະບຽບກົດໝາຍໄດ້ຈໍານວນໜຶ່ງ, ຊຶ່ງທັງໝົດນັ້ນແມ່ນຍ້ອນການຍົກສູງສະຕິລະວັງຕົວຂອງປະຊາຊົນໃນການຮ່ວມມືປະຕິບັດລະບຽບກົດໝາຍ
ແລະ ເປັນຫູເປັນຕາຊ່ວຍເຈົ້າໜ້າທີ່ໃນການປ້ອງກັນຄວາມສະຫງົບ, ສົມທົບກັບກໍາລັງເຈົ້າໜ້າທີ່ທຸກພາກສ່ວນໄດ້ເອົາໃຈໃສ່ປະຕິບັດໜ້າທີ່ຢ່າງຫ້າວຫັນ, ໂດຍມີການຈັດຕັ້ງເວນຍາມຕາມຈຸດຕ່າງໆຕະຫລອດ
24 ຊົ່ວໂມງ
ເພື່ອຮັບປະກັນໃຫ້ງານບຸນອອກພັນສາປະວໍລະນາ ແລະ
ບຸນຊ່ວງເຮືອປະເພນີທ່າວັດຈັນປີນີ້ເຕັມໄປດ້ວຍບັນຍາກາດອັນຟົດຟື້ນມ່ວນຊື່ນ,ທັງຮັກສາໄດ້ຮີດຄອງປະເພນີອັນດີງາມຂອງຊາດ
ແລະ ຄວາມເປັນລະບຽບຮຽບຮ້ອຍປອດໄພຂອງສັງຄົມ.
No comments:
Post a Comment