ງານໂຮມຊຸມນຸມໃຫຍ່ເພື່ອສະເຫລີມສະຫລອງວັນຊາດທີ
2 ທັນວາ ຄົບຮອບ 40 ປີ (2/12/1975-2/12/2015) ໄດ້ຈັດຂຶ້ນຢ່າງຄຶກຄື້ນ ແລະ ຍິ່ງໃຫຍ່ຢູ່ສະໜາມຫລວງ
ນະຄອນຫລວງວຽງຈັນ ແຕ່ຮຸ່ງເຊົ້າຂອງວັນທີ 2 ທັນວາ 2015 ນີ້ ໂດຍການເຂົ້າຮ່ວມຂອງທ່ານ
ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ,
ປະທານປະເທດ ແຫ່ງ ສປປ ລາວ, ມີບັນດາທ່ານຜູ້ນຳພັກ-ລັດ, ປະທານສະພາແຫ່ງຊາດ, ນາຍົກລັດຖະມົນຕີ
ພ້ອມນີ້ຍັງມີຄະນະຜູ້ແທນຂັ້ນສູງຈາກປະເທດເພື່ອນມິດເຊັ່ນ: ສປ ຈີນ, ສສ ຫວຽດນາມ,
ຣາຊະອານາຈັກກຳປູເຈຍ ແລະ ຜູ້ຕາງໜ້າປະເທດເພື່ອນມິດອື່ນໆ, ທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນປະຈຳລາວ
ເຂົ້າຮ່ວມເປັນຈຳນວນຫລາຍ ແລະ ພິເສດ ສຳລັບງານມິດຕິງໃຫຍ່ສະເຫລີມສະຫລອງວັນປະຫວັດສາດສຳຄັນດັ່ງກ່າວຄັ້ງນີ້
ຍັງມີຄະນະຜູ້ແທນຄົນເຊື້ອຊາດລາວທີ່ດຳລົງຊີວິດຢູ່ຕ່າງປະເທດຈຳນວນ 200 ກວ່າຄົນ
ຈາກ 20 ປະເທດໃນທົ່ວໂລກ ຄືຝຣັ່ງ, ສ.ອາເມລິກາ, ການາດາ, ອົດສະຕຣາລີ, ແບນຊິກ,
ສະວິດເຊີແລນ, ເຢຍລະມັນ, ຍີ່ປຸ່ນ, ຮົງກາລີ ແລະ ຫລາຍປະເທດອື່ນໆອີກໃນທະວີບເອີຣົບມາຮ່ວມນຳດ້ວຍ.
ໃນງານໂຮມຊຸມນຸມໃຫຍ່ອັນມີຄວາມໝາຍທາງປະຫວັດສາດດັ່ງກ່າວ
ພາຍຫລັງສະຫາຍ ປະທານປະເທດ ຈູມມາລີ ໄຊຍະສອນ ໄດ້ກ່າວສູນທອນພົດ (ຈັດພິມຕ່າງຫາກ)
ທີ່ໄດ້ຍົກໃຫ້ເຫັນຜົນສຳເລັດ ແລະ ໄຊຊະນະທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວຍາດມາໄດ້ໃນພາລະກິດປົກປັກຮັກສາ
ແລະ ສ້າງສາພັດທະນາປະເທດຊາດຕະຫລອດໄລຍະ 40 ປີຜ່ານມາ ເຊິ່ງເປັນໄລຍະທີ່ບໍ່ມີຍຸກໃດ,
ຍຸກສະໄໝໃດທີ່ປະເທດຊາດອັນແສນຮັກຂອງພວກເຮົາໄດ້ມີຄວາມຮົ່ມເຢັນເປັນສຸກ,
ໄດ້ຮັບການພັດທະນາຈະເລີນກ້າວໜ້າ ແລະ ຊື່ສຽງຖານະບົດໄດ້ຮັບການເຊີດຊູສູງເດັ່ນໃນເວທີພາກພື້ນ
ແລະ ສາກົນທໍ່ກັບຍຸກສະໄໝນີ້.
ໃນໂອກາດອັນສະຫງ່າລາສີນີ້,
ສະຫາຍ ປະທານປະເທດ ໄດ້ກ່າວຄວາມອາໄລອາວອນ ແລະ ຈົດຈຳລ້ຳລຶກຄຸນງາມຄວາມດີອັນໃຫຍ່ຫລວງຂອງປະທານໄກສອນ
ພົມວິຫານ ຜູ້ນຳທີ່ເຄົາລົບຮັກຂອງພັກ ແລະ ຂອງຊາດລາວເຮົາ, ສະແດງຄວາມຮູ້ບຸນຄຸນຢ່າງສຸດຊຶ້ງຕໍ່ບັນດາສະຫາຍຜູ້ນຳພັກ-ລັດ,
ບັນດາພະນັກງານ, ນັກຮົບ ແລະ ປະຊາຊົນທຸກເຜົ່າ, ຊັ້ນຄົນຕ່າງໆ ທີ່ໄດ້ເສຍສະລະຊີວິດ
ເພື່ອຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນສັກກາລະບູຊາຂອງຊາດ,
ເພື່ອອິດສະລະພາບ ແລະ ຄວາມຢູ່ດີມີສຸດຂອງປະຊາຊົນບັນດາເຜົ່າຂອງພວກເຮົາ.
ຂໍສະແດງຄວາມຍ້ອງຍໍສັນລະເສີນພີ່ນ້ອງຮ່ວມຊາດທຸກເຜົ່າ, ທຸກຊັ້ນຄົນ, ເພດໄວ
ແລະ ທຸກສາຂາອາຊີບໃນທົ່ວປະເທດ ທີ່ໄດ້ເຊີດຊູນ້ຳໃຈຮັກຊາດ, ຮັກລະບອບໃໝ່,
ສາມັກຄີເປັນອັນໜຶ່ງອັນດຽວກັນຜ່ານຜ່າທຸກຄວາມຍາກລຳບາກ, ອຸທິດສະຕິປັນຍາ,
ກຳລັງວັງຊາ, ທຶນຮອນ ຕະຫລອດເຖິງຍອມເສຍສະລະທຸກສິ່ງທຸກຢ່າງ ເພື່ອຜົນປະໂຫຍດ
ແລະ ໄຊຊະນະຂອງພາລະກິດປົກປັກຮັກສາ ແລະ ສ້າງສາປະເທດຊາດອັນແສນຮັກຂອງພວກເຮົາໃນ
40 ປີຜ່ານມານັ້ນ, ສະແດງຄວາມຂອບອົກຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງຕໍ່ພັກ,
ລັດ ແລະ ປະຊາຊົນບັນດາປະເທດອ້າຍນ້ອງ, ເພື່ອນມິດຜູ້ຢູ່ໃກ້ ແລະ ໄກໃນທົ່ວໂລກ
ກໍຄືອົງການຈັດຕັ້ງສາກົນຕ່າງໆ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫລືອອັນລ້ຳຄ່າແກ່ສາທາລະນະລັດ
ປະຊາທິປະໄຕ ປະຊາຊົນລາວ ຕະຫລອດມາ. ພ້ອມດຽວກັນນີ້, ກໍຂໍສະແດງຄວາມຊົມເຊີຍພີ່ນ້ອງຊາວລາວທີ່ຢູ່ຕ່າງປະເທດທີ່ຍັງມີຈິດໃຈຮັກເຊື້ອແພງຊາດ
ແລະ ໄດ້ອວ່າຍໜ້າມາຫາປະເທດຊາດ, ປະກອບສ່ວນຕາມຄວາມສາມາດຮ່ວມກັບພີ່ນ້ອງຮ່ວມຊາດໃນການພັດທະນາປິຕຸພູມຂອງຕົນ.
ຂໍຊົມເຊີຍຊາວຕ່າງດ້າວທີ່ດຳລົງຊີວິດຢູ່ປະເທດເຮົາທີ່ໄດ້ປະກອບສ່ວນໃນການສ້າງສາພັດທະນາປະເທດຊາດ
ແລະ ເພີ່ມທະວີມິດຕະພາບກັບປະຊາຊົນລາວຂອງພວກເຮົາ.
ໃນບົດສູນທອນພົດຂອງສະຫາຍ
ປະທານປະເທດ ຍັງໄດ້ຍົກໃຫ້ເຫັນວິໄສທັດຂອງລາວແຕ່ນີ້ຮອດປີ 2020, ຕ້ອງສູ້ຊົນສ້າງທຸກເງື່ອນໄຂຍູ້ເສດຖະກິດຂະຫຍາຍຕົວບໍ່ໃຫ້ຫລຸດ
7% ຕໍ່ປີ ດ້ວຍການພັດທະນາຂະແໜງກະສິກຳ-ປ່າໄມ້ ຕິດແໜ້ນກັບອຸດສາຫະກຳ ແລະ ການບໍລິການຢ່າງແຂງແຮງ
ແລະ ມີຈຸດສຸມ, ສ້າງໃຫ້ເກີດໂຄງປະກອບເສດຖະກິດທີ່ມີຄວາມສົມສ່ວນ ແລະ ແທດກັບເງື່ອນໄຂຂອງບໍລິເວນເຂດແຄວ້ນຕ່າງຂອງປະເທດ.
ພ້ອມນີ້ ກໍຕ້ອງເອົາໃຈໃສ່ຂະຫຍາຍວຽກງານສຶກສາ-ວັດທະນະທຳ, ສຸມໃສ່ການສ້າງຊັບພະຍາກອນມະນຸດ,
ສ້າງຄົນລາວໃຫ້ມີການພັດທະນາຮອບດ້ານ, ສືບຕໍ່ປົກປັກຮັກສາ ແລະ ສ້າງສາປະເທດຊາດ
ກໍຄືການດຳເນີນພາລະກິດປ່ຽນແປງໃໝ່ໃຫ້ໄດ້ຮັບຜົນສຳເລັດ, ຍຶດໝັ້ນແນວທາງແຫ່ງການສ້າງສາຍພົວພັນມິດຕະພາບກັບບັນດາປະຊາຊາດ
ແລະ ເປີດກວ້າງການຮ່ວມມືກັບສາກົນ, ກ່ອນອື່ນແມ່ນປະເທດໃກ້ຄຽງ, ປະເທດໃນປະຊາຊົນອາຊຽນ
ແລະ ເປັນເຈົ້າການເຂົ້າຮ່ວມໃນພາລະກິດແຫ່ງການເສີມສ້າງສັນຕິພາບ, ສະຖຽນລະພາບ,
ມິດຕະພາບ ແລະ ການຮ່ວມມືໃນພາກພື້ນອາຊີ-ອາຄະເນ ແລະ ໃນໂລກ.
No comments:
Post a Comment