Ad

Ad

15 December 2015

ຂະບວນຄາລະວານຫວນຄືນຖິ່ນກໍາເນີດ ສປປ ລາວ ເຖິງເມືອງວຽງໄຂແລ້ວ ແລະ ໄດ້ຮັບການຕ້ອນຮັບຢ່າງຄຶກຄື້ນ

ພິທີຕ້ອນຮັບຂະລວນຄາລະວານຕາມຮອຍປະທານ ໄກສອນ ພົມວິຫານ ຫວນຄືນຖິ່ນກໍາເນີດຂອງ ສປປ ລາວ, ໄດ້ຈັດຂຶ້ນຢ່າງຍິ່ງໃຫຍ່ທີ່ເມືອງວຽງໄຊ, ແຂວງຫົວພັນພ້ອມໆກັບການລະນຶກວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 95 ປີ, ໂດຍການເປັນກຽດເຂົ້າຮ່ວມຂອງທ່ານນາຍົກລັດຖະມົນຕີ ທອງສິງ ທໍາມະວົງ, ມີບັນດາລັດຖະມົນຕີ, ເຈົ້າແຂວງ ແລະ ຊາວເມືອງວຽງໄຊ ເຂົ້າຮ່ວມຢ່າງຫລວງຫລາຍ.
ໃນໂອກາດດັ່ງກ່າວ, ທ່ານວັນໄຊແພງຊຸມມາເລຂາພັກແຂວງຫົວພັນໄດ້ກ່າວຄໍາປາໄສຕໍ່ພິທີວ່າ: ການຈັດຂະບວນຄາລະວານຄັ້ງນີ້ແມ່ນມີຄວາມໝາຍ ແລະ ຄວາມສໍາຄັນຢ່າງຍິ່ງທີ່ທົ່ວພັກ ແລະ ທົ່ວປວງ
ຊົນລາວທັງຊາດໄດ້ສະເຫລີມສະຫລອງວັນສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີດ້ວຍບັນຍາກາດຟົດຟື້ນ, ໂດຍສະເພາະຊາວແຂວງຫົວພັນພວກເຮົາກໍໄດ້ດໍາເນີນການສະເຫລີມສະຫລອງວັນປະຫວັດສາດສາຄັນດັ່ງກ່າວຢ່າງຄືກຄື້ນມ່ວນຊື່ນ ແລະ ພິເສດແມ່ນພວກເຮົາພ້ອມຊາວເມືອງວຽງໄຊໄດ້ຄໍານັບຮັບຕ້ອນຂະບວນຄາລະວານຕາມຮອຍປະທານ ໄກສອນ ພົມວິຫານ ແລະ ຫວນກັບຢ້ຽມຢາມຖິ່ນກໍາເນີດຂອງ ສປປ ລາວ ອີກດ້ວຍ.

ທ່ານເລຂາພັກແຂວງຫົວພັນຍົກໃຫ້ເຫັນວ່າ: ດິນແດນທົ່ງນາໄກ່, ເມືອງວຽງໄຊ ເປັນດິນແດນທີ່ສັກກະລະບູຊາ, ອັນເນື່ອງມາຈາກເປັນບ່ອນອາໄສ ແລະ ເຄື່ອນໄຫວຊີ້ນໍາ-ນໍາພາການປະຕິວັດປົດປ່ອຍຊາດຂອງບັນດາທ່ານຜູ້ນໍາປະຕິວັດ, ເປັນບ່ອນເຕົ້າໂຮມຫລໍ່ຫລອມກໍາລັງປະຕິວັດໃຫ້ເຕີບໃຫຍ່ຂະຫຍາຍຕົວ, ສາມາດເຮັດສໍາເລັດພາລະກໍາປົດປ່ອຍຊາດ, ຍາດເອົາເອກະລາດ, ປະກາດສ້າງຕັ້ງ ສປປ ລາວ ຂຶ້ນໃນວັນທີ 2 ທັນວາ 1975 ມາເປັນໄຊຊະນະອັນຍິ່ງໃຫຍ່ໃນປະຫວັດສາດຂອງຊາດລາວທີ່ຫລຸດພົ້ນອອກຈາກແອກຄອບຄອງກົດຂີ່ຂົ່ມເຫັງຂອງຈັກກະພັດຕ່າງດ້າວ ແລະ ກ້າວເຂົ້າສູ່
ສັງກາດໃໝ່, ສັງກາດທີ່ປະຊາຊົນລາວໄດ້ເປັນເຈົ້າຂອງປະເທດຊາດ, ເປັນເຈົ້າຕົນເອງສ້າງສາພັດທະນາປະເທດຊາດໃນເງື່ອນໄຂມີສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ກ້າວຂຶ້ນສູ່ຄວາມວັດທະນາຖາວອນໃຫ້ສົມກັບຄໍາຂະໜານນາມວ່າວຽງໄຊເປັນຖິ່ນກໍາເນີດຂອງ ສປປ ລາວ.

ທ່ານ ວັນໄຊ ແພງຊຸມມາ ຢືນຢັນວ່າ: ພວກເຮົາການນໍາແຂວງຈະສືບຕໍ່ນໍາພາພັດທະນາເມືອງວຽງໄຊໃຫ້ກາຍເປັນແຫລ່ງທ່ອງທ່ຽວທາງປະຫວັດສາດ, ທໍາມະຊາດ ແລະ ວັດທະນາທໍາທີ່ເຕັມໄປດ້ວຍຄວາມເຊື່ອໝັ້ນ ແລະ ອຸດົມການຂອງພັກເພື່ອດຶງດູດເອົາຊາວລາວທັງຊາດ ແລະ ແຂກຕ່າງປະ ເທດເຂົ້າມາທ່ຽວຊົມໃຫ້ນັບມື້ຫລາຍຂຶ້ນ, ໂດຍເນັ້ນໃສ່ໃຫ້ເຂົາເຈົ້າເຫັນເຖິງພາບພົດຂອງການດໍາລົງຊີວິດທີ່ທຸກຍາກລໍາບາກຂອງທ່ານໄກສອນພົມວິຫານ, ທ່ານ ສຸພານຸວົງ ແລະ ທ່ານຜູ້ນໍາອື່ນໆທີ່ຢູ່ຕາມຮ່ອມຜາແລະ ຖໍ້າຕ່າງໆເພື່ອຊີ້ນໍາ-ນໍາພາການປະຕິວັດ, ເພື່ອຊີວິດການເປັນຢູ່ທີ່ດີຂອງປະຊາຊົນ ແລະ ຈະສ້າງດິນແດນປະຫວັດສາດແຫ່ງນີ້ເປັນບ່ອນສຶກສາຮໍ່າຮຽນເອົາບົດຮຽນຍອດຍິ່ງຂອງເພີ່ນ.

No comments:

Post a Comment