ກະຊວງແຮງງານ ແລະ ສະຫວັດດີການສັງຄົມ, ຈະດໍາເນີນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ອາໄສຢູ່ລາວຊຶ່ງຈະເລີ່ມແຕ່ວັນທີ16ທັນວາ 2015ຈົນໄປຮອດໃນວັນທີ 16 ມີນາ 2016 ໃຫ້ສໍາເລັດໃນເປົ້າໝາຍຫລາຍກວ່າ 30
ພັນຄົນ.
ບັນຫາດັ່ງກ່າວໄດ້ມີການຖະແຫລງຂ່າວຢ່າງເປັນທາງການຂອງທ່ານຫົວໜ້າກົມຄຸ້ມຄອງແຮງງານ
ແລະ ສະຫວັດດີການສັງຄົມ ພົງໄຊ ສັກອິນຖາລາດ ໃນວັນທີ
15 ທັນວານີ້ທີ່ໂຮງແຮມແລນມາກ ນະຄອນຫລວງວຽງຈັນ ໂດຍໃຫ້ຮູ້ວ່າ: ເພື່ອເຮັດໃຫ້ສັງຄົມມີຄວາມເປັນ
ລະບຽບຮຽບຮ້ອຍ, ທັງເປັນການປົກປ້ອງສິດ ແລະ ຜົນປະໂຫຍດຂອງແຮງງານເຄື່ອນຍ້າຍ, ສ້າງຄວາມພ້ອມໃນການເຂົ້າເປັນປະຊາຄົມອາຊຽນໃນທ້າຍປີ 2015 ລັດຖະບານຈຶ່ງໄດ້ດໍາເນີນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ຍັງເຄື່ອນໄຫວແບບບໍ່ຖືກຕ້ອງຢູ່ລາວເພື່ອເກັບກໍາຈໍານວນວ່າມີເທົ່າໃດ, ຫລັງຈາກນັ້ນຈະນໍາມາແຍກໃຫ້ເຫັນລັກສະນະການເຄື່ອນໄຫວຂອງເຂົາເຈົ້າເພື່ອມອບໃຫ້ແຕ່ລະຂະແໜງການກ່ຽວຂ້ອງເປັນຜູ້ຄຸ້ມຄອງຕາມລະບຽບການຕໍ່ໄປ.
ທ່ານຫົວໜ້າກົມດັ່ງກ່າວໃຫ້ຮູ້ວ່າ: ສໍາລັບຄ່າຂຶ້ນທະບຽນແມ່ນ 3 ແສນກີບຕໍ່ຄົນຕໍ່ເດືອນ ແລະ ເມື່ອສິ້ນສຸດເວລາກໍານົດໃຫ້ແລ້ວ, ແຕ່ຍັງມີຜູ້ເຄື່ອນໄຫວບໍ່ຖືກຕ້ອງຫລືຍັງມີຜູ້ໃຫ້ຄວາມສະດວກແກ່ກຸ່ມຄົນດັ່ງກ່າວໂດຍບໍ່ມີເຫດຜົນທາງເຈົ້າໜ້າທີ່ກ່ຽວຂ້ອງຈະໄດ້ດໍາເນີນມາດຕະການຕາມລະບຽບກົດໝາຍ, ດັ່ງນັ້ນ ຈຶ່ງຮຽກຮ້ອງມາຍັງທຸກພາກສ່ວນກ່ຽວຂ້ອງ, ໂດຍສະເພາະແມ່ນຜູ້ໃຊ້ແຮງງານ, ຊາວຕ່າງປະເທດລວມທັງປະຊາຊົນລາວຜູ້ໃຫ້ເຊົ່າສະຖານທີ່ເຮັດທຸລະກິດ, ຄ້າຂາຍຫລືສະຖານທີ່ພັກພາອາໄສ, ໃຫ້ເຊົ່າທະບຽນວິສາຫະກິດ ແລະ ໂຄງການຕ່າງໆລວມທັງເຂດເສດຖະກິດພິເສດ ແລະ ເຂດເສດຖະກິດສະເພາະຈົ່ງພ້ອມກັນເຂົ້າຮ່ວມເປັນເຈົ້າການໃຫ້ຖືກຕ້ອງຕາມລະບຽບນໍາກັນ.
No comments:
Post a Comment