ກົດໝາຍວ່າດ້ວຍລັດຖະບານສະບັບປັບປຸງໄດ້ຮັບຮອງຈາກສະມາຊິກສະພາແຫ່ງຊາດຢ່າງເປັນເອກກະສັນໃນຕອນເຊົ້າຂອງວັນທີ
15 ທັນວານີ້, ເຊິ່ງເປັນມື້ທີ 7 ຂອງວາລະດຳເນີນກອງປະຊຸມສະໄໝສາມັນເທື່ອທີ
10 ຂອງສະພາແຫ່ງຊາດຊຸດທີ VII. ທ່ານ ດຣ.
ສອນໄຊ ສີພັນດອນ ລັດຖະມົນຕີ ຫົວໜ້າຫ້ອງວ່າການລັດຖະບານ ໄດ້ສະເໜີວ່າ: ຮ່າງກົດໝາຍວ່າດ້ວຍລັດຖະບານ ປີ
2003 ມີ
8 ໝວດ, 38 ມາດຕາ, ເມື່ອຜ່ານການປັບປຸງໄດ້ປ່ຽນມາເປັນ 8 ໝວດ, 36 ມາດຕາ ໃນນັ້ນ ໄດ້ໂຮມເອົາເນື້ອໃນຂອງ 9 ມາດຕາ ໃນສະບັບປີ 2003 ເຂົ້າເປັນ 4 ມາດຕາ ໃນສະບັບປັບປຸງ ແລະ ເພີ່ມເຂົ້າໃໝ່ 3 ມາດຕາ ໃນຈຳນວນ 36 ມາດຕາ ໄດ້ມີການປັບປຸງ 31 ມາດຕາ ເພື່ອໃຫ້ສ່ອດຄ່ອງກັບສະພາບຄວາມເປັນຈິງຂອງຊາດ, ຄວາມຮຽກຮ້ອງຕ້ອງການໃນການພັດທະນາ ໃນໄລຍະໃໝ່ ແລະ ການເຊື່ອມໂຍງກັບພາກພື້ນ ແລະ ສາກົນໃຫ້ມີຄຸນນະພາບ.
ທ່ານລັດຖະມົນຕີຫົວໜ້າຫ້ອງວ່າການລັດຖະບານ ໄດ້ກ່າວວ່າ: ພາຍຫລັງກົດໝາຍສະບັບນີ້ ໄດ້ຖືກຮັບຮອງ ຈະເປັນບາດກ້າວສໍາຄັນໃນການປະກອບສ່ວນເຂົ້າໃນວຽກງານປັບປຸງລະບົບບໍລິຫານລັດຂອງພວກເຮົາ ໃຫ້ມີຄວາມໜັກແໜ້ນເຂັ້ມແຂງ, ລັດຖະບານ ຈະມີນິຕິກຳທີ່ມີເນື້ອໃນລະອຽດ, ຈະແຈ້ງ ແລະ ຮັດກຸມກວ່າເກົ່າ ເພື່ອເປັນບ່ອນອີງໃນການຈັດຕັ້ງເຄື່ອນໄຫວວຽກງານ ໂດຍມີການເພີ່ມທະວີການແບ່ງງານ, ແບ່ງຄວາມຮັບຜິດຊອບ ແລະ
ປະສານສົມທົບໃນລະບອບແບບແຜນວິທີເຮັດວຽກທີ່ກົມກຽວ ແລະ ຄ່ອງຕົວກວ່າເກົ່າ, ຍົກສູງບົດບາດ ແລະ ຄວາມສາມາດໃນການບໍລິຫານຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ແລະ ບໍລິການປະຊາຊົນໄດ້ດີ, ມີຄວາມສັກສິດ, ປອດໃສ ແລະ ມີປະສິດທິພາບສູງ,
ຮັບປະກັນຄວາມສອດຄ່ອງກັບແນວທາງນະໂຍບາຍຂອງພັກ, ທັງສອດຄ່ອງກັບລັດຖະທຳມະນູນ ແລະ ກົດໝາຍອື່ນໆທີ່ກ່ຽວຂ້ອງ.
ໃນຂະນະດຽວກັນ ທ່ານ
ສົມພັນ ແພງຄຳມີ ປະທານກອງປະຊຸມດັ່ງກ່າວ ຍັງໄດ້ມີຄຳຖາມເຈາະຈີ້ມບາງຄຳຖາມ ຕໍ່ຮ່າງກົດໝາຍດັ່ງກ່າວ ເພື່ອໃຫ້ສະມາຊິກສະພາແຫ່ງຊາດ ໄດ້ມີຄຳເຫັນເພື່ອໃຫ້ກົດໝາຍສະບັບປັບປຸງນີ້ ມີຄວາມໜັກແໜ້ນ, ສົມບູນ ແລະ ຄົບຖ້ວນ ແນໃສ່ຄຸ້ມຄອງການເຄື່ອນໄຫວຂອງວຽກງານລັດຖະບານໃຫ້ສອດຄ່ອງກັບເງື່ອນໄຂການພັດທະນາເສດຖະກິດ-ສັງຄົມ ໃຫ້ເປັນຮູບປະທຳຂຶ້ນກວ່າເກົ່າ.
No comments:
Post a Comment