ໂດຍຕອບສະໜອງຕາມການເຊື້ອເຊີນຂອງ ພະນະທ່ານ
ທອງສິງ ທໍາມະວົງ, ນາຍົກລັດຖະມົນຕີ ແຫ່ງ
ສາທາລະນະລັດ
ປະຊາທິປະໄຕ ປະຊາຊົນລາວ, ພະນະທ່ານ ຮວງ
ກຽວ ອັນ, ນາຍົກລັດຖະມົນຕີ ແຫ່ງ ສາທາລະນະລັດ ເກົາຫລີ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສປປ
ລາວ ຢ່າງເປັນທາງການໃນລະຫວ່າງວັນທີ 13-15 ທັນວານີ້ ພິທີຕ້ອນຮັບຢ່າງເປັນທາງການໄດ້ຈັດຂື້ນຢ່າງສົມກຽດທີ່ ຫ້ອງວ່າການລັດຖະບານໃນວັນທີ 14 ທັນວາ.
ໃນໄລຍະການເຄື່ອນໄຫວຢ້ຽມຢາມ ສປປ
ລາວ ຢ່າງເປັນທາງການພະນະທ່ານນາຍົກລັດຖະມົນຕີ ສ.ເກົາຫລີ
ໄດ້ພົບປະສອງຝ່າຍກັບພະນະທ່ານນາຍົກລັດຖະມົນຕີ ແຫ່ງ ສປປ
ລາວ, ເຂົ້າຢ້ຽມຂໍ່ານັບພະນະທ່ານ ຈູມມາລີ ໄຊຍະສອນ, ປະທານປະເທດ ແລະ
ພະນະທ່ານ ນາງ ປານີ ຢາທໍ່ຕູ, ປະທານສະພາແຫ່ງ
ຊາດ ແຫ່ງ ສປປ ລາວ,
ເຂົ້າຮ່ວມເປັນກຽດໃນງານສຳມະນາວ່າດ້ວຍການເຊື່ອມໂຍງໂຄງການພັດທະນາແບບປະຊາຊົນມີສ່ວນຮ່ວມຂອງ ສ.ເກົາຫລີ ຫຼື ເຊມາອຸນດົງ ກັບວຽກງານສາມສ້າງຂອງ ສປປ ລາວ.
ການຢ້ຽມຢາມດັ່ງກ່າວໄດ້ມີຂື້ນໃນທາມກາງທີ່ສອງປະເທດກຳລັງຈັດຕັ້ງການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ
ລາວ ແລະ ສ.ເກົາຫລີ ຄົບຮອບ
20 ປີ (25 ຕຸລາ 1995 - 25 ຕຸລາ 2015). ການພົບປະຄັ້ງນີ້ທັງສອງຝ່າຍໄດ້ທົບທວນຄືນກ່ຽວກັບການຈັດຕັ້ງປະຕິບັດວຽກງານພົວພັນ ແລະ ຮ່ວມມືສອງຝ່າຍໃນໄລຍະຜ່ານມາ, ເຊິ່ງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ໄດ້ຮັບການສືບຕໍ່ຂະຫຍາຍຢ່າງຕໍ່ເນື່ອງ ຊຶ່ງສະແດງອອກໃນການແລກປ່ຽນການຢ້ຽມຢາມລະດັບສູງ ຊຶ່ງກັນ
ແລະ ກັນຕະຫຼອດມາ,ເຊິ່ງເຫດການທີ່ພົ້ນເດັ່ນແມ່ນການຢ້ຽມຢາມ ສ.ເກົາຫລີ ຢ່າງທາງການ
ຂອງພະນະທ່ານ ຈູມມາລີ
ໄຊຍະສອນ ປະທານປະເທດ
ແຫ່ງ ສປປ ລາວ ເມື່ອປີ 2013 ຜ່ານມາ, ເຊິ່ງຖຶເປັນຂີດໝາຍທີ່ສຳຄັນໃນການຍົກລະດັບການພົວພັນ
ແລະ ການຮ່ວມມື ລະຫວ່າງ ສອງປະເທດ.
ສອງຝ່າຍສະແດງຄວາມເພີ່ງພໍໃຈທີ່ເຫັນວ່າຕະຫຼອດໄລຍະ
20 ປີ ການພົວພັນຂອງສອງປະເທດໄດ້ຮັບການສົ່ງເສີ່ມໃຫ້ມີການເຕີບໃຫຍ່ຂື້ນເລື່ອຍໆ. ນອກຈາກນັ້ນ, ສອງຝ່າຍຕີລາຄາສູງທີ່ເຫັນວ່າການຮ່ວມມືທາງດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວແມ່ນຢູ່ໃນທວງທ່າທີ່ຂະຫຍາຍຕົວໄວພໍສົມຄວນ. ປະຈຸບັນ ສ.ເກົາຫລີ ຈັດຢູ່ໃນອັນດັບ 6 ຂອງຕ່າງປະເທດທີ່ລົງທືນຢູ່ ສປປ ລາວ ລວມມູນຄ່າ 800 ກວ່າລ້ານໂດລາສະຫະລັດ, ປະກອບມີ 257 ໂຄງການ.ໃນປີ 2015 ສອງຝ່າຍສາມາດບັນລຸຕົວເລກການຄ້ານຳກັນໄດ້ 199
ລ້ານ ໂດລາສະຫະລັດ. ໃນນັ້ນ, ສປປ ລາວ
ສົ່ງອອກໄປ ສ.ເກົາຫລີ 12 ລ້ານໂດລາສະຫະລັດ ແລະ ນຳເຂົ້າຈາກ
ສ.ເກົາຫລີ 187 ລ້ານໂດລາສະຫະລັດ,
ສຳລັບການຮ່ວມມືດ້ານການທ່ອງທ່ຽວກໍ່ມີການຂະຫຍາຍຕົວດີເຊິ່ງນັບແຕ່ປີ
2007-2014 ມີຈຳນວນ 292.776 ເທື່ອຄົນ, ສະເພາະໃນປີ 2014 ມີທັງໝົດ
96.085 ຄົນ ແລະ ໃນໄລຍະ
6 ເດືອນຕົ້ນປີ 2015 ມີ 86.088
ຄົນ, ເພີ່ມຂື້ນ
72% ທຽບໃສ່ໄລຍະດຽວກັນຂອງປີ 2014. ອັນສຳຄັນແມ່ນສອງຝ່າຍສະແດງຄວາມເພິ່ງພໍໃຈຕໍ່ຄວາມຄືບໜ້າໃນການຮ່ວມມື ແລະ ຈັດຕັ້ງປະຕິບັດບັນດາໂຄງການຊ່ວຍເຫຼືອລ້າເພື່ອການພັດທະນາຂອງ ສ.ເກົາຫລີ ຢູ່ ສປປ ລາວ, ເຊິ່ງເຫັນໄດ້ວ່າ ສ.ເກົາຫລີ ໄດ້ເອົາໃຈໃສ່ ແລະ ໃຫ້ການຊ່ວຍເຫຼືອເພື່ອການພັດທະນາເສດຖະກິດ-ສັງຄົມຂອງ ສປປ ລາວ
ຕະຫຼອດມາ, ປະຈຸບັນ ສ.ເກົາຫລີ
ຖືເປັນປະເທດອັນດັບຕົ້ນໆຂອງບັນດາປະເທດທີ່ໃຫ້ການຊ່ວຍເຫຼືອແກ່ ສປປ ລາວ ແລະ ການຊ່ວຍເຫຼືອດັ່ງກ່າວນັ້ນແມ່ນໄດ້ເພີ່ມຂື້ນທຸກໆປີ, ສະເລ່ຍ ປະມານປີລະ 10-12 ລ້ານໂດລາສະຫະລັດຕໍ່ປີ. ນອກຈາກການຊ່ວຍເຫຼືອລ້າແລ້ວ ສ.ເກົາຫລີ ຍັງໄດ້ອະນຸມັດເງີນກູ້ຢືມດອກເບ້ຍຕໍ່າໃຫ້ແກ່ລັດຖະບານ ລາວ ເພື່ອນຳໃຊ້ເຂົ້າໃນການຈັດຕັ້ງປະຕິບັດແຜນງານພັດທະນາເສດຖະກິດ-ສັງຄົມແຫ່ງຊາດອີກດ້ວຍ. ໃນໂອກາດຢ້ຽມຢາມຄັ້ງນີ້ ສອງຝ່າຍຍັງໄດ້ເປັນເອກະພາບ ແລະ ລົງນາມເອກະສານຮ່ວມກັນ 2 ສະບັບ ເພື່ອເປັນບ່ອນອີງໃສ່ໃຫ້ແກ່ການພົວພັນຮ່ວມມືໃນຕໍ່ໜ້າເຊັ່ນ: ບົດບັນທຶກຊ່ວຍຈຳວ່າດ້ວຍໂຄງການຊ່ວຍເຫຼືອເພື່ອການພັດທະນາ (ODA) ສຳລັບ ປີ 2016 ລະຫວ່າງ ລັດຖະບານ ສປປ ລາວ ແລະ ລັດຖະບານ ສ.ເກົາຫລີ,
ໂຄງການເງີນກູ້ດອກເບ້ຍຕ່ຳຈາກກອງທຶນຮ່ວມມືເພື່ອການພັດທະນາເສດຖະກິດຂອງ
ສ.ເກົາຫລີ (EDCF) ສຳລັບສົກປີ 2016-2019.
ນອກຈາກນັ້ນແລ້ວ, ທັງສອງຝ່າຍຍັງໄດ້ແລກປ່ຽນຄໍາຄິດຄໍາເຫັນກ່ຽວກັບບັນຫາທີ່ພົ້ນເດັ່ນຂອງສາກົນ ແລະ ພາກພື້ນ
ທີ່ມີຄວາມສົນໃຈຮ່ວມກັນອີກດ້ວຍ.
ສຸດທ້າຍ, ພະນະທ່ານ ທອງສິງ ທໍາມະວົງ, ນາຍົກລັດຖະມົນຕີ
ແຫ່ງ ສປປ ລາວ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ
ກ່າວສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈຕໍ່ການຊ່ວຍເຫຼືອອັນມີປະສິດທິຜົນຂອງລັດຖະບານ
ແລະ ປະຊາຊົນ ສ.ເກົາຫລີ ໃນການພັດທະນາພື້ນຖານໂຄງລ່າງເສດຖະກິດ ແລະ ສັງຄົມຕໍ່ ສປປ
ລາວໃນໄລຍະຜ່ານມາ. ພ້ອມທັງອວຍພອນໃຫ້ ທ່ານນາຍົກລັດຖະມົນຕີ ແຫ່ງ ສ.ເກົາຫລີ ມີພະລານາໄມສົມບູນ, ມີສຸຂະພາບເຂັ້ມແຂງ ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງ.
ໃນຕອນເຊົ້າຂອງ ວັນທີ 15 ທັນວານີ້
ຄະນະໄດ້ເດີນທາງໄປຢ້ຽມຢາມໂຮງໝໍເດັກນ້ອຍ ລາວ-ສ.ເກົາຫລີ,
ເຊິ່ງໂຮງໝໍດັ່ງກ່າວແມ່ນການຊ່ວຍເຫຼືອລ້າຈາກລັດຖະບານ ສ.ເກົາຫລີ,ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານລັດຖະມົນຕີຊ່ວຍວ່າການກະຊວງສາທາລະສຸກ ແຫ່ງ
ສປປ ລາວ ກ່ອນ
ເດີນທາງອອກຈາກ ສປປ ລາວ ເພື່ອເດີນທາງໄປຢ້ຽມຢາມ
ມົງໂກລີ ຢ່າງເປັນທາງການ.
No comments:
Post a Comment