ໃນເດືອນຕຸລາຜ່ານມາໄດ້ມີພະຍາດໂປລິໂອກັບຄືນມາລະບາດຢູ່ແຂວງບໍລິຄຳໄຊ
ແລະ ໄຊສົມບູນ, ພາຍຫຼັງພະຍາດດັ່ງກ່າວໄດ້ຖືກປະກາດດັບສູນໄປແລ້ວເມື່ອປີ
2000 , ດັ່ງນັ້ນເພື່ອເປັນການສະກັດກັ້ນພະຍາດດັ່ງກ່າວບໍ່ໃຫ້ແຜ່ລະບາດອອກສູ່ວົງກ້ວາງ ແລະ ເຮັດໃຫ້ຂະບວນການຢອດຢາ
ແລະ ສັກຢາກັນພະຍາດທີ່ຈະຈັດຂຶ້ນຢູ່ 3 ຮອບໃນຂອບເຂດທົ່ວປະເທດບັນລຸຜົນ, ດັ່ງນັ້ນເມື່ອບໍ່ດົນມານີ້ທ່ານນາຍົກລັດຖະມົນຕີ ຈຶ່ງໄດ້ອອກຄຳສັ່ງໃຫ້ເຈົ້າຄອງນະຄອນຫຼວງວຽງຈັນ ແລະ ບັນດາເຈົ້າແຂວງ, ກະຊວງທີ່ກ່ຽວຂ້ອງ ແລະ ຄະນະກຳມາທິການເພື່ອແມ່ ແລະ ເດັກ, ແນວໂຮມ, ຊາວໜຸ່ມ,ແມ່ຍິງ, ຕະຫຼອດຮອດປະຊາຊົນບັນດາເຜົ່າຈົ່ງເອົາໃຈໃສ່ຕອບໂຕ້ພະຍາດໂປລິໂອ
ແລະ ສົ່ງເສີມການຢອດຢາ-ສັກຢາກັນພະຍາດດັ່ງນີ້: (1) ພາກສ່ວນກ່ຽວຂ້ອງຕ້ອງເປັນເຈົ້າການຈັດຕັ້ງປະຕິບັດວັນຢອດຢາ
ແລະ ສັກຢາກັນພະຍາດ
ແຫງຊາດໃຫ້ບັບລຸຕາມຄາດໝາຍ 100%, ໂດຍການມອບວຽກຢາງລະອຽດໃຫ້ແຕ່ລະພາກສ່ວນຮັບຜິດຊອບຕາມພາລະບົດບາດ ແລະ ໜ້າທີ່ຂອງຕົນ. (2) ພາກ ສ່ວນກ່ຽວຂ້ອງຕະຫຼອດຮອດປະຊາຊົນຈົ່ງອຳນວຍຄວາມສະດວກໃຫ້ແກ່ທີມແພດເພື່ອໄປເຄື່ອນໄຫວຢອດຢາ ແລະ ສັກຢາກັນພະຍາດຢູ່ຂັ້ນບ້ານໂດຍສະເພາະເຂດຫ່າງໄກສອກຫຼີກ, ພ້ອມທັງຊ່ວຍປຸກ ລະດົມປະຊາຊົນໃຫ້ນຳເອົາລູກຫຼານຂອງຕົນມາຢອດຢາ ແລະ ສັກຢາກັນພະຍາດໂປລິໂອຕາມສະຖາທີ່ ແລະ ວັນເວລາທີ່ກຳນົດ.(3) ມອບໃຫ້ຂະແໜງສຶກສາທິການ ແລະ ກິລາຂື້ນບັນຊີເດັກນັກຮຽນທີ່ຢູ່ໃນເກນອາຍຸເປົ້າໝາຍ15 ປີລົງມາສົ່ງໃຫ້ທີມແພດເພື່ອຢອດຢາ ແລະ ສັກຢາກັນພະຍາດ.(4) ໃຫ້ແຕ່ລະພາກສ່ວນເອົາໃຈໃສ່ໂຄສະນາສຸຂະສຶກສາໃຫ້ປະຊາຊົນຢ່າງເປັນປົກກະຕິເພື່ອໃຫ້ປະຊາຊົນເຂົ້າໃຈ ແລະ ເຂົ້າຮ່ວມຂະບວນການຢອດຢາ
ແລະ ສັກຢາກັນພະຍາດ,ຖ້າຫາກມີທ້ອງຖິ່ນໃດມີປະ ຊາຊົນທີ່ບໍ່ໃຫ້ການຮ່ວມມືໃຫ້ອຳນາດການປົກຄອງເປັນເຈົ້າການສຶກສາອົບຮົມ ຫຼື ປະຕິບັດມາດຕະ ການຖ້າຫາກຈຳເປັນ.
ທີມແພດຢອດຢາ ແລະ ສັກຢາກັນພະຍາດໃຫ້ວ່າ: ພະຍາດໂປລິໂອເປັນພະຍາດເປ້ຍລ່ອຍ,ສ່ວນຫຼາຍມັກເກີດໃນເດັກນ້ອຍອາຍຸ
15 ປີລົງມາ, ເປັນພະຍາດທີ່ບໍ່ສາມາດປິ່ນປົວໄດ້, ແຕ່ສາມາດປ້ອງກັນໄດ້ດວຍຢາວັກຊິນ, ພະຍາດດັ່ງກ່າວສາມາດຕິດຕໍ່ໄດ້ໂດຍການກິນເຊື້ອພະຍາດເຂົ້າໄປໂດຍກົງ, ດັ່ງນັ້ນວິທີປ້ອງກັນດີທີ່ສຸດແມ່ນການປະຕິບັດຕາມຫຼັກການສຸຂະອະນາໄມ, ກິດຢູ່ສະອາດ ແລະ ສິ່ງສຳຄັນແມ່ນຕ້ອງໄດ້ຮັບການສັກຢາວັກຊີນຄົບຕາມຈຳນວນ.
No comments:
Post a Comment