ສປປ ລາວ
ສາມາດຄັດເລືອກໄດ້ແລ້ວຕົວແທນ 3 ຄົນ ແລະ ສຳຮອງ 1 ຄົນ ເພື່ອເຂົ້າຮ່ວມການແຂ່ງຂັນຖາມ-ຕອບ
ຄວາມຮູ້ກ່ຽວກັບອາຊຽນລະດັບພາກພື້ນຄັ້ງທີ VII ( 7th Regional ASEAN Quiz ) ເຊິ່ງຈະຂຶ້ນໃນທ້າຍເດືອນສິງຫາ 2016 ນີ້ ທີ່ນະຄອນຫລວງວຽງຈັນ, ຂະນະທີ່ຈຳນວນນັກຮຽນລາວຜູ້ທີ່ໄດ້ຮັບຄັດເລືອກຄັ້ງນີ້
ຕັ້ງຄວາມຫວັງໄວ້ວ່າຈະສູ້ຊົນຍາດເອົາລາງວັນໃດໜຶ່ງ ເພື່ອເປັນຂອງຂວັນໃນນາມເປັນເຈົ້າພາບ.
ເຊິ່ງການແຂ່ງຂັນຄັດເລືອກດັ່ງກ່າວ ໄດ້ມີຂຶ້ນໃນວັນທີ 27 ພຶດສະພາ 2016 ທີ່ ຫໍວັດທະນະທຳແຫ່ງຊາດ ໂດຍໃຫ້ກຽດເຂົ້າຮ່ວມຂອງທ່ານ
ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ
ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ມີນ້ອງນັກຮຽນຈຳນວນ 30 ຄົນຈາກທົ່ວປະເທດເຂົ້າຮ່ວມເພື່ອຄັດເລືອກເອົາຕົວແທນຂອງ
ປະເທດ 3 ຄົນ ແລະ ສຳຮອງ 1 ຄົນ
ເພື່ອໄປແຂ່ງຂັນລະດັບພາກພື້ນຮ່ວມກັບອີກ 9 ປະເທດສະມາຊິກອາຊຽນ ໃນເດືອນສິງຫານີ້.
ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ມີຄຳເຫັນວ່າ: ການແຂ່ງຂັນດັ່ງ ກ່າວຖືເປັນໜຶ່ງໃນຫລາຍໆກິດຈະກຳທີ່ສຳຄັນຂອງອາຊຽນໂດຍມີຈຸດປະສົງແນ່ໃສ່ເພື່ອໂຄສະນາເຜີຍແຜ່, ສົ່ງເສີມນ້ຳໃຈອັນດີງາມ ແລະ ຄວາມສາມັກຄີ
ລະຫວ່າງບັນດາຊາວໜຸ່ມນັກຮຽນ-ນັກສຶກສາອາຊຽນ ໂດຍຜ່ານການແຂ່ງຂັນຖາມ-ຕອບ
ເຊິ່ງຈະເຮັດໃຫ້ມີຄວາມຮັບຮູ້ ເຂົ້າໃຈກ່ຽວກັບຄວາມເປັນມາ ແລະ
ການເຄື່ອນໄຫວພາຍໃນຄອບຄົວອາຊຽນ ລວມທັງວິວັດທະນາການທາງດ້ານປະ ຫວັດສາດ, ສັງຄົມ, ວັດທະນະທຳ, ການເມືອງ ແລະ
ເສດຖະກິດຂອງບັນດາປະເທດພາຍໃນຂົງເຂດອາຊີຕະເວັນອອກສ່ຽງໃຕ້ຂອງພວກເຮົາ.
ໃນການເປັນປະທານໝູນວຽນອາຊຽນ ຂອງສປປ ລາວ ໜຶ່ງໃນບັນດາວຽກທີ່ສຳຄັນຄື
ການຈັດກອງປະຊຸມສຸດຍອດບັນດາຜູ້ນຳອາຊຽນ ໃນເດືອນກັນຍາທີ່ຈະມາເຖິງນີ້
ລວມທັງກອງປະຊຸມຂອງສະພາປະຊາຄົມວັດທະນະທຳ-ສັງຄົມອາຊຽນ ເຊິ່ງແມ່ນໜຶ່ງກອງປະຊຸມລະດັບສູງ
ທີ່ມີຄວາມໝາຍສຳຄັນຫລາຍໃນສາມເສົາຄ້ຳຂອງປະຊາຄົມອາຊຽນ
ໂດຍລັດຖະບານເຮົາໄດ້ມອບໝາຍໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປັນຕົວແທນຕາງໜ້າໃຫ້ທັງໝົດ 14 ຂະແໜງການໃນປີກວັດທະນະທຳ-ສັງຄົມ ຂອງປະເທດເຮົາເປັນເຈົ້າການໃນການເປັນຈຸດປະສານງານຫລັກ
ທັງເປັນເຈົ້າການໃນການກະກຽມ ແລະ ຈັດກອງປະຊຸມດັ່ງກ່າວເປັນຮອບທຳອິດ ທີ່ແຂວງຫລວງພະບາງ
ລະຫວ່າງວັນທີ 1-5 ມິຖຸນາ 2016 ນີ້.
No comments:
Post a Comment