ໂດຍຕອບສະໜອງຕາມການເຊື້ອເຊີນ
ຂອງພະນະທ່ານ ຊິນໂຊະ ອາເບະ,
ນາຍົກລັດຖະມົນຕີ ແຫ່ງ ຍີ່ປຸ່ນ, ໃນຖານະປະເທດເຈົ້າພາບ
ແລະ ປະທານກອງປະຊຸມສຸດຍອດກຸ່ມ ຈີ7. ໃນວັນທີ 26-27 ພຶດສະພານີ້ ທີ່ເມືອງອິເຊະ-ຊິມະ
ປະເທດຍີ່ປຸ່ນ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ
ສປປ ລາວ, ໃນຖານະປະທານໝູນວຽນອາຊຽນ, ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມພົບປະກັບພາຍນອກຂອງກຸ່ມ ຈີ7
ຢ່າງມີຜົນສຳເລັດຄື :
ໃນວັນທີ
27ທ່ານ ນາຍົກລັດຖະມົນຕີ ພ້ອມດ້ວຍຄະນະ
ໄດ້ເຂົ້າຮ່ວມກອງປະຊຸມດັ່ງກ່າວກັບບັນດາປະເທດສະມາຊິກກຸ່ມ ຈີ7 ຄື: ຍີ່ປຸ່ນ, ການາດາ, ຝຣັ່ງ, ເຢຍລະມັນ,
ອີຕາລີ, ອັງກິດ, ສະຫະລັດ
ອາເມລິກາ ແລະ ສະຫະພາບ ເອີຣົບ. ກອງປະຊຸມ
ໄດ້ປຶກສາຫາລື ແລະ ແລກປ່ຽນບົດຮຽນຕ່າງໆກ່ຽວກັບ ການພັດທະນາປະເທດ ແລະ ພາກພື້ນຕ່າງໆ
ເພື່ອຊອກຫາຊ່ອງທາງ ແລະ ມາດຕະການໃນການຊຸກຍູ້ການເຕີບໂຕທາງດ້ານເສດຖະກິດຂອງພາກພື້ນອາຊີ
ກໍຄືການຮ່ວມມືເພື່ອບັນລຸວາລະ 2030 ເພື່ອການພັດທະນາທີ່ຍືນຍົງ
ໂດຍຜ່ານການຊຸກຍູ້ການພັດທະນາພື້ນຖານໂຄງລ່າງທີ່ທັນສະໄໝ ແລະ ການສົ່ງເສີມການເຊື່ອມຈອດ
ໃນຮູບແບບຂະຫຍາຍຕົວທີ່ຍືນຍົງ ແລະ ການສ້າງພື້ນຖານທາງສັງຄົມ
ເພື່ອຮັບມືກັບໄພພິບັດທຳມະຊາດ ໄດ້ທັນການຢູ່ອາຊີ. ນອກນັ້ນ, ກໍຍັງໄດ້ປຶກສາຫາລືບັນຫາການຮັບປະກັນການເປີດກວ້າງ
ແລະ ຄວາມໝັ້ນຄົງໃນທະເລ, ການຮ່ວມມືດ້ານສາທາລະນະສຸກ ແລະ
ວຽກງານແມ່ຍິງນຳອີກ.
ທ່ານນາຍົກ ທອງລຸນ ສີສຸລິດ, ກໍໄດ້ມີຄຳເຫັນຕໍ່ກອງປະຊຸມວ່າ “ປະຊາຄົມເສດຖະກິດອາຊຽນ
ໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນທ້າຍປີ 2015, ເຊິ່ງເປັນເວລາດຽວກັນທີ່ບັນດາປະເທດໃນທົ່ວໂລກພວມສຸມໃສ່ການຈັດຕັ້ງປະຕິບັດວາລະ
2030 ຂອງສະຫະປະຊາຊາດ ເພື່ອການພັດທະນາທີ່ຍືນຍົງ. ຕະຫຼອດໄລຍະເກືອບ 5 ທົດສະວັດ ແຫ່ງ
ການເຕີບໃຫຍ່ຂະຫຍາຍຕົວຂອງອາຊຽນ, ໄດ້ມີຄວາມພະຍາຍາມໃນການກະກຽມຄວາມພ້ອມພື້ນຖານ
ໃນການສ້າງປະຊາຄົມເສດຖະກິດອາຊຽນ, ໂດຍສະເພາະແມ່ນຄວາມພະຍາຍາມໃນການເຊື່ອມໂຍງພາກພື້ນ
ແລະ ສາກົນ. ຢ່າງໃດກໍ່ຕາມ, ບັນຫາທ້າທາຍຕົ້ນຕໍສຳລັບອາຊຽນໃນການບັນລຸເປົ້າໝາຍດັ່ງກ່າວນັ້ນແມ່ນພາຍໃນອາຊຽນ
ຍັງມີຄວາມແຕກໂຕນກັນດ້ານການພັດທະນາ ແລະ ໂຄງລ່າງເສດຖະກິດ ແລະ
ອີກປັດໃຈໜຶ່ງສຳຄັນຕົ້ນຕໍແມ່ນຍ້ອນໂຄງລ່າງພື້ນຖານທີ່ບໍ່ພຽງພໍ ແລະ ບໍ່ໄດ້ມາດຕະຖານ
ອັນເປັນສິ່ງກີດຂວາງຫຼັກໃຫ້ແກ່ການຂະຫຍາຍຕົວທາງດ້ານເສດຖະກິດ, ການຈໍລະຈອນສິນຄ້າ, ການບໍລິການ ແລະ ການລົງທຶນ
ຢູ່ໃນອາຊຽນ.”
ທ່ານນາຍົກ ກ່າວຢໍ້າວ່າ “ລັດຖະບານ ແຫ່ງ ສປປ ລາວ ໄດ້ໃຫ້ຄວາມສຳຄັນຕໍ່ການຮັດແໜ້ນສາຍພົວພັນມິດຕະພາບ
ແລະ ການຮ່ວມມືອັນເປັນມູນເຊື້ອຍາວນານກັບທຸກປະເທດໃນທົ່ວໂລກ, ລວມທັງປະເທດສະມາຊິກກຸ່ມ ຈີ7 ແລະ ຕີລາຄາສູງຕໍ່ການຊ່ວຍເຫຼືອຂອງປະເທດສະມາຊິກຸ່ມ
ຈີ7, ໃນຂອບສອງຝ່າຍ ແລະ ຫຼາຍຝ່າຍ, ໃຫ້ແກ່ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລາວ
ທີ່ອີງໃສ່ເປົ້າໝາຍສະຫັດສະວັດ ເພື່ອການພັດທະນາຂອງສະຫະປະຊາຊາດ, ໂດຍສະເພາະແມ່ນການພັດທະນາຊັບພະຍາກອນມະນຸດໃນດ້ານຕ່າງໆ ແລະ ການພັດທະນາເສດຖະກິດແບບຍຶນຍົງ
ອັນໄດ້ປະກອບສ່ວນອັນສຳຄັນເຂົ້າໃນຄວາມພະຍາຍາມຂອງລາວ ໃນການລົບລ້າງຄວາມທຸກຍາກ ແລະ
ນຳເອົາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາໃນປີ 2020 ແລະ
ສ້າງເງື່ອນໄຂເພື່ອກ້າວເຂົ້າສູ່ການຫັນເປັນອຸດສະຫະກຳ ແລະ ທັນສະໄໝເທື່ອລະກ້າວ.
ໃນຖານະທີ່ເປັນປະເທດດ້ອຍພັດທະນາທີ່ບໍ່ມີຊາຍແດນຕິດທະເລ, ສປປ
ລາວ ຍັງຕ້ອງການການສະໜັບສະໜູນເພີ່ມຂຶ້ນ ທັງທາງດ້ານວິຊາການ ແລະ ທາງດ້ານການເງິນ
ຈາກບັນດາຜູ້ໃຫ້ທຶນສາກົນ ເພື່ອເຮັດໃຫ້ຄວາມໝາຍໝັ້ນ
ໃນການຫັນປ່ຽນປະເທດຈາກທີ່ບໍມີຊາຍແດນຕິດທະເລ ໃຫ້ການເປັນປະເທດເຊື່ອມຕໍ່ ແລະ
ເປັນສູນກາງແຫ່ງເຄືອຂ່າຍຄົມມະນາຄົມຂົນສົ່ງຂອງພາກພື້ນ, ໂດຍສະເພາະໃນການພັດທະນາພື້ນຖານໂຄງລ່າງເຊັ່ນ:
ຖະໜົນຫົນທາງ, ທ່າເຮືອ, ເສັ້ນທາງລົດໄຟ,
ການຂົນສົ່ງທາງອາກາດ ແລະ ອື່ນໆ.”
ນອກຈາກການເຂົ້າຮ່ວມກອງປະຊຸມດັ່ງກ່າວ, ທ່ານນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະກັບ
ທ່ານນາຍົກລັດຖະມົນຕີຍີ່ປຸ່ນ ເພື່ອປຶກສາຫາລື ກ່ຽວກັບ ການຮ່ວມມື ລາວ-ຍີ່ປຸ່ນ
ເຊິ່ງສອງຝ່າຍໄດ້ຕີລາຄາສູງຕໍ່ໝາກຜົນການຮ່ວມມືໃນໄລຍະຜ່ານມາ
ພ້ອມທັງສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອໃຫ້ໜັກແໜ້ນຂຶ້ນກວ່າເກົ່າ.
ນອກຈາກນັ້ນ, ກໍໄດ້ພົບປະສອງຝ່າຍບໍ່ເປັນທາງການ
ກັບທ່ານນາຍົກລັດຖະມົນຕີ ອີຕາລີ ແລະ ນາຍົກລັດຖະມົນຕີ ການາດາ ໃນໄລຍະກອງປະຊຸມ ເພື່ອທັກທາຍແນະນຳຕົວ ແລະ
ທ່ານນາຍົກເຮົາກໍໄດ້ຮັບຄວາມຊົມເຊີຍຕໍ່ການໄດ້ຮັບໜ້າທີ່ເປັນນາຍົກລັດຖະມົນຕີ ສປປ ລາວ ຄົນໃຫມ່.
No comments:
Post a Comment