ລາວສະຫລອງສົ່ງທ້າຍປີເກົ່າ, ຕ້ອນຮັບປີໃໝ່ ຄສ 2017 ຢ່າງຄືກຄື້ນ

          ການສະເຫລີມສະຫລອງສົ່ງທ້າຍປີເກົ່າ 2016 ແລະ ຕ້ອນຮັບປີໃໝ່ 2017 ໄດ້ຈັດຂຶ້ນດ້ວຍບັນຍາກາດຄຶກຄື້ນໃນຄໍ່າຄືນວັນທີ 31 ທັນວາ 2016 ຜ່ານມາຢູ່ສວນປະຕູໄຊ, ນະຄອນຫລວງວຽງຈັນ, ໂດຍມີທ່ານເຈົ້າຄອງນະຄອນຫລວງວຽງຈັນ ສິນລະວົງ ຄຸດໄພທູນ, ພ້ອມດ້ວຍແຂກ ແລະ ມວນຊົນຊາວນະຄອນຫລວງວຽງຈັນເຂົ້າຮ່ວມຢ່າງຫລວງຫລາຍ.

            ໃນໂອກາດອັນຄືກຄື້ນນີ້, ທ່ານເຈົ້າຄອງນະຄອນຫລວງວຽງຈັນ ໄດ້ມີຄໍາເຫັນວ່າ: ປີ 2017 ຂໍໃຫ້ທຸກຄົນໃນຊາດຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ມີຄວາມສຸກສາມັກຄີປອງດອງເປັນຈິດໜຶ່ງໃຈດຽວພ້ອມກັນສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງຍິ່ງໆຂຶ້ນ. ປີ 2016 ຢູ່

ປະເທດເຮົາໄດ້ມີຫລາຍເຫດການປະຫວັດສາດທີ່ສໍາຄັນຂອງພັກ ແລະ ຂອງຊາດຄື: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ, ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ VIII ແລະ ການເລືອກຕັ້ງສະມາຊິກສະພາປະຊາຊົນຂັ້ນແຂວງ (ສສຂ) ເປັນຄັ້ງປະຫວັດສາດຂອງປະເທດ, ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII, ກອງປະຊຸມສຸດຍອດອາຊຽນຄັ້ງທີ 28 ແລະ 29, ການຢ້ຽມຢາມລາວຢ່າງເປັນທາງການຄັ້ງປະຫວັດສາດຂອງປະທານາທິບໍດີສະຫະລັດອາເມລິກາທ່ານ ບາຣັກ ໂອບາມາ ແລະ ເຫດການສໍາຄັນອື່ນໆ, ເຊິ່ງໄດ້ເຮັດໃຫ້ປະເທດເຮົາມີໃບໜ້າໃໝ່ໃນການພັດທະນາຫລາຍດ້ານ, ອັນໄດ້ຊ່ວຍຍົກສູງອິດທິພົນ ແລະ ບົດບາດຂອງຊາດພົ້ນເດັ່ນຂຶ້ນໃນເວທີພາກພື້ນ ແລະ ສາກົນ. ນອກຈາກນີ້ຍັງເຫັນວ່າສັງຄົມມີຄວາມກ້າວໜ້າຫລາຍດ້ານ, ມີຄວາມສະຫງົບໂດຍພື້ນຖານ, ມີຄວາມເປັນລະບຽບຮຽບຮ້ອຍ, ເສດຖະກິດເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ແລະ ໃນປີ 2017 ນີ້ກໍຍິ່ງຈະມີຂະບວນກາສ້າງສາ ແລະ ພັດທະນາໃນຫລາຍໆດ້ານ, ສະນັ້ນ ຈຶ່ງຮຽກຮ້ອງມາຍັງພີ່ນ້ອງຮ່ວມຊາດ ກໍຄືປະຊາຊົນບັນດາ ເຜົ່າ ຈົ່ງເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາຕ່າງໆ ໃຫ້ເປັນຂະບວນຟົດຟື້ນ, ເພື່ອປະກອບສ່ວນຄວາມຮູ້, ຄວາມສາມາດ, ເຫື່ອແຮງກໍາລັງວັງຊາ ກໍຄືຊັບສີນຂອງຕົນເຂົ້າໃນພາລະກິດ

ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າຍິ່ງໆຂຶ້ນ.