ການໂຄສະນາມີສ່ວນສຳຄັນຫລາຍ ຕໍ່ການຜະລິດສິນຄ້າ

ຍຸກໂລກາພິວັດ ຍຸກແຫ່ງການນຳໃຊ້ຂໍໍ້ມູນຂ່າວສານ ເຊິ່ງໂລກທັງໂລກພວມເດີນໜ້າເປີດປະຕູສູ່ພາຍນອກໂດຍໄດ້ມີການເພິ່່່່ງພາກັນຫຼາຍຂຶ້ນ ຫຼື ເວົ້າໄດ້ວ່າ: ຍຸກແຫ່ງການເຊື່ອມໂຍງ ໂດຍການນຳໃຊ້ເທັກໂນໂລຊີ-ຂໍ້ມູນຂ່າວສານເປັນຕົວເຊື່ອມ ແລະ ຂະນະດຽວກັນເສດຖະກິດໂລກ ກໍເດີນຕາມກົນໄກຕະຫຼາດຢ່າງເຕັມຮູບແບບ ເຖິງວ່າຈະມີການແກ້ງແຍ່ງແຂ່ງຂັນກັນຢ່າງອອກໜ້າອອກຕາກໍຕາມ, ແຕ່ຕົວຊີ້ວັດຂອງມັນກໍແມ່ນ “ຍອດຈໍາໜ່າຍສິນຄ້າສູງ” ພວມກາຍເປັນຫົວໃຈຂອງການຕະຫຼາດທີ່ໄດ້ບົ່ງບອກເຖິງຈຸດເດັ່ນ-ຈຸດດ້ອຍໃນການບໍລິຫານ, ການຈັດການ, ການບໍລິການ, ຄຸນນະພາບ-ລາຄາ-ຮູບຮ່າງ... ທຸກຢ່າງຂອງກົນໄກທີ່ຂັບເຄື່ອນເຖິງຜົນ ສຳເລັດ ຫຼື ບໍ່ນັ້ນ ມັນອາດບໍ່ຕັດແຍກອອກຈາກການປະ ຊາສຳພັນ (ໂຄສະນາ), ເຖິງວ່າສິນຄ້າ ຫຼື ຜະລິດຕະພັນຈະດີ, ຈະງາມ, ລາຄາຈະຖືກ ຫລື ແພງ ມັນກໍຂຶ້ນກັບການໂຄສະນາ.

           ເມື່ອເປັນເຊັ່ນນັ້ນ ນັກທຸລະກິດ, ຜູ້ລົງທຶນ, ນັກບໍລິຫານ ແລະຜູ້ປະກອບການຈຳນວນຫຼວງ ຫຼາຍໄດ້ໃຫ້ຄວາມສໍາຄັນ ແລະຢຶດຖືການປະຊາສຳພັນເປັນວຽກງານອັນດັບຕົ້ນ, ເຖິງຈະຕ້ອງຈົກຖົງດຶງກ້ອນເງິນມະຫາສານ ທຸ້ມໃສ່ການໂຄສະນາ ເພາະງານນີ້ເປັນຕົວຊີ້ວັດເຖິງສິນຄ້າຈະ “ ດັງ ຫຼື ດັບ “ ກໍຂຶ້ນກັບການໂຄສະນາ. ໃນຂະນະນີ້ສື່ອອນລາຍ ພວມແຊງໜ້າ ແລະເຂົ້າເຖິງກຸ່ມຄົນຕ່າງໆຢ່າງວ່ອງໄວ ແລະກ້ວາງຂວາງ ເຊິ່ງມີນັກເສດຖະສາດຢືນຢັນວ່າ:  “ ຜົນຜະລິດ ຫຼື ຕົວສິນຄ້າ ປຽບເໝືອນວ່າວ, ການປະຊາສຳພັນ ປຽບເໝືອນລົມ ”. ສະນັ້ນ ທັງສອງພາກສ່ວນແມ່ນຕິດພັນກັນຢ່າງສະໜິດແໜ້ນເໝືອນວ່າວກັບລົມ. ນີ້ເປັນກົດເກນຂອງທຳມະຊາດ ແລະ ເສດຖະສາດ.

              ດ້ານສັງຄົມ ການໂຄສະນາຍິ່ງມີບົດບາດສໍາຄັນຫຼາຍ ເພາະມັນໄດ້ເປັນການບອກເລົ່າກ່າວເຕືອນເຖິງບັນຫາຕ່າງໆໃນທຸກມູມໂລກ ຈະແມ່ນຜົນກະທົບຈາກໄພທໍາມະຊາດ, ການສູ້ຮົບລົບຕີ, ການພັດທະນາຕ່າງໆ. ໃນປີ 2016 ຜ່ານມາ, ສປປ ລາວ ໄດ້ຮັບກຽດເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 28-29 ແລະ ກອງປະຊຸມກ່ຽວຂ້ອງອື່ນໆ ແຕ່ທົ່ວໂລກຈະຮູ້ໄດ້ກໍຍ້ອນມີການນຳສະເໜີຂ່າວຄາວຕ່າງໆ ແລະ ຜູ້ທີ່ບໍລິໂພກຂ່າວກໍສາມາດຊື້-ຂາຍສິນຄ້າໄດ້ ໂດຍສະເພາະຢູ່ຕະຫຼາດຫຼັກຊັບ, ຢູ່ທະນາຄານ ເຖິງຈະຢູ່ໂລກໃດກໍສາມາດຊື້-ຂາຍຜ່ານເຄື່ອງມືທີ່ທັນສະໄໝ. 

ສະນັ້ນ. ການໂຄສະນາມີອິດທິພົນຕໍ່ຊີວິດຂອງຄົນໃນທຸກວັນ ແຕ່ເຮັດຈັ່ງໃດການຮັບເອົາຂໍ້ມູນກໍຕ້ອງມີການກັ່ນກອງຢ່າງຄັກແນ່ ແລະຄົນເຮັດຂ່າວ ຫຼື ໂຟສຂໍ້ມູນ ຕ້ອງມີຈັນຍາບັນ, ເຄົາລົບແນວ ທາງ, ປະຕິບັດລະບຽບກົດໝາຍ ໂດຍສະເພາະກົດໝາຍສື່ມວນຊົນຢ່າງເຂັ້ມງວດ, ການໂຄສະນາສິນຄ້າບາງຊະນິດຢ່າແອບອ້າງສັບພະຄຸນເກີນຈິງ ເຊິ່ງໃນຜ່ານມາເຄີຍພົບຢູ່ສື່ຈຳນວນໜຶ່ງ ຕົວຢ່າງວ່າມີຄຼີນິກບາງແຫ່ງ ສາມາດປິ່່ນປົວໂລກມະເລັງທຸກປະເພດໃຫ້ດີໄດ້, ແຕ່ຕົວຈິງກໍຍັງງົມມືດຢູ່.

                                                                                 # ໂດຍ: ຣັດສະໝີ ດວງສັດຈະ.