ກ່ອນ​ປີ​ໃໝ່ ປກສ ຫີນ​ເຫີບ​ຈັບ​ຜູ້​ຄ້າຂາຍ​ຢາ​ເສບ​ຕິດ​ໄດ້ 1 ຄົນ

     ​ເຈົ້າໜ້າ​ທີ່​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ເມືອງ​ຫີນ​ເຫີບ ​ແຂວງ​ວຽງ​ຈັນ ​ໃຫ້​ຮູ້​ວ່າ: ​ເມື່ອ​ບໍ່​ດົນ​ມານີ້, ກຳລັງ​ເຈົ້າ ໜ້າ​ທີ່​ຂອງ​ຕົນ​ໄດ້​ກັກ​ຕົວ​ນາງ ບົວ​ຮອງ ອາຍຸ 50 ປີ ຢູ່​ບ້ານ​ຫ້ວຍ​ອີ່​ເລີດ ເມືອງ​ຫີນ​​ເຫີບ ​ແຂວງ​ວຽງ​ຈັນ ພ້ອມ​ຂອງ​ກາງ​ຢາ​ບ້າ​ຈຳນວນ 200 ​​ເມັດ, ຜ່ານ​ການ​ສືບສວນ​ຂອງ​ເຈົ້າໜ້າ​ທີ່ຜູ້ກ່ຽວ​ຮັບ​ສາລະ ພາບ​ວ່າ: ຢາ​ບ້າ​ຈຳນວນ​ດັ່ງ ກ່າວ​ຊື້ມາ​ນຳ​ໝູ່​ໃນ​ຂະ​ບວນການ​ຄ້າຂາຍ​ຢາ​ເສບ​ຕິດ​ໃນ​ເຂດ​ເມືອງ​ໂພນ​ໂຮງ ​ແຂວງ​ວຽງ​ຈັນ ​ເພື່ອ​ຈະ​ເອົາ​ມາ​ຂາຍ​ໃຫ້​ຊາວ​ໜຸ່ມ​ພາຍ​ໃນ​ບ້ານ​ຂອງ​ຕົນ, ​ແຕ່​ຖືກ​ເຈົ້າໜ້າ​ທີ່​ຈັບ​ຕົວ​ໄດ້​ກ່ອນ. ​ເຈົ້າໜ້າ​ທີ່​ໃຫ້​ຮູ້​ຕື່ມ​ວ່າ: ຜູ້ກ່ຽວ​ເຄີຍ​ຖືກ​ກັກ​ຕົວ​ມາ​ສຶກສາ​ອົບຮົມ​ແລ້ວ​ໜຶ່ງ​ຄັ້ງ ຍ້ອນ​ມີ​ພຶດຕິ​ກຳ​ຄ້າຂາຍ​ຢາ​ເສບ​ຕິດ, ​ແຕ່​ຍັງ​ບໍ່​ມີ​ຄວາມ​ເຄັດ​ຫລາບ​ຈຶ່ງ​ຖືກ​ເຈົ້າໜ້າ​ທີ່​ກັກ​ຕົວ​ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ.