ເລື່ອງທຳມະດາ ຂອງຄົນບໍ່ທຳ ມະດາ ( ຄໍລຳ ບັນຫາຈານແຍ່ )

ໂດຍ : ວິເສດ ສະແຫວງສຶກສາ

      ບໍ່ຮູ້ວ່າມີຈັກຄົນໄດ້ອ່ານບົດ ຂອງຈານແຍ່ທີ່ເວົ້າເຖິງມາດຕະ ການຂອງທາງການອິນເດຍ ເພື່ອ ກຳຈັດພະຍາດ “ເຂົ້າ ການຊ້າແຕ່ເລີກກ່ອນໂມງ” ມັນເປັນບົດທີ່ ກ່ຽວກັບບັນຫາຢູ່ບ້ານເພິ່ນເມືອງ ທ່ານ ແລະ ກໍມີບາງຄົນວ່າຢູ່ບ້ານ ເຮົາກໍຄວນເປີດບັ້ນ ຮົບຕ້ານພະຍາດຊຳເຮື້ອດັ່ງກ່າວຄືກັນ.

     ສຳລັບມື້ນີ້, ຈານແຍ່ຂໍຕິດປີກ ໃຫ້ທ່ານຜູ້ອ່ານບິນໄປເບິ່ງສະ ພາບການຢູ່ຕ່າງປະເທດ. ເລື່ອງ ຊິວ່ານີ້ແມ່ນກ່ຽວກັບປະ ທານາທິ ບໍດີອິນໂດເນເຊຍ ທີ່ມີນັກຂ່າວ ຫຸ້ມຫໍ່ເຈາະຂ່າວເອົາມາລົງໜັງສື ພິມໜ້າໜຶ່ງຢູ່ເປັນປະຈຳ. ທີ່ເປັນ ແບບນັ້ນກໍເພາະ ວ່າ ທ່ານປະທາ ນາທິບໍດີ ໂຈໂກ ວີໂດໂດ ທີ່ຫາກໍ ຂຶ້ນນັ່ງບັນລັງປະທານາທິບໍດີອິນ ໂດເນເຊຍຫວ່າງສອງເດືອນຜ່ານມາ ໄດ້ມີຂໍ້ລິ ເລີ່ມຫລາຍແນວທີ່ ແປກໆໃໝ່ໆຕ່າງກັບປະທານາທິ ບໍດີຄົນກ່ອນໆ, ແຕ່ຄວາມແປກ ໃໝ່ທັງໝົດທັງປວງລ້ວນແຕ່ ເປັນເລື່ອງທີ່ ທົ່ວສັງຄົມຊື່ນຊົນເຊັ່ນ: ນະໂຍບາຍຂອງທ່ານໃນການຢຸດ ສະໜອງນ້ຳມັນເຊື້ອໄຟລາຄາອຸດ ໜູນໃຫ້ບັນດາເຈົ້າ ຂອງພາຫະນະ ທີ່ມີລາຍຮັບລະດັບປານກາງ, ແຕ່ ໂອກາດດຽວກັນ ກໍໄດ້ສືບຕໍ່ອຸດ ໜູນເງິນ ແລະ ນ້ຳມັນເຊື້ອໄຟໃຫ້ຄອບ ຄົວທຸກຍາກ. ນີ້ສະ ແດງໃຫ້ ເຫັນວ່າ: ທ່ານປະທານາທິບໍດີ ໃຫ້ຄວາມສົນໃຈຊ່ວຍເຫລືອຜູ້ ທຸກຍາກຢ່າງແທ້ຈິງ.

ເລື່ອງທີສອງກ່ຽວກັບທ່ານປະ ທານາທິບໍ ດີທ່ານນີ້ ກໍຄືທ່ານຕ້ອງການໃຫ້ຄົນທັງຫລາຍເອີ້ນຊື່ທ່ານວ່າ: “ໂຈໂກວີ” ແທນຊື່ ແລະ ນາມສະ ກຸນແທ້ “ໂຈໂກ ວີໂດໂດ”. ຊື່ “ໂຈ ໂກວີ” ແມ່ນຄົນຝຣັ່ງຕັ້ງໃຫ້ໃນສະໄໝທ່ານປະທານາທິບໍດີຍັງມີທຸ ລະກິດຂາຍເຟີນີເຈີ. ໃນການຕັ້ງຊື່ ໂຈໂກວີ ນັ້ນ, ຄົນຝຣັ່ງອ້າງວ່າ ເພື່ອໃຫ້ຈື່ງ່າຍ ເພາະຊື່ “ໂຈໂກ” ນີ້ ມີບໍ່ອຶດບໍ່ຢາກຢູ່ອິນ ໂດເນເຊຍ. ດັ່ງນັ້ນ ຄົນຝຣັ່ງທີ່ເປັນລູກຄ້າເຟີ ນີເຈີຈຶ່ງຕື່ມ “ວີ” ເຊິ່ງເປັນຄຳເວົ້າ ຕົ້ນພະຍາງນາມສະກຸນຂອງ ທ່ານປະທາ ນາທິບໍດີເຂົ້າຕື່ມ. ເວົ້າແທ້, ຊື່ “ໂຈໂກວີ” ແມ່ນຊື່ ຫລິ້ນ, ຕັ້ງຂຶ້ນໂດຍຄົນຕ່າງປະ ເທດ, ແຕ່ທ່ານປະທານາທິບໍດີ ບອກວ່າມັກແຮງ.

     ເລື່ອງທີສາມທີ່ຢາກເລົ່ານີ້ ສ່ອງແສງໃຫ້ເຫັນເຖິງຕົວຕົນອັນ ແທ້ຈິງຂອງປະທານາທິບໍດີທີ່ ຊາວອິນໂດເນເຊຍຖືວ່າມີທັດ ສະນະມະຫາຊົນທີ່ສຸດ ຄືໃນອາທິດ ທີສາມເດືອນພະຈິກນີ້, ທ່ານປະ ທານາທິບໍດີ ພ້ອມພັນລະຍາ ໄດ້ ຈົກເງິນສ່ວນຕົວຊື້ປີ້ຍົນ ບິນໄປ ສິງກະໂປ ເພື່ອຮ່ວມພິທີຮັບໃບ ປະກາດຂອງລູກຊາຍຫລ້າຊື່ ທ້າວ ແກຊັງ ປັນກາເຣັບ (Kaesang Pungarep) ຢູ່ໂຮງ ຮຽນ Anglo - Chinese school. ນອກຈາກຈົກເງິນສ່ວນຕົວແລ້ວ, ທ່ານ ແລະ ພັນລະຍາ ຍັງເລືອກ ນັ່ງຊັ້ນປະ ຢັດແບບຄົນໂດຍ ສານ ທົ່ວໆໄປ. ເມື່ອເຂົ້າຮ່ວມງານ, ທ່ານກໍນັ່ງໃນແຖວແຂກທີ່ໄປ, ພ້ອມທັງໄດ້ເວົ້ານົວຫົວມ່ວນກັບ ຖ່າຍຮູບຮ່ວມກັບເພື່ອນໆ ຮ່ວມຫ້ອງຂອງລູກຊາຍ. ແນ່ນອນເມື່ອແຂກຜູ້ໃຫຍ່ລະດັບປະມຸກລັດ ເດີນທາງມາປະເທດຂອງ ຕົນ, ທ່ານນາຍົກ ລີລຽນລຸງ ຂອງ ສິງກະໂປ ກໍໄດ້ສົ່ງລົດຍີ່ຫໍ້ ອໍດີ (Audi) ສີຂາວ ເລກທະບຽນ S-1 (ສຳລັບປະມຸກລັດ) ມາບໍລິການ. ນອກນັ້ນ ຍັງໄດ້ຈັດໃຫ້ມີ ລາຍການປັ້ນເຊົ້າຮ່ວມກັນ ກ່ອນທ່ານ ໂຈໂກວີ ຈະບິນກັບຄືນປະເທດ.

     ສ່ວນລູກຊາຍຊື່ທ້າວ ແກຊັງ ນັ້ນ ກໍເປັນຊາຍໜຸ່ມທີ່ສະໜຽມຄ່ຽມປາກ. ອາຈານທຸກຄົນເວົ້າ ເປັນສຽງດຽວກັນວ່າ: ບໍ່ເຄີຍໄດ້ ຍິນທ້າວ ແກຊັງ ຄຸຍໂມ້ໂອຫັງວ່າ ຕົນເປັນລູກເຈົ້າຄອງນະຄອນຫລວງຈາກາຕາ (ຕຳແໜ່ງທ່ານ ໂຈໂກວີ ກ່ອນເປັນປະທານາ ທິບໍດີ) ແລະ ບໍ່ເຄີຍບອກວ່າ: ພໍ່ຂອງ ຕົນເປັນປະທານາທິບໍດີອິນໂດເນເຊຍຈັກເທື່ອເລີຍ. ທ້າວ ແກຊັງ ບອກຄູ-ອາຈານ ແລະ ເພື່ອນໆ ວ່າ: ພໍ່ຂອງຕົນເປັນນັກທຸລະກິດ (ເຟີນີເຈີ). ອັນນີ້ແມ່ນບົດຮຽນບ້ານເພິ່ນເມືອງທ່ານ ເຊິ່ງພວມ ເປັນຂ່າວເດັ່ນດັງຢູ່ ໃນປັດຈຸບັນ. ບໍ່ແມ່ນເລື່ອງແຍ່ເນີ !.