ງານວາງສະແດງສີນຄ້າລາວ-ໄທ 2015 ໄດ້ຮັບຄວາມສົນໃຈຈາກມວນຊົນ

ງານວາງສະແດງສີນຄ້າລາວ-ໄທ ປະຈຳປີ 2015 ໄດ້ເປີດຂຶ້ນຢ່າງເປັນທາງການ ແຕ່ວັນທີ 6-10 ພຶດສະພາ ນີ້, ຢູ່ສູນການຄ້າລາວໄອເຕັກ ນະຄອນຫລວງວຽງຈັນ, ເຊິ່ງງານປີນີ້ມີຜູ້ປະກອບການຜະລິດສີນຄ້າຂອງລາວເຂົ້າ ຮ່ວມ 19 ຫົວໜ່ວຍ ແລະ ຈາກປະເທດໄທ 224 ຫົວໜ່ວຍ, ໂດຍສີນຄ້າທີ່ນຳມາວາງສະແດງ ແລະຈຳໜ່າຍ ສວນຫລາຍແມ່ນປະເພດເຄື່ອງສຳອາງ, ການຮັກສາສຸຂະພາບ, ອາຫານ, ເຄື່ອງດື່ມ, ເຄື່ອງນຸ່ງຫົ່ມ, ເຟີນີເຈີ ແລະ ເຄື່ອງ ຕົບແຕ່ງພາຍໃນເຮືອນ, ອຸປະກອນການກໍ່ສ້າງ, ກົນຈັກການກະເສດ, ເຄື່ອງໄຟຟ້າ ແລະ ເອເລັກໂຕຣນິກຕ່າງໆ, ໂດຍພາຍຫລັງພິທີເປີດງານຢ່າງເປັນທາງການສຳເລັດ ແລ້ວໃນ ຕອນແລງຂອງມື້ດຽວກັນກໍມີມວນຊົນຊາວນະຄອນ ຫລວງໄດ້ພາກັນຫລັ່ງໄຫລເຂົ້າມາຮ່ວມຊົມງານ ແລະ ຈັບຈ່າຍຊື້ສິນຄ້າ ຢ່າງຫລວງຫລາຍ, ເຊິ່ງຄະນະຮັບຜິດຊອບ ຈັດງານດັ່ງກ່າວໃຫ້ຮູ້ວ່າ: ງານຄັ້ງນີ້ແມ່ນມີຜູ້ປະກອບການຜະລິດສີນຄ້າ ທີ່ມີຄຸນ ນະພາບຂອງທັງສອງປະເທດລາວ-ໄທເຂົ້າມາວາງຈຳໜ່າຍເປັນຈຳນວນຫລາຍ ແລະ ເຫັນວ່າສີນຄ້າຫລາຍປະເພດແມ່ນໄດ້ຮັບ ຄວາມນິຍົມ ຈາກມວນ ຊົນເປັນຢ່າງດີ, ໂດຍສະເພາະແມ່ນສີນຄ້າອຸປະໂພກ-ບໍລິໂພກຕ່າງໆ, ເຊິ່ງຄາດວ່າຈະມີມູນຄ່າການ ຊື້-ຂາຍຫລາຍ ຮ້ອຍລ້ານກີບໃນແຕ່ລະວັນ.

ຫົວໜ້າຫ້ອງການສົ່ງເສີມການຄ້າລະຫວ່າງປະເທດ, ກະຊວງອຸດສະຫະກຳ ແລະ ການຄ້າ ສຸພາພັດ ອ່ອງ ແສງຄຸນ ກ່າວວ່າ: ງານດັ່ງກ່າວນີ້, ຈັດຂຶ້ນໂດຍກົມສົ່ງເສີມ ແລະ ພັດທະນາສີນຄ້າກະຊວງອຸດສະຫະກຳ ແລະ ການ ຄ້າຂອງລາວ ຮ່ວມກັບກົມສົ່ງເສີມການສົ່ງອອກກະຊວງພານິດແຫ່ງຣາຊະອານາຈັກໄທ, ເພື່ອສົ່ງເສີມການຄ້າ, ການ ລົງທຶນ ແລະ ການ ຮ່ວມມືທາງດ້ານທຸລະກິດລະຫວ່າງຜູ້ປະກອບການຂອງສອງປະເທດລາວ-ໄທ ໃຫ້ມີບັນຍາກາດ ຟົດຟື້ນເພື່ອພ້ອມກັນ ສ້າງຄວາມເຂັ້ມແຂງໃຫ້ແກ່ການພັດທະນາເສດຖະກິດຂອງແຕ່ລະປະເທດເຕີບໃຫຍ່ຂະຫຍາຍຕົວສູງຂຶ້ນເປັນລຳດັບ.