ຂັບ​ຂີ່​ປະໝາດເຮັດ​ໃຫ້​ເກີດ​ອຸປະ​ຕິ​ເຫດ​

     ໃນທ້າຍອາທິດຜ່ານມາ, ຢູ່ນະຄອນຫລວງວຽງຈັນມີຜູ້ເສຍຊີວິດ 3 ຄົນຍ້ອນ ຂັບຂີ່ປະໝາດຄື: ໃນເວລາປະມານ 19:30 ໂມງຂອງວັນທີ  8 ພຶດສະພານີ້, ຢູ່ເສັ້ນທາງສີທອງ, ເຂດບ້ານປາກທ້າງ, ເມືອງສີໂຄດຕະບອງ,​ໄດ້ມີອຸປະຕິເຫດ ລົດຈັກຕຳ ກັນ ເຮັດໃຫ້ມີຜູ້ເສຍຊີວິດ 1 ຄົນຄື: ທ້າວ ເອີຍ, ອາຍຸ 26 ປີ, ເປັນ ນັກສຶກສາ, ພັກເຊົາຢູ່ບ້ານໜອງແຕ່ງ, ເມືອງສີໂຄດຕະບອງ, ວັນທີ 9 ພຶດສະພາ ໄດ້ເກີດອຸປະຕິເຫດ 2 ກໍລະນີຄື: ໃນເວລາປະມານ 5:00 ໂມງ, ໄດ້ເກີດເຫດລົດ ໃຫຍ່ໝາຍເລກທະບຽນ ກຕ 5158 ຂັບຂີ່ມາດ້ວຍຄວາມໄວສູງ ພໍມາຮອດຈຸດເກີດເຫດເຊິ່ງເປັນທາງໂຄ້ງ, ເກີດເສຍ ຫລັກພິກປິ້ນຢູ່ຂ້າງທາງ, ເຮັດໃຫ້ຜູ້ຂັບຂີ່ຄື: ທ້າວ ສົມດີ , ອາຍຸ 55 ປີ, ຄ້າຂາຍ, ຢູ່ບ້ານນາ, ເມືອງໄຊທານີ, ເສຍຊີວິດຄາທີ່ ແລະ ອີກກໍລະນີໜຶ່ງ ເກີດຂຶ້ນໃນເວລາປະມານ 2:30 ໂມງ, ຢູ່ຖະໜົນອາຊຽນ, ເຂດບ້ານໜອງດ້ວງ, ເມືອງສີໂຄດຕະບອງ, ໄດ້ເກີດເຫດລົດໃຫຍ່ ໝາຍເລກທະບຽນ ຄຈ 5551 ຂັບຂີ່ດ້ວຍຄວາມໄວສູງ ເສຍຫລັກຕຳເອົາເສົາໄຟຟ້າ ເຮັດໃຫ້ ທ້າວ ພອຍສະໜາ, ອາຍຸ 27 ປີ, ກຳມະກອນ, ຢູ່ບ້ານຮ່ອງຄ້າ ເສຍຊີວິດຄາທີ່.

    ເຈົ້າໜ້າທີ່ໃຫ້ຮູ້ວ່າ: ອຸປະຕິເຫດສ່ວນໃຫຍ່ເກີດຈາກການຂັບຂີ່ແບບປະໝາດ, ບໍ່ເຄົາລົບກົດລະບຽບຈະລາຈອນ, ດື່ມສິ່ງ ມຶນເມົາແລ້ວຂັບຂີ່. 

ໃນອາທິດຜ່ານມານີ້ເຫັນວ່າສະພາບອຸປະຕິເຫດຕາມທ້ອງຖະໜົນຢູ່ໃນນະຄອນຫລວງວຽງຈັນມີທ່າອ່ຽງຫລຸດລົງເມື່ອທຽບກັບອາທິດກ່ອນນີ້ ກໍເນື່ອງຈາກເຈົ້າໜ້າທີ່ໄດ້ເອົາໃຈໃສ່ຄວບຄຸມການຂັບຂີ່ຢ່າງເຂັ້ມງວດ ເຮັດໃຫ້ຜູ້ໃຊ້ລົດໃຊ້ຖະໜົນມີສະຕິໃນການຂັບຂີ່ ແລະ ປະຕິບັດລະບຽບຈະລາຈອນດີຂຶ້ນ.