laophatthananewspaper: ພາກສ່ວນກ່ຽວຂ້ອງຕ້ອງເພີ່ມທະວີການຄວບຄຸມລາຄາສີນຄ້າໃນທ້ອງຕະຫລາດຊ່ວງກຽມສູ່ປີໃໝ່

ຄືດັ່ງຮູ້ນໍາກັນແລ້ວວ່າຊ່ວງໄລຍະນີ້ແມ່ນກຽມສູ່ບັນຍາກາດຂອງການສະຫລອງສົ່ງທ້າຍປີເກົ່າ ແລະ ຕ້ອນຮັບປີໃໝ່ 2016, ຊຶ່ງມີຫລາຍສໍານັກງານ, ອົງການ, ບໍລິສັດ, ຫ້າງຮ້ານ ແລະ ຄອບຄົວຕ່າງໆກໍພວມເຄື່ອນໄຫວເອົາກະຕ່າດອກໄມ້, ຂອງຂວັນ, ຂອງທີ່ລະນຶກເຊັ່ນ: ປະຕິທິນປີໃໝ່ 2016 ໄປມອບໃຫ້ ແລະ ອວຍພອນເຊິ່ງກັນ ແລະ ກັນໃນໂອກາດດັ່ງກ່າວ, ແຕ່ບັນຫາທີ່ຫລາຍຄົນເປັນຫວ່ງໃນຊ່ວງໄລຍະນີ້ກໍແມ່ນການສວຍໂອກາດຂຶ້ນລາຄາສິນຄ້າອຸປະໂພກ-ບໍລິໂພກຂອງບັນດາແມ່ຄ້າຊາວຂາຍໃນທ້ອຕະຫລາດ, ຊຶ່ງຜ່ານການລົງຕິດຕາມກວດກາເບິ່ງລາຄາສີນຄ້າປະເພດຊີ້ນ, ປາ, ໝາກໄມ້ ແລະ ພືດພັກຕ່າງໆຢູ່ຕະຫລາດໃຫຍ່ຫລາຍແຫ່ງໃນນະຄອນຫລວງວຽງຈັນເມື່ອບໍ່ດົນນີ້ປະກົດວ່າເລີ່ມມີການເໜັງຕິງເລັກໜ້ອຍ, ສະນັ້ນ ຖ້າພາກສ່ວນ
ກ່ຽວຂ້ອງຖືເບົາການລົງຕິດຕາມກວດ ກາ ແລະ ຄວບຄຸມລາຄາສີນຄ້າແລ້ວ, ກໍຍິ່ງເປັນຊ່ອງຫວ່າງໃຫ້ບັນດາຊາວຄ້າຂາຍທີ່ຫົວໄສວຍໂອ ກາດຂຶ້ນລາຄາສີນຄ້າແນ່ນອນ, ຊຶ່ງຈະສົ່ງຜົນກະທົບໂດຍກົງຕໍ່ຜູ້ທີ່ມີລາຍຮັບຕໍ່າຢ່າງຫລີກລ້ຽງບໍ່ໄດ້.

ແນວໃດກໍຕາມ, ເພື່ອຮັບປະກັນໃຫ້ຜູ້ບໍລິໂພກໄດ້ຮັບຄວາມເປັນທຳ, ທາງດ້ານລາຄາ, ປະລິມານ ແລະຄຸນນະພາບ ແລະ ປະຕິບັດຕາມພາລະບົດບາດຂອງຂະແໜງອຸດສາຫະກຳ ແລະ ການຄ້າໃນການຄຸ້ມຄອງລາຄາສິນຄ້າ, ໂດຍສະເພາະແມ່ນສິນຄ້າບໍລິໂພກເຊັ່ນ: ຊິ້ນ, ປາ ແລະ ພືດຜັກຕ່າງໆ, ຫຼີກເວັ້ນການສວຍໂອກາດເຮັດໃຫ້ປະຊາຊົນໄດ້ຮັບຄວາມເປັນທຳ, ຮັບປະກັນໃຫ້ການສະໜອງພຽງພໍກັບຄວາມຕ້ອງການດັ່ງນັ້ນ, ລັດຖະມົນຕີວ່າກນກະຊວງອຸດສາຫະກຳ ແລະ ການຄ້າຈຶ່ງໄດ້ອອກແຈ້ງການສະບັບເລກທີ່ 2402/ອຄ.ຄພນ, ລົງວັນທີ 2 ທັນວາ 2015 ນີ້ໂດຍນັ້ນໃຫ້ພະແນກອຸດສາຫະກຳແຂວງ, ນະຄອນລວງ ແລະ ພາກສ່ວນກ່ຽວຂ້ອງເພີ່ມທະວີການປະສານສົມທົບກັນຈັດຕັ້ງປະຕິບັດການຄຸ້ມຄອງລາຄາສິນຄ້າທີ່ມີຜົນກະທົບໄວຕໍ່ການດຳລົງຊີວິດປະຈຳວັນຂອງປະຊາຊົນ, ບົນພື້ນຖານຄວາມເປັນເອກະພາບ ແລະ ການຮ່ວມມືກັນ, ເພື່ອຮັບປະກັນການສະໜອງໃຫ້ພຽງພໍກັບຄວາມຕ້ອງການ, ຫຼີກເວັ້ນການສວຍໂອກາດກັກຕຸນສິນຄ້າ, ຂຶ້ນລາຄາເພື່ອເກງກຳໄລ. ພ້ອມທັງຄຸ້ມຄອງລາຄາສິນຄ້າປະເພດຊີ້ນ, ປາ ແລະ ພືກຜັກຕ່າງໆຢູ່ບັນດາແຂວງ ແລະ ນະຄອນຫຼວງໃຫ້ໄປຕາມກົນໄກຕະຫຼາດໃນແຕ່ລະໄລຍະ, ທັງນີ້ໃຫ້ຄິດໄລໂຄງປະກອບລາຄາໃນແຕ່ລະຂອດຢ່າງຈະແຈ້ງ, ສະເພາະສິນຄ້າປະເພດຊິ້ນແມ່ນໃຫ້ເອົາໃຈໃສ່ຄຸ້ມຄອງຂອດຂາຍຍົກ ແລະ ຂາຍຍ່ອຍ, ສ່ວນປະເທດເພດຜັກ ແລະ ສະບຽງອາຫານຕ່າງໆແມ່ນໃຫ້ເອົາໃຈໃສ່ຕິດຕາມຂອດເກັບຊື້ຈາກກະສິກອນ ແລະ ຂອດຂາຍຍ່ອຍຫຼີກເວັ້ນປັດໄຈສວຍໂອກາດ, ໃຫ້ພາກສ່ວນກ່ຽວຂ້ອງເປັນເຈົ້າການຕິດຕາມ, ກວດກາ ແລະ ຄຸ້ມຄອງຢ່າງເປັນປະຈຳໃນທ້ອງຕະຫຼາດຫຼັກພາຍໃນທ້ອງຖິ່ນຂອງຕົນ, ດ້ວຍການແຕ່ງຕັ້ງພະນັກງານໜູນວຽນການລົງໄປສົມທົບກັບຫ້ອງການອຸດສາຫະກຳ ແລະ ການຄ້າເມືອງ, ຄະນະຄຸ້ມຄອງ ແລະ ຈັດສັນຕະຫຼາດ, ເພື່ອພ້ອມກັນປະຕິບັດຕາມລະບຽບຢ່າງເຂ້ມງວດ, ພ້ອມທັງເປັນເຈົ້າການເຜີຍແຜ່ ແລະ ຊີ້ນຳຜູ້ປະກອບການໃຫ້ເຂົ້າໃຈຕໍ່ແນວທາງນະໂຍບາຍ ແລະ ລະບຽບການທີ່ລັດວາງອອກໃນແຕ່ລະໄລຍະ, ໂດຍສະເພາະແມ່ນການຕິດລາຄາສິນຄ້າເປັນເງິນກີບເພື່ອຄວາມສະດວກ ແລະ ເປັນການຊຸກຍູ້ໃຫ້ຜູ້ປະກອບການສະໜອງສິນຄ້າປະເພດສະບຽງອາຫານທີ່ຈຳເປັນໃຫ້ພຽງພໍກັບຄວາມຕ້ອງການໃນແຕ່ລະໄລຍະ, ໂດຍສະເພາະແມ່ນໄລຍະເທດສະການງານບຸນຕ່າງໆ. ພ້ອມນັ້ນກໍໃຫ້ຂະແໜງອຸດສາຫະກຳ ແລະ ການຄ້າປະສານສົມທົບກັບຂະແໜງການທີ່ກ່ຽວຂ້ອງເພື່ອຄົ້ນຄ້ວາແກ້ໄຂບັນຫາຕ່າງໆກ່ຽວກັບການຄຸ້ມຄອງລາຄາສິນຄ້າທີ່ເກີດຂຶ້ນຢູ່ພາຍໃນແຂວງຂອງຕົນດ້ວຍຄວາມຮັບຜິດຊອບສູງແລ້ວລາຍງານຜົນການຈັດຕັັ້ງປະຕິບັດຂອງຕົນຕໍ່ກະຊວງ, ເພື່ອເປັນຂໍ້ມູນຄົ້ນຄ້ວາ ແລະ ປັບປຸງລະບຽບການຕ່າງໆໃຫ້ແທດເໝາະກັບການປ່ຽນແປງຂອງສະພາບເສດຖະກິດໃນແຕ່ລະໄລຍະ.