laophatthananewspaper: ທິດທາງຂອງພັກເພື່ອພັດທະນາຂົງເຂດວັດທະນາທໍາ-ສັງຄົມໃນໄລຍະໃໝ່

ພັກໄດ້ກໍານົດທິດທາງວ່າ: ໃນຊຸມປີຕໍ່ໜ້ານີ້, ພວກເຮົາຕ້ອງຖືເອົາການພັດທະນາຊັບພະ ຍາກອນມະນຸດເປັນປັດໄຈຕົ້ນຕໍເພື່ອຍົກລະດັບກຳລັງການຜະລິດ ແລະ ການສ້າງເສດຖະກິດ, ໃນນັ້ນຖືຄົນເປັນເປົ້າໝາຍ ແລະ ຈຸດສຸມຂອງການພັດທະນາຕາມ 3 ລັກສະນະ ແລະ 5 ຫລັກມູນຂອງການສຶກສາແຫ່ງຊາດໃຫ້ມີຄຸນນະພາບຕາມມາດຕະຖານຂອງພາກພື້ນ, ສາກົນ ແລະ ທັນສະໄໝ ເພື່ອສ້າງຄົນລາວໃຫ້ເປັນພົນລະເມືອງດີ, ມີຄວາມຮັບຜິດຊອບຕໍ່ສັງຄົມ, ຕໍ່ພັນທະພົນລະເມືອງ, ມີສະຕິເຄົາລົບກົດໝາຍ, ຮັກອັນດີອັນຖືກຕ້ອງ. ພ້ອມກັນນັ້ນກໍເດັດດ່ຽວຕ້ານອັນຫຍໍ້ທໍ້, ຫລ້າຫລັງ ແລະ ທັດສະນະຜິດເຂວຕ່າງໆ, ການເສື່ອມຖອຍດ້ານຄຸນສົມບັດ, ມີລະດັບການສຶກສາ, ມີຄວາມຮູ້ດ້ານອາຊີບ ແລະ ມີສີມືການອອກແຮງງານເພີ່ມຂຶ້ນ, ມີຄວາມສາມາດປະດິດສ້າງ ແລະ ນຳໃຊ້ວິທະຍາ ສາດ-ເຕັກໂນໂລຊີທີ່ທັນສະໄໝ ໂດຍສະເພາະແມ່ນການພັດທະນາລະບົບເຕັກໂນໂລຊີຂ່າວສານ ແລະ ການສື່ສານ (ICT), ມີພາລະນາໄມສົມບູນ ແລະ ມີຄວາມສີວິໄລທາງດ້ານຈິດໃຈ ເພື່ອພັດທະນາປະເທດຊາດໃຫ້ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ.

ສືບຕໍ່ຍຶດໝັ້ນການປະຕິບັດນະໂຍບາຍສາທາລະນະສຸກທົ່ວປວງຊົນຕາມທິດຖືເອົາການອະນາໄມ, ກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ຖືເອົາການປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທຳ ແລະ ສະເໝີພາບເປັນສຳຄັນ. ປະຕິຮູບສາທາລະນະສຸກຢ່າງຮອບດ້ານ, ສ້າງລະບົບບໍລິການສຸຂະພາບທີ່ດີທີ່ຖືເອົາຄົນເປັນໃຈກາງໂດຍໃຫ້ບໍລິການທີ່ມີຄຸນນະພາບ, ມີຈັນຍາທຳ, ເອົາໃຈໃສ່ດູແລນັບທັງຮ່າງກາຍ, ຈິດໃຈ ແລະ ສິ່ງແວດລ້ອມ, ສ້າງລະບົບການປົກປ້ອງສັງຄົມດ້ານສຸຂະພາບທີ່ທົ່ວເຖິງ ເພື່ອເຮັດໃຫ້ສັງຄົມເຂັ້ມແຂງ ແລະ ຊ່ວຍເຫລືອເຊິ່ງກັນ ແລະ ກັນດ້ວຍຫລັກປະກັນສຸຂະພາບທົ່ວປວງຊົນທີ່ປົກປ້ອງທຸກຄົນທັງໃນດ້ານກັນພະຍາດ, ສົ່ງເສີມສຸຂະພາບ ແລະ ດ້ານການປິ່ນປົວເຮັດໃຫ້ປະຊາຊົນມີສຸຂະພາບດີນັບແຕ່ເດັກຢູ່ໃນທ້ອງຈົນເຖິງຜູ້ອາຍຸສູງ ໂດຍເນັ້ນໃສ່ການສ້າງຮາກຖານທີ່ເຂັ້ມແຂງຈາກແບບແຜນການດຳລົງຊີວິດທີ່ປັດສະຈາກປັດໄຈສ່ຽງຕໍ່ສຸຂະພາບ ແລະ ສ້າງຈິດສຳນຶກເປັນເຈົ້າການໃນການຮັກສາສຸຂະພາບຂອງຕົນເອງ,ຄອບຄົວ ແລະ ຊຸມຊົນ.

ພັດທະນາວຽກງານຖະແຫລງຂ່າວ ແລະ ວັດທະນະທຳ ຕາມທິດຫັນໄປສູ່ຄຸນນະພາບ ແລະ ທັນສະໄໝເທື່ອລະກ້າວ, ເປັນກະບອກສຽງອັນແຫລມຄົມຂອງພັກ-ລັດ, ເປັນເວທີສະແດງຄວາມຮຽກຮ້ອງຕ້ອງການຂອງປະຊາຊົນ, ຊຸກຍູ້ສົ່ງເສີມການອະນຸລັກ, ປົກປັກຮັກສາ, ຟື້ນຟູ, ສືບທອດ, ເສີມຂະຫຍາຍມູນເຊື້ອ ແລະ ຄຸນຄ່າມໍລະດົກວັດທະນະທຳທີ່ເປັນເອກະລັກຂອງຊາດໃຫ້ຍືນຍົງ, ສ້າງແບບແຜນດຳລົງຊີວິດວັດທະນະທຳໃໝ່, ພັດທະນາອະລິຍະທຳທາງດ້ານຈິດໃຈຂອງສັງຄົມ ພ້ອມທັງຮັບເອົາຄຸນຄ່າວັດທະນະທຳທີ່ກ້າວໜ້າ ແລະ ສອດຄ່ອງກັບຍຸກສະໄໝຢ່າງມີການເລືອກເຟັ້ນ, ຕ້ານວັດທະນະທຳທີ່ເສື່ອມຊາມ, ການເຊື່ອຖືງົມງວາຍ ແລະ ຫລ້າຫລັງ, ຍູ້ຂະບວນການສ້າງຄອບຄົວ ແລະ ບ້ານວັດທະນະທຳໃຫ້ກາຍເປັນຂອງທົ່ວປວງຊົນ, ແກ້ໄຂຄວາມແຕກຕ່າງກ່ຽວກັບການຊົມໃຊ້ວັດທະນະທຳລະຫວ່າງຕົວເມືອງກັບຊົນນະບົດ; ສົ່ງເສີມການປະດິດສ້າງດ້ານວັດທະນະທຳ ແລະ ການປະດິດຄິດແຕ່ງຕ່າງໆ ແນໃສ່ພັດທະນາຜະລິດຕະພັນວັດທະນະທຳໃຫ້ມີຄວາມອຸດົມສົມບູນ,ຫລາກຫລາຍຮູບແບບ ແລະ ມີຄຸນນະພາບ. ສືບຕໍ່ພັດທະນາການທ່ອງທ່ຽວໃຫ້ກາຍເປັນອຸດສາຫະກຳທ່ອງທ່ຽວທີ່ມີເອກະລັກສະເພາະຂອງເຮົາເພື່ອໃຫ້ກາຍເປັນຂະແໜງເສດຖະກິດສຳຄັນຂອງຊາດ ແລະ ເປັນສ່ວນປະກອບສຳຄັນຂອງການທ່ອງທ່ຽວອາຊຽນ ແລະ ຂອງໂລກ.

ບົນຈິດໃຈເພີ່ມທະວີການຄຸ້ມຄອງສັງຄົມຢ່າງປະດິດສ້າງນັ້ນ ຕ້ອງວາງນະໂຍບາຍແກ້ໄຂການພົວພັນສັງຄົມຢ່າງສອດຄ່ອງ, ແກ້ໄຂການຜິດໂຕນກັນທາງດ້ານການພັດທະນາລະຫວ່າງບໍລິເວນເຂດແຄວ້ນຕ່າງໆ, ສ້າງໂຄງປະກອບສັງຄົມ (ຊັ້ນຄົນ, ສາຂາວິຊາຊີບຕ່າງໆ) ໃຫ້ສົມສ່ວນ, ສະກັດກັ້ນການກໍ່ອາດຊະຍາກຳ ແລະ ປາກົດການຫຍໍ້ທໍ້ໃນສັງຄົມໃຫ້ຫລຸດໜ້ອຍຖອຍລົງຢ່າງຈະແຈ້ງ. ເອົາໃຈໃສ່ແກ້ໄຂວຽກເຮັດງານທຳໃຫ້ດີຂຶ້ນ, ບຸກທະລຸເຂົ້າໃສ່ການພັດທະນາສີມືແຮງງານລາວໃຫ້ໄດ້ທັງປະລິມານ ແລະ ມີຄຸນນະພາບໄປຕາມທິດສ້າງຄົນລາວໃຫ້ກາຍເປັນເຈົ້າຂອງກິດຈະການເທື່ອລະກ້າວ ແລະ ການຫັນເປັນອຸດສາຫະກຳ ແລະ ທັນສະໄໝ, ສາມາດແຂ່ງຂັນ ແລະ ເຊື່ອມໂຍງກັບພາກພື້ນ ແລະ ສາກົນ, ສອດຄ່ອງກັບຄວາມຕ້ອງການຂອງການພັດທະນາເສດຖະກິດ-ສັງຄົມ. ພັດທະນາລະບົບປະກັນສັງຄົມແຫ່ງຊາດໃຫ້ມີຄວາມເຂັ້ມແຂງ, ມີຄວາມຄ່ອງຕົວດ້ວຍການຫັນເປັນທັນສະໄໝ ແລະ ຮັບປະກັນຄວາມວ່ອງໄວ, ໂປ່ງໃສ, ຍຸຕິທຳ ແລະ ຍືນຍົງ. ສືບຕໍ່ປະຕິບັດນະໂຍບາຍດ້ານສະ ຫວັດດີການສັງຄົມຢ່າງຕັ້ງໜ້າເພື່ອສະແດງຄວາມກະຕັນຍູຮູ້ບຸນຄຸນຕໍ່ພະນັກງານປະຕິວັດອາວຸໂສ,ວິລະຊົນແຫ່ງຊາດ, ນັກຮົບແຂ່ງຂັນ ແລະ ພະນັກງານບຳນານ, ພະນັກງານເສຍອົງຄະ, ພະນັກງານ-ລັດຖະກອນ, ທະຫານ, ຕຳຫລວດ ຜູ້ທີ່ມີຄຸນງາມຄວາມດີຕໍ່ປະເທດຊາດໃຫ້ເໝາະສົມ, ທົ່ວເຖິງ, ຮັບປະກັນຄວາມໂປ່ງໃສ, ຖືກຕ້ອງ ແລະ ຍຸຕິທຳ.