ໂຄງການພັດທະນາແຫລ່ງນ້ຳ ຫ້ວຍທະຮາວ ຄືບໜ້າແລ້ວ 30%

          ໂຄງການກໍ່ສ້າງຊົນລະປະທານ ອ່າງເກັບນ້ຳຫ້ວຍທະຮາວ ເພື່ອສະໜອງນ້ຳໃຫ້ແກ່ການຜະ ລິດຂອງປະຊາຊົນ ບ້ານນາຄຳ, ດົງຂວາງ, ດົງທ່າ, ດົງໃນ, ນາເກງ, ນາໂພ, ໜອງແປນ ແລະ ບ້ານປ່າໜາມ ເມືອງອຸທຸມພອນ ແຂວງສະຫວັນນະເຂດ ມາຮອດປັດຈຸບັນຄືບໜ້າແລ້ວ 30% ພາຍຫລັງລົງມືກໍ່ສ້າງມາແຕ່ຕົ້ນປີ 2014, ໂດຍແມ່ນບໍລິສັດເພັດຖາວອນ ກໍ່ສ້າເຄຫາ-ຂົວທາງ ແລະ ຊົນລະປະ ທານເປັນຜູ້ຮັບເໝົາໃນມູນຄ່າທັງໝົດ 325 ຕື້ກວ່າກີບ.

          ຫົວໜ້າວິຊາການຜູ້ຈັດການພາກສະໜາມ ຂອງບໍລິສັດດັ່ງກ່າວ ໃຫ້ຮູ້ວ່າ: ໂຄງການກໍ່ສ້າງຊົນລະປະທານແຫ່ງນີ້ ປະກອບມີຕົວເຂື່ອນທີ່ເປັນຝາຍດິນຍາວ 1.250 ແມັດ ແລະ ມີຄວາມສູງ 16 ແມັດ, ໃນເມື່ອສ້າງສຳເລັດແລ້ວຈະສາມາດເກັບກັກນ້ຳໄດ້ 21 ລ້ານແມັດກ້ອນ, ເພື່ອຕອບສະໜອງນ້ຳເຂົ້າເນື້ອທີ່ການຜະລິດໄດ້ 1.700 ເຮັກຕາ. ມີຄອງເໝືອງແມ່ ແລະ ຄອງເໝືອງຊອຍທີ່ເຮັດດ້ວຍເບຕົງຍາວເກືອບ 500 ແມັດ ເພື່ອອຳນວຍຄວາມສະດວກໃຫ້ການຜະລິດຂອງປະຊາຊົນໄດ້ເປັນຢ່າງດີ.