ນາຍົກລັດຖະມົນຕີລົງຊີ້ນຳວຽກງານຢູ່ແຂວງຄຳມ່ວນ

     ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເດີນທາງຢ້ຽມຢາມ ແລະ ຊີ້ນຳວຽກງານຢູ່ແຂວງຄຳມ່ວນ ໃນວັນທີ 13 ມິຖຸນານີ້ ໂດຍໄດ້ຮັບກຽດຕ້ອນຮັບອັນອົບອຸ່ນຈາກທ່ານເຈົ້າແຂວງ ພ້ອມຄະນະນຳ ແລະ ບັນດາພະແນກການຕ່າງໆ.

           ໃນໂອກາດນີ້, ທ່ານນາຍົກລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ບັນດາຜົນສຳເລັດຕ່າງໆທີ່ແຂວງຄຳມ່ວນຍາດມາໄດ້ໃນການປະກອບສ່ວນພັດທະນາເສດຖະກິດຂອງແຂວງດີຂຶ້ນເລື້ອຍໆ, ຮັບປະກັນໃຫ້ທ້ອງຖິ່ນມີຄວາມສະຫງົບປອດໄພ ແລະ ທ່ານນາຍົກ ໄດ້ແຈ້ງໃຫ້ຊາບວ່າ: ປັດຈຸບັນສະພາບສາກົນ ແລະ ພາກພື້ນຍັງສືບຕໍ່ຜັນແປໄປຢ່າງສັບສົນ ລະຫວ່າງບັນດາປະເທດມະຫາອຳນາດຕໍ່ການພັດທະນາເສດຖະກິດ-ສັງຄົມ ແລະ ໄດ້ເນັ້ນໃຫ້ແຂວງເສີມຂະຫຍາຍມູນເຊື້ອອັນດີງາມໃນການປົກປັກ

ຮັກສາຊັບພະຍາກອນທຳມະຊາດ ແລະ ແນະນຳໃຫ້ເອົາໃຈໃສ່ຈັດຕັ້ງປະຕິບັດຄຳສັ່ງເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການຫ້າມບໍ່ໃຫ້ສົ່ງໄມ້ທ່ອນອອກຕ່າງປະ ເທດຢ່າງເດັດຂາດ. ພ້ອມກັນນີ້ ລັດຖະບານຍັງໄດ້ແຕ່ງຕັ້ງຄະນະສະເພາະກິດ ເພື່ອຕິດຕາມກວດກາ ໂດຍສົມທົບກັບແຂວງ ກໍລະນີພົບເຫັນໄມ້ທີ່ບໍ່ຖືກຕ້ອງແມ່ນໃຫ້ຍຶດເປັນຂອງລັດ, ກໍລະນີຫາກພົບເຫັນພະນັກງານ, ເຈົ້າໜ້າທີ່ ແລະ ພາກສ່ວນທີ່ໄດ້ລະເມີດແມ່ນຈະໄດ້ປະຕິບັດຕາມຂັ້ນຕອນລະບຽບກົດໝາຍຢ່າງເຂັ້ມງວດ. ດັ່ງນັ້ນ ທ່ານນາຍົກລັດຖະມົນຕີ ໄດ້ຮຽກຮ້ອງມາຍັງທຸກພາກສ່ວນໃນສັງຄົມຈົ່ງຊ່ວຍເປັນຫູເປັນຕາ ພ້ອມທັງເປັນເຈົ້າການໃນການປ້ອງກັນຄວາມສະຫງົບສຸກໃຫ້ຮອບດ້ານ ເພື່ອຮັບປະກັນໃຫ້ການເປັນເຈົ້າພາບກອງປະຊຸມລັດຖະມົນຕີກະຊວງການຕ່າງປະເທດອາຊຽນ ທີ່ຈະຈັດຂຶ້ນໃນທ້າຍເດືອນກໍລະກົດ ແລະ ກອງປະຊຸມສຸດຍອດອາຊຽນໃນເດືອນກັນຍາ 2016 ນີ້ ໄດ້ຮັບຜົນສຳເລັດຈົບງາມ.

          ໃນການມາເຄື່ອນໄຫວຢ້ຽມຢາມ ແລະ ເຮັດວຽກຂອງທ່ານນາຍົກລັດຖະມົນຕີຄັ້ງນີ້, ທ່ານ ໂອໄດ ສຸດາພອນ ກໍໄດ້ລາຍງານໃຫ້ຊາບກ່ຽວກັບສະພາບການປົກປັກຮັກສາ ແລະ ພັດທະນາເສດ ຖະກິດ-ສັງຄົມຂອງແຂວງໃນໄລຍະ 6 ເດືອນຜ່ານມາ ເຊິ່ງໄດ້ເອົາໃຈໃສ່ໃນການຫັນເອົາພະນັກງານຫລັກແຫລ່ງ, ທະຫານ, ຕຳຫລວດ ລົງກໍ່ສ້າງຮາກຖານການເມືອງ ຮັບປະກັນປົກປັກຮັກສາເຂດນ້ຳດິນແດນ ອັນໄດ້ອຳນວຍຄວາມສະດວກໃຫ້ປະຊາຊົນມີຄວາມອຸ່ນອ່ຽນໃນການສ້າງສາພັດທະນາ ແລະ ສ້າງເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ ໂດຍອີງໃສ່ທີ່ຕັ້ງ ແລະ ຈຸດພິເສດຂອງແຂວງ ເປັນຕົ້ນດ້ານກະສິກຳ ແລະ ປ່າໄມ້ ແຂວງໄດ້ມີເນື້ອທີ່ການຜະລິດກະສິກຳຈຳນວນ 82.000 ກວ່າເຮັກຕາ ສະເພາະປີ 2014-2015 ຜະລິດເຂົ້ານາແຊງໄດ້ 50.640 ໂຕນ, ສ່ວນການນຳໃຊ້ກົນຈັກທັນສະໄໝເຂົ້າໃນການຜະລິດເຮັດນາໄຮ່ໃຫຍ່ ເຫັນວ່າມີທ່າອ່ຽງຂະຫຍາຍຕົວເພີ່ມຂຶ້ນ ເນື້ອທີ່ການຜະລິດເກີນ 6 ທົບຂອງປີຜ່ານມາ, ການລ້ຽງສັດໄດ້ຫັນຈາກການລ້ຽງແບບທຳມະຊາດມາເປັນແບບຟາມ. ດ້ານພະລັງງານ ແລະ ແຮ່ທາດ ກໍໄດ້ມີເຂື່ອນໄຟຟ້ານ້ຳຕົກຂະໜາດຕ່າງໆທີ່ໄດ້ກໍ່ສ້າງສຳເລັດ ແລະ ນຳໃຊ້ແລ້ວ. ດ້ານການຄ້າ ແລະ ບໍລິການ ເປັນທາງຜ່ານທີ່ສຳຄັນ ໄດ້ເອື້ອອຳນວຍໃຫ້ແກ່ການຄົມມະນາຄົມຂົນສົ່ງ. ນອກນັ້ນ ຍັງມີແຫລ່ງທ່ອງທ່ຽວຫລາຍແຫ່ງທາງດ້ານປະຫວັດສາດ, ວັດທະນະທຳ ແລະ ທຳມະຊາດ. ສ່ວນວຽກງານວັດທະນະທຳ-ສັງຄົມ ກໍໄດ້ຖືສຳຄັນໃນການປັບປຸງຄຸນນະພາບ ແລະ ຂະຫຍາຍຕາໜ່າງການສຶກສາໄປສູ່ເຂດຊົນນະບົດຫ່າງໄກສອກຫລີກ, ການສ້າງບ້ານວັດທະນະທຳກໍໄດ້ຮັບການຂະຫຍາຍຕົວ ແລະ ເພີ່ມຂຶ້ນຢ່າງຕໍ່ເນື່ອງ.