ອັດຕາການຕາຍຂອງແມ່ໃນລາວຍັງສູງທຽບກັບບັນດາປະເທດອາຊຽນ

          ຕາມການລາຍງານຂອງອົງການສະຫະປະຊາຊາດກອງທືນສຳລັບປະຊາກອນ ແລະ ການພັດທະນາໃຫ້ຮູ້ວ່າ: ໃນຜ່ານມາເຖິງວ່າລາວຈະມີຜົນສຳເລັດຫຼາຍດ້ານໃນການຈັດຕັ້ງປະຕິບັດວຽກງານປະຊາກອນ, ເຮັດໃຫ້ປະຊາຊົນມີຊີວິດການເປັນຢູ່ດີຂື້ນສາມາດເຂົ້າເຖິງການສຶກສາ ແລະ ການບໍລິການດ້ານສຸຂະພາບຫຼາຍຂື້ນ, ແຕ່ສິ່ງໜຶ່ງທີ່ໜ້າເປັນຫ່ວງນັ້ນ ແມ່ນບັນຫາສຸຂະພາບຈະເລີນພັນ,ຊຶ່ງຈາກຜົນການສຳຫຼວດ LSIS ໄດ້ຊີ້ໃຫ້ເຫັນວ່າ: ອັດຕາການຕາຍຂອງແມ່ຍິງສູງເຖິງ 220/100.000 ຄົນ,ໃນປີ 2014, ຕ່ຳກວ່າຄາດໝາຍປີ 2015 ແລະ ເມື່ອທຽບໃສ່ບັນດາປະເທດໃກ້ຄຽງແລ້ວອັດຕາການຕາຍຂອງແມ່ແມ່ນຍັງສູງນີ້ ກໍເນື່ອງຈາກວ່າ: ແພດພະດຸງຄັນມີຈຳນວນໜ້ອຍ, ບໍ່ພຽງພໍກັບຄວາມຕ້ອງການຂອງ

ການເກີດໃນປີ 2015 ຜ່ານມາລາວວາງຄາດໝາຍສ້າງແພດພະດຸງຄັນໃຫ້ໄດ້ 60% ຂອງຄວາມຕ້ອງການຕົວຈິງມີພຽງປະມານ 42%, ຖືເປັນອັດຕາທີ່ຕ່ຳສຸດໃນບັນດາປະເທດອາຊຽນ,ການໃຊ້ວິທີຄຸມກຳເນີດຍັງມີໜ້ອຍ ຍິງໃນໄວ 15 - 19ປີ ໄດ້ກາຍເປັນແມ່ 94/1.000 ຄົນ, ຖືເປັນອັດຕາທີ່ສູງກວ່າໝູ່ໃນບັນດາປະເທດອາຊຽນ ແລະ ຄວາມບໍ່ສະເໜີພາບລະຫວ່າງຍິງ-ຊາຍ, ກໍ່ເປັນສາເຫດໜຶ່ງທີ່ກໍ່ໃຫ້ເກີດບັນຫາດັ່ງກ່າວ ແລະ ທັງໝົດເລົ່ານີ້ ໄດ້ກາຍເປັນສິ່ງທ້າທາຍຕໍ່ການຈັດຕັ້ງປະຕິບັດວຽກງານປະຊາກອນຂອງລາວ, ຊຶ່ງພວກເຮົາຈະຕ້ອງໄດ້ເອົາໃຈໃສ່ຕໍ່ວຽກງານເຫຼົ່ານີ້ເພື່ອບັນລຸຄາດໝາຍສະຫັດສະຫວັດ, ກໍຄືການນຳພາປະເພດໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020 ໃຫ້ໄດ້.