ກະຊວງແຜນການ ແລະ ການລົງທຶນ ເຊື່ອມຊຶມມະຕິ X ຂອງພັກ

           ວັນທີ 15 ມິຖຸນານີ້, ກະຊວງແຜນການ ແລະ ການລົງທຶນ, ໄດ້ຈັດຕັ້ງເຊື່ອມຊຶມມະຕີກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກໃຫ້ຄະນະພັກ,ພະນັກງານຫລັກແຫລ່ງ ແລະ ພະນັກ ງານ-ລັດຖະກອນ ອ້ອມຂ້າງກະຊວງ ເພື່ອສ້າງຄວາມເຂົ້າໃຈ ເປັນເອກະພາບ ແລະ ເລິກເຊິ່ງ ຕໍ່ເນື້ອໃນຈິດໃຈທີ່ໄດ້ກຳນົດໄວ້ໃນມະຕິສຳຄັນດັ່ງກ່າວ, ບົນພື້ນຖານສ້າງການຫັນປ່ຽນທາງດ້ານແນວຄິດ-ຈິນຕະນາການຢ່າງເປັນລະບົບ ແລະ ກ້າວໄປສູ່ການເປັນເຈົ້າການ ຈັດຕັ້ງຜັນຂະຫຍາຍໃຫ້ເກີດໝາກຜົນຕົວຈິງ, ໂດຍການເຜີຍແຜ່ຂອງທ່ານນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງແຜນການ ແລະ ການລົງທຶນ.

          ທ່ານນາງ ຄຳຈັນ ວົງແສນບູນ ໄດ້ຍົກໃຫ້ເຫັນເຖິງ ຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກອັນໄດ້ເຮັດໃຫ້ປະເທດຊາດມີສະຖຽນລະພາບ, ການເມືອງໜັກແໜ້ນ,

ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ເສດຖະກິດ-ສັງຄົມໄດ້ຮັບການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານ ການຕ່າງປະເທດ ໄດ້ຮັບການເສີມຂະຫຍາຍ ແລະ ພັດທະນາຂຶ້ນເປັນກ້າວໆ.

          ທ່ານນາງ ຄຳຈັນ ວົງແສນບູນ ໃຫ້ຮູ້ຕື່ມວ່າ: ໃນມະຕິກອງປະຊຸມໃຫຍ່ຄັ້ງທີ X ຂອງພັກ ໄດ້ວາງທິດທາງກ່ຽວກັບວິໄສທັດຮອດປີ 2030, ຍຸດທະສາດການພັດທະນາເສດຖະກິດ-ສັງຄົມ ໃນໄລຍະ 10 ປີ (2016-2025) ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ 8 (2016-2020) ເຊິ່ງຄຳຂວັນ ວິໄສທັດ ແລະ ຍຸດທະສາດຂອງການພັດທະນາ ແມ່ນ “ສູ້ຊົນພັດທະ ນາປະເທດເຮົາ ໃຫ້ຫລຸດພົ້ນອອກຈາກສະຖານະພາບດ້ອຍພັດທະນາໃນປີ 2020, ກ້າວໄປສູ່ປະເທດກຳລັງພັດທະນາ ມີລາຍຮັບປານກາງສູງ ຕາມທິດການພັດທະນາສີຂຽວ ແລະ ຍືນຍົງ ເມື່ອເຖິງປີ 2030”.