ມຊ ຈັດສອບເສັງຄືນໃໝ່ໃນສາຍສັງຄົມກຸ່ມ B

ມະຫາວິທະຍາໄລ ແຫ່ງຊາດ (ມຊ) ໄດ້ຈັດຕັ້ງການສອບເສັງຄືນ ສໍາລັບກຸ່ມສາຍສັງຄົມ (ກຸ່ມB) ຂອງສົກຮຽນ 2016-2017, ໃນວັນທີ 20 ກັນຍານີ້ ທີ່ຄະນະອັກສອນສາດ (ມຊ) ເຊິ່ງຢູ່ໃນສາຍສັງຄົມ ມີຜູ້ລົງທະບຽນສອບເສັງ 7 ພັນກວ່າຄົນ.

ທ່ານ ຄໍາພົງ ນາມມະວົງມີໄຊ ຫົວໜ້າຫ້ອງການວິຊາການ ມຊ ໄດ້ໃຫ້ຮູ້ວ່າ: ໂດຍອີງຕາມໜັງສືແຈ້ງການຂອງທ່ານ ອະທິການບໍດີ, ປະທານຄະນະກໍາມະການສອບເສັງ ຜູ້ທີ່ສະໝັກສອບ ເສັງເຂົ້າຮຽນຢູ່ມະຫາວິທະຍາໄລແຫ່ງຊາດສາຍສັງຄົມ (ກຸ່ມB) ໃນຈຸດສອບເສັງ ມສ ຕານມີໄຊ, ມປາຍວຽງຈັນ-ໂຮ່ຈິມິງ ແລະ ມສ ວຽງຈັນ ໃຫ້ມີການສອບເສັງຄືນໃໝ່.  ເນື່ອງຈາກວ່າການຈັດຕັ້ງ ການສອບເສັງ

ຄັດເລືອກເອົານັກສຶກສາເຂົ້າຮຽນຜ່ານມາໃນກຸ່ມດັ່ງກ່າວ, ມີການຜິດພາດດ້ານຫລັກການຂອງການສອບເສັງ. ເຊິ່ງຢູ່ໃນສາຍສັງຄົມ ໄດ້ມີຜູ້ລົງທະບຽນສອບເສັງ 7 ພັນກວ່າຄົນ. ຕາຕະລາງສອບເສັງມີວິຊາ ຄະນິດສາດ B; ພາສາລາວ-ວັນນະຄະດີ; ພູມສາດ ແລະ ປະຫວັດສາດ, ສ່ວນໃນກຸ່ມ A ແລະ C ແມ່ນບໍ່ໄດ້ເສັງຄືນ.

ສໍາລັບສົກນີ້, ກະຊວງສຶກສາທິການ ແລະ ກິລາ ໄດ້ອະນຸມັດຮັບເອົານັກສຶກສາເຂົ້າຮຽນຕໍ່ມະຫາວິທະຍາໄລຈໍານວນ 5.300 ກວ່າຄົນ, ຜ່ານມາມີຜູ້ສະໝັກເຂົ້າສອບເສັງທັງໝົດ 15 ພັນກວ່າຄົນ.