ປກສ ເມືອງປາກງື່ມຈັບມືກາວຕົວອັນຕະລາຍມາດໍາເນີນຄະດີ

ຂ່າວ-ພາບ : ຫນັງສືພິມ ປກສ

             ທ້າວ ອອນຄຳ ເຮີ ອາຍຸ 18 ປີ, ຢູ່ບ້ານທ່າກົກໄຮ, ເມືອງປາກງື່ມ, ນະຄອນຫລວງວຽງຈັນ, ໄດ້ຖືກເຈົ້າໜ້າທີ່ ປກສ ເມືອງດັ່ງກ່າວຈັບຕົວມາດໍາເນີນຄະດີໃນຂໍ້ຫາລັກຊັບພົນລະເມືອງ.

             ຊຶ່ງຄະດີມີຢູ່ວ່າ: ໃນວັນທີ 17 ກັນຍາ 2016 ໄດ້ຮັບແຈ້ງຄວາມຈາກຜູ້ຖືກເສຍຫາຍຊື່ນາງ ຄູ ເຮີ ອາຍຸ 26 ປີ ອາຊີບຄ້າຂາຍ ຢູ່ບ້ານທ່າກົກໄຮ, ເມືອງປາກງື່ມວ່າມີຄົນຮ້າຍລັກເຂົ້າເຮືອນຂອງຜູ້ກ່ຽວແລ້ວລັກເອົາຊັບສິນຫລົບໜີໄປ ລວມມີເງິນ 1.700 ໂດລາສະຫະລັດ, 27.000 ບາດ(ສະກຸນເງິນໄທ), ເງິນກີບ 20.600.000 ກີບ, ໂທລະສັບຊຳຊຸງ 1 ເຄື່ອງ ແລະ ບັດຕື່ມເງິນປະເພດ ຕ່າງໆ ລວມທັງໝົດ 2 ລ້ານກີບ. ຈາກນັ້ນ ຈຶ່ງລົງກວດກາເກັບກຳຂໍ້ມູນຫລັກຖານ ແລະ ສາມາດຮູ້ໄດ້ເປົ້າໝາຍກໍເຫດຊື່ທ້າວ ອອນຄຳ ເຮີ ອາຍຸ 18 ປີ ຢູ່ບ້ານດຽວກັນ (ຫລານຊາຍຂອງຜູ້ເສຍຫາຍ) ຈຶ່ງໄດ້ນໍາຕົວມາສືບສວນ-ສອບສວນ ແລະ ໄດ້

ສາລະພາບວ່າ: ໃນວັນທີ 15 ກັນຍາ 2016 ຕົນໄດ້ໄປຕີໄກ່ຢູ່ຂ້າງເຮືອນຂອງນາງ ຄູ ເຮີ (ນ້າສາວ) ໃນເວລານັ້ນໄດ້ຍິນນ້າສາວລົມໂທລະສັບກັບພີ່ນ້ອງຢູ່ຕ່າງ ປະເທດຝາກເງິນມາໃຫ້, ຈຶ່ງຄິດຢາກໄດ້ເງິນ ແລະ ມາຮອດເວລາປະມານ 24:00 ໂມງຂອງມື້ດັ່ງ ກ່າວ, ໄດ້ມີຟ້າລົມຝົນຕົກເຮັດໃຫ້ໄຟຟ້າດັບຈຶ່ງຖືໂອກາດປີນເຂົ້າໄປທາງປ່ອງຢ້ຽມເຮືອນຂອງນ້າ ສາວ, ຈາກນັ້ນກໍເຂົ້າໄປໃນຫ້ອງນອນແລ້ວລັກເອົາກະເປົາເງິນແລ້ວຫລົບໜີອອກມາທາງເກົ່າ ແລະ ໄດ້ຍ່າງລັດປ່າແຄມທາງໄປຫາເຮືອນ, ແຕ່ໄດ້ມີທ້າວ ເຊງຫວ່າງ ມາພົບເຫັນຈຶ່ງໄດ້ເອົາເງິນໃບລະ 100 ໂດລາສະຫະລັດ ແລະ ໃບ 1.000 ບາດ ໃຫ້ທ້າວ ເຊງຫວ່າງ ໂດຍບໍ່ຮູ້ຈຳນວນວ່າມີຈັກໃບ ເພື່ອບໍ່ໃຫ້ຜູ້ກ່ຽວບອກໃຜ. ພາຍຫລັງມາຮອດເຮືອນກໍເອົາເງິນອອກມານັບເຫັນວ່າມີເງິນ 1.700 ໂດລາສະຫະລັດ, 13 ພັນບາດ ແລະ  15 ລ້ານກີບ, ພ້ອມບັດຕື່ມເງິນເອັມໂຟນ, ອີທີເອວ ແລະ ຢູນິເທວ ແລະ ໂທລະສັບຊຳຊຸງ 1 ເຄື່ອງ. ຫລັງຈາກນັ້ນໄດ້ເອົາຊັບສີນທັງໝົດຊຸກເຊື່ອງໄວ້ໃນຕູ້ຫ້ອງນອນ ແລະ ມາຮອດວັນທີ 17 ກັນຍາ 2016 ກໍຖືກເຈົ້າໜ້າທີ່ກັກຕົວພ້ອມເກັບກູ້ເງິນຈຳນວນດັ່ງກ່າວມາມອບຄືນໃຫ້ເຈົ້າຂອງເດີມ, ໂດຍການກ່າວມອບຂອງທ່ານພັນຕີ ນາສົມພອນ ຍວນຄຳດີ ຫົວໜ້າກອງສືບສວນ-ສອບສວນຄະດີອາຍາ ປກສ ເມືອງປາກງື່ມ.