ລາວເຜີຍແຜ່ຜົນສຳຫລວດການຄ້ຳປະກັນສະບຽງອາຫານ ແລະໂພຊະນາການ

          ໃນວັນທີ 20 ກັນຍາ, ກະຊວງສາທາລະນະສຸກ ຮ່ວມກັບ ກະຊວງແຜນການ ແລະ ການລົງທຶນ ເຜີຍແຜ່ຜົນການສຳຫລວດ ການຄ້ຳປະກັນສະບຽງອາຫານ ແລະ ໂພຊະນາການ ຂອງເດັກນ້ອຍລຸ່ມ 5 ປີ ຢູ່ 5 ແຂວງ ຄື: ແຂວງຫລວງນ້ຳທາ, ອຸດົມໄຊ, ສາລະວັນ, ເຊກອງ ແລະ ແຂວງອັດຕະປື ເຊິ່ງເປັນການສຳຫລວດແບບຮອບດ້ານ ໄດ້ວັດແທກຫລາຍຕົວຊີ້ວັດ ທີ່ກວມເອົາການໃຫ້ອາຫານເດັກອ່ອນ ແລະ ເດັກນ້ອຍ, ລະດັບພາວະເລືອດຈາງໃນເດັກນ້ອຍ, ແມ່ມານ, ໂພຊະນາການຂອງແມ່ ແລະ ພຶດຕິກຳການຮັກສາສຸຂະພາບ ເປັນຕົ້ນ ການຝາກທ້ອງ, ການຈັດຫານ້ຳສະອາດ, ວິດຖ່າຍ ແລະ ການປູກຝັງລ້ຽງສັດ ທີ່ຕິດພັນກັບການຄ້ຳປະກັນສະບຽງອາຫານ.

 ໃນໂອກາດດັ່ງກ່າວ, ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ຍົກໃຫ້ເຫັນເຖິງຜົນການສຳຫລວດດັ່ງກ່າວ ວ່າ: ການສຳຫລວດການຄ້ຳປະກັນ ສະບຽງອາຫານ ແລະ ໂພຊະນາການ ໃນ 5 ແຂວງ ໄດ້ປະເມີນຫລາຍຕົວຊີ້ວັດ, ເຊິ່ງອັດຕາການຂາດສານອາຫານຊຳເຮື້ອໃນເດັກນ້ອຍລຸ່ມ 5 ປີ ໄດ້ຫລຸດລົງ ເມື່ອທຽບກັບການສຳຫລວດ ໃນປີ 2011 ຈາກ 44% ເປັນ 36% ໃນປີ 2015, ແຕ່ເຖິງຢ່າງໃດກໍຕາມ ອັດຕາຍັງມີຄວາມແຕກໂຕນກັນຫລາຍ ລະຫວ່າງບັນດາແຂວງ ເຊິ່ງຈັດລຽງລຳດັບ ແຕ່ຕ່ຳສຸດ 16% ຢູ່ນະຄອນຫລວງວຽງຈັນ ເຖິງສູງສຸດ 54% ຢູ່ ແຂວງອຸດົມໄຊ.

ທ່ານຮອງລັດຖະມົນຕີກະຊວງສາທາລະນະສຸກ ກ່າວວ່າ: ການເລີ່ມຕົ້ນໃຫ້ລູກກິນນົມແມ່ແຕ່ຫົວທີ ພາຍໃນ 1 ຊົ່ວໂມງ ຫລັງເກີດ ຂອງ 4 ໃນ 5 ແຂວງ ມີການປັບປຸງດີຂຶ້ນ ເມື່ອທຽບກັບຂໍ້ມູນຈາກ LSIS1 ໃນປີ 2011, ໃນນັ້ນ ແຂວງຫລວງນ້ຳທາ, ແຂວງອຸດົມໄຊ ແລະ ແຂວງສາລະວັນ ມີການປັບປຸງທີ່ດີກວ່າໝູ່. ນອກນັ້ນ, ຜົນການສຳຫລວດສະແດງໃຫ້ເຫັນວ່າ ຫລາຍກວ່າເຄິ່ງໜຶ່ງຂອງແມ່ຍິງຖືພາ ບໍ່ໄດ້ກິນຢາເມັດເສີມທາດເຫລັກ ໃນໄລຍະຖືພາ, ມີພຽງແຕ່ 26% ໄດ້ກິນຢາເມັດເສີມທາດເຫລັກ ເນື່ອງຈາກວ່າແມ່ຍິງຖືພາ ອາດບໍ່ປະຕິບັດຕາມການແນະນຳຈາກແພດໝໍ ຫລື ບໍ່ໄດ້ຮັບຢາແມັດເສີມອາຫານ ຈາກສຸກສາລາ ໃນເວລາໄປຝາກທ້ອງ ຫລື ບໍ່ໄປຝາກທ້ອງ, ຢ່າງໃດກໍ່ຕາມ ໃນ 5 ແຂວງດັ່ງກ່າວ, ການນຳໃຊ້ແຫລ່ງນ້ຳສະອາດ ແລະ ໂພຊະນາການ ໄດ້ມີການປັບປຸງດີຂຶ້ນເທື່ອລະກ້າວ.