ຍ່າງເພື່ອສຸຂະພາບສະຫລອງວັນສັນຕິພາບໂລກ

            ເຊົ້າວັນທີ 17 ກັນຍາຜ່ານມາ, ທີ່ນະຄອນຫລວງວຽງຈັນ, ຄະນະສັນຕິພາບ ແລະ ສາມັກຄີຂອງ ສປປ ລາວ, ໄດ້ຈັດກິດຈະກຳຍ່າງເພື່ອສຸຂະພາບແຕ່ສວນປະຕູໄຊຫາຫໍຄຳແລ້ວກັບຄືນມາປະຕູໄຊ, ເນື່ອງໃນໂອກາດສະຫລອງວັນສັນຕິພາບໂລກ 21 ກັນຍາ, ໂດຍມີທ່ານ ນາງ ສູນທອນ ໄຊຍະຈັກ ຫົວໜ້າຄະນະພົວພັນຕ່າງປະເທດສູນກາງພັກ, ພ້ອມດ້ວຍການນຳພັກ-ລັດ, ພະນັກງານ, ທະ ຫານ, ຕຳຫລວດ, ນັກຮຽນ, ນັກສຶກສາ, ຊາວໜຸ່ມ ເຍົາວະຊົນ ແລະ ມວນຊົນນະຄອນຫລວງວຽງຈັນເຂົ້າຮ່ວມເປັນຈຳນວນຫລາຍ.

            ກິດຈະກໍາເປັນການປຸກຈິດສຳນຶກໃຫ້ຊາວໜຸ່ມເຍົາວະຊົນ, ຕະຫລອດຮອດພໍ່ແມ່ປະຊາຊົນບັນດາເຜົ່າໃຫ້ຮັບຮູ້, ເຂົ້າໃຈ ແລະ ເຫັນຄວາມສຳຄັນຂອງວຽກງານສັນຕິພາບ, ເຊິ່ງຕິດພັນກັບການພັດທະນາ

ທັງເປັນການປະກອບສ່ວນເສີມສ້າງສັນຕິພາບໃນພາກພື້ນ ແລະ ສາກົນ, ທັງເປັນການສະໜັບສະໜູນ ແລະ ຜັນຂະຫຍາຍຍັດຕິຂອງອົງການສະຫະປະຊາຊາດທີ່ຮຽກຮ້ອງໃຫ້ອົງການຈັດຕັ້ງທົ່ວໂລກຈັດກິດຈະກຳເພື່ອສະເຫລີມສະຫລອງວັນດັ່ງກ່າວຢ່າງພ້ອມພຽງ ເຮັດໃຫ້ວັນດັ່ງກ່າວເປັນວັນຍຸຕິການໃຊ້ຄວາມຮຸນແຮງ, ຍຸຕິການສູ້ຮົບ, ລືບລາງຄວາມອຶດຫິວ ແລະ ບັນຫາອື່ນໆ. 

            ຜ່ານມາຄະນະສັນຕິພາບໄດ້ຈັດກິດຈະກຳຕ່າງໆທີ່ຕິດພັນກັບວຽກງານສັນຕິພາບທຸກປີດ້ວຍຫລາຍຮູບການແຕ່ຖືເອົາເນື້ອໃນເປັນຕົ້ນຕໍ: ປາຖະກາຖາ, ຈັດສໍາມະນາ, ຖະແຫລງຂ່າວ, ແຂ່ງ ຂັນກິລາ ແລະ ອື່ນໆເພື່ອເປັນການປະກອບສ່ວນເຂົ້າໃນການເສີ່ມສ້າງສັນຕິພາບໃນພາກພື້ນ ແລະ ຄວາມໝັ້ນຄົງຂອງສາກົນ.