ການຂົນສົ່ງລາວຍັງພົບບັນຫາຫລາຍດ້ານໃນການດຳເນີນທຸລະກິດ

          ສະມາຄົມຜູ້ຂົນສົ່ງ ແລະ ຈັດສົ່ງສິນຄ້າ ລະຫວ່າງປະເທດຂອງລາວ ເປີດເຜີຍວ່າ: ການຂົນສົ່ງແມ່ນມີຄວາມສຳຄັນ ຕໍ່ການພັດທະນາເສດຖະກິດ-ສັງຄົມ ຂອງປະເທດ, ເຊິ່ງປັດຈຸບັນ ລາວ ມີການຂົນສົ່ງທາງບົກຫລາຍກວ່າ 90% ແຕ່ຍັງພົບບັນຫາຫຍຸ້ງຍາກດ້ານຄ່າຂົນສົ່ງແພງ, ເນື່ອງຈາກມີແຕ່ສາງພາສີ ທີ່ເປັນພຽງບ່ອນກັກເກັບສິນຄ້າ ແລະ ລໍຖ້າເສຍພາສີ, ແຕ່ບໍ່ມີລະບົບສາງເຕົ້າໂຮມ-ແຈກສິນຄ້າ ໃຫ້ແກ່ຜູ້ປະກອບການຂົນສົ່ງ (ແບບໂລຈິສຕິກ). ຂະນະທີ່ເກືອບ 80% ຂອງລົດຂົນສົ່ງລາວ ບໍ່ໄດ້ຂົນສິນຄ້າແບບໄປເຕັມ-ມາເຕັມ ເພາະຂາດລະບົບສາງດັ່ງກ່າວ. ການອະນຸຍາດນຳເຂົ້າສິນຄ້າ ຍັງຜ່ານຫລາຍຂອດຫລາຍຂັ້ນ ທັງໃຊ້ເວລາຫລາຍ ແລະ ບໍ່ໄດ້ກຳນົດເວລາລະອຽດ, ນອກຈາກນີ້ ການເກັບອາກອນຂົນສົ່ງ ກໍຍັງຊ້ຳຊອ້ນອີກດ້ວຍ.

          ໃນກອງປະຊຸມນາຍົກລັດຖະມົນຕີ ພົບປະກັບນັກທຸລະກິດ ເມື່ອທ້າຍເດືອນກໍລະກົດຜ່ານມານີ້ ສະມາຄົມຜູ້ຂົນສົ່ງ ແລະ ຈັດສົ່ງສິນຄ້າ ລະຫວ່າງປະເທດຂອງສປປ ລາວ ໄດ້ຊີ້ໃຫ້ເຫັນເຖິງສະພາບການຂົນສົ່ງ ລະ ຫວ່າງປະເທດໃນປັດຈຸບັນ ແມ່ນຍັງໃຊ້ລົດຕ່າງປະເທດເກືອບ 100% ຍ້ອນນິຕິກຳບໍ່ໄດ້ກຳນົດໃຫ້ບູລິມະສິດ ແກ່ຜູ້ຂົນສົ່ງລາວ. ດັ່ງນັ້ນ ລາຄາຂົນສົ່ງຈຶ່ງຖືກກຳນົດໂດຍຕ່າງປະເທດ ເຮັດໃຫ້ຄ່າໃຊ້ຈ່າຍບໍລິການແຈ້ງເອກະສານຜ່ານແດນຢູ່ດ່ານ ໄດ້ເສຍຄ່າກວດກາກວ່າ 30% ຂອງຄ່າຂົນສົ່ງຕໍ່ຖ້ຽວ. ສ່ວນການອະນຸຍາດນຳເຂົ້າສິນຄ້າ ໃຊ້ເວລາສະເລ່ຍ 45 ວັນ ຈຶ່ງຄົບທັງໝົດລາຍເຊັນ. ນອກນີ້, ແຕ່ລະກະຊວງຍັງມີລະບຽບທີ່ແຕກຕ່າງກັນ ເຊິ່ງບໍ່ເປັນຜົນດີຕໍ່ນະໂຍບາຍສົ່ງເສີມການລົງທຶນ, ທັງສ້າງຄວາມຫຍຸ້ງຍາກ ແລະ ກົດໜ່ວງພັດທະນາເສດຖະ ກິດຂອງຊາດ. ອີກດ້ານໜຶ່ງ ລົດຂົນສົ່ງຂອງລາວ ຈຳນວນຫລວງຫລາຍອັ່ງອໍຢູ່ເທິງຂົວເປັນປະຈຳ ໂດຍສະເພາະຂົວມິດຕະພາບ 1 ຍ້ອນລະບົບກວດກາເອກະສານ ນຳເຂົ້າສິນຄ້າຊັກຊ້າ. ຂະແໜງການເງິນແຕ່ລະທ້ອງຖິ່ນ ໄດ້ສ້າງນິຕິກຳຂຶ້ນເພື່ອເກັບອາກອນ, ລົດຂົນສົ່ງສິນຄ້າຕ່າງປະ ເທດເຂົ້າມາລາວ ແລະ ລົດຂົນສົ່ງລາວ ອອກປະເທດທີສາມຕ້ອງຖືກເກັບອາກອນມູນຄ່າເພີ່ມ ໃນໄລຍະທາງທີ່ຂ້າມຜ່ານ ເຊິ່ງເປັນການບັ່ນທອນຄວາມສາມາດແຂ່ງຂັນ ຂອງບໍລິສັດຂົນສົ່ງລາວ, ນອກຈາກເກັບອາກອນເປັນຖ້ຽວ ຜູ້ປະກອບການຍັງມີການໄລ່ລຽງອາກອນທ້າຍປີນຳອີກ ເຊິ່ງເປັນການເກັບອາກອນຊ້ຳຊ້ອນ.

ຢ່າງໃດກໍຕາມທາງສະມາຄົມ ໄດ້ສະເໜີຕໍ່ລັດຖະບານແກ້ໄຂຫລາຍບັນຫາ ເປັນຕົ້ນການຍົກລະດັບລານພັກຕູ້ສິນຄ້າ ສະຖານີລົດໄຟທ່ານາແລ້ງຂຶ້ນໃຫ້ກາຍເປັນທ່າບົກ ເພື່ອເຮັດໜ້າທີ່ບໍລິການແບບໂລຈິສຕິກ ຕາມເງື່ອນໄຂ ແລະ ລະບຽບການຂົນສົ່ງສາກົນ. ສະເໜີລັດຖະບານພິຈາລະນາຄຳສັ່ງ ເລກທີ 784/ຫສນຍ-ກລຂ 2016 ທີ່ໄດ້ມອບລານພັກຕູ້ສິນຄ້າສະຖານີລົດໄຟ ໃຫ້ແກ່ລັດວິສາຫະກິດໃຊ້ເປັນບ່ອນຝາກສາງ ເຊິ່ງເຫັນວ່າບໍ່ເກີດປະໂຫຍດເທົ່າທີ່ຄວນ ແລະ ຄວນມອບລານພັກສິນຄ້າດັ່ງກ່າວໃຫ້ກະຊວງໂຍ ທາທິການ ແລະ ຂົນສົ່ງຄຸ້ມຄອງ ໂດຍການມີສ່ວນຮ່ວມຂອງສະມາຄົມຜູ້ຂົນສົ່ງ ແລະ ຈັດສົ່ງສິນຄ້າລາວ, ພ້ອມທັງໃຫ້ບູລິມະສິດແກ່ບໍລິສັດຂົນສົ່ງ ໂລຈິສຕິກ ຢູ່ໃນທຸກສັນຍາການລົງທຶນໃນ ສປປ ລາວ; ສິ່ງສຳຄັນ ສະເ ໜີໃຫ້ພາກສ່ວນກ່ຽວຂ້ອງ ຕິດຕາມການຈັດຕັ້ງປະຕິບັດລະບຽບການ ແລະ ນິຕິກຳຕ່າງໆ ເພື່ອນຳສະເໜີລັດຖະບານແກ້ໄຂໂດຍໄວ, ພ້ອມທັງຫລຸດຜ່ອນອາກອນມູນຄ່າເພີ່ມ ຈາກພາກທຸລະກິດຂະໜາດກາງ ແລະ ນ້ອຍ ເພື່ອສົ່ງເສີມ ແລະ ເພີ່ມຄວາມສາມາດແຂ່ງຂັນກັບຕ່າງປະເທດ.