ຫວຽດນາມສືບຕໍ່ຊ່ວຍເຫລືອສ້າງພະນັກງານໂທລະພາບລາວ

    ພິທີລົງນາມຮ່ວມມືກໍ່ສ້າງພະນັກງານລະຫວ່າງທ່ານ ບຸນເຈົ້າ ພິຈິດ ອຳນວຍການ ສະຖານີໂທລະພາບແຫ່ງຊາດລາວ ແລະ ທ່ານ ເຈີນບາວແຄັງ ອຳນວຍການໂຮງ ຮຽນໂທລະພາບຊັ້ນສູງຫວຽດນາມ, ໄດ້ມີຂຶ້ນໃນວັນທີ 18 ມີນານີ້, ຢູ່ນະຄອນ ຫລວງວຽງຈັນ, ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມຸນຕຣີ ລັດຖະ ມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ໂດຍໂຮງຮຽນໂທລະພາບຊັ້ນສູງຫວຽດນາມເຫັນດີສືບຕໍ່ໃຫ້ທຶນການສຶກສາແກ່ພະນັກງານໂທລະພາບແຫ່ງຊາດລາວປີລະ 10 ທຶນນັບແຕ່ປີ 2015-2017 ເພື່ອໄປສຶກສາຢູ່ໂຮງຮຽນດັ່ງກ່າວ, ນັບແຕ່ປີ 2012 ເປັນຕົ້ນມາມີນັກສຶກສາລາວຫລາຍກວ່າ 30 ຄົນໄດ້ຮັບທຶນໄປສຶກສາດ້ານສື່ມວນຊົນ, ການຖ່າຍທຳສາລະຄະດີ, ຮູບເງົາ-ໂທລະພາບ ແລະ ອື່ນໆຢູ່ໂຮງຮຽນດັ່ງກ່າວແລ້ວ, ອັນໄດ້ປະກອບສ່ວນສຳຄັນເຂົ້າໃນການພັດທະນາບຸກຄະລະກອນໃນຂົງເຂດວຽກງານສື່ມວນຊົນລາວ, ເວົ້າສະເພາະໂທລະພາບ ແຫ່ງຊາດໃຫ້ມີຄຸນນະພາບສູງຂຶ້ນ.