ອາຄານ​ເກົ່າ​​ອັນຕະລາຍ​ໃກ້​ຕົວ

   ພາຍຫລັງເກີດເຫດການແຜ່ນຝາປູນຂະໜາດໃຫຍ່ຢູ່ເທິງຊັ້ນ 3 ຂອງອາຄານເກົ່າແກ່ຫລັງໜຶ່ງຢູ່ເຂດບ້ານຫາຍໂສກ ເມືອງຈັນທະບູລີ ນະ ຄອນຫລວງວຽງຈັນ ໄດ້ຕົກລົງສູ່ພື້ນຢ່າງແຮງເມື່ອເວລາປະມານ 17:00 ໂມງຂອງວັນທີ 1 ກຸມພາຜ່ານມາ ແລະ ມີນັກທ່ອງທ່ຽວຢູ່ໃກ້ຄຽງໄດ້ຮັບບາດເຈັບເລັກນ້ອຍ ແລະ ນັບວ່າໂຊກດີສຸດໃນຕອນເກີດເຫດນັ້ນແມ່ນບໍ່ມີຜູ້ຄົນ ແລະ ພາຫະນະຜ່ານໄປມາ, ເຊິ່ງປົກກະຕິແລ້ວໃນຈຸດນັ້ນຖືວ່າມັກມີຜູ້ຄົນກໍຄືນັກທ່ອງທ່ຽວ ແລະ ພາຫະນະຜ່ານໄປມາບໍ່ຂາດສາຍ.

   ແນວໃດກໍຕາມ, ເຖິງວ່າເຫດການທີ່ບໍ່ເພິ່ງປາດຖາໜານີ້ຈະບໍ່ສົ່ງຜົນເສຍຫາຍຫລາຍກໍຕາມ, ແຕ່ຜູ້ຄົນທີ່ຢູ່ໃກ້ຄຽງ ແລະ ຜູ້ທີ່ມາພົບເຫັນສະພາບເສດດິນ​ຈີ່, ເສດປູນຂະໜາດໃຫຍ່ຟົ້ງຢາຍເດຍລະດາດເຕັມພື້ນທາງ

ບໍລິເວນໃກ້ຄຽງຈຸດເກີດເຫດຕ່າງກໍຮູ້ສຶກຕື່ນຕົກໃຈ ​ແລະ ໄດ້ກາຍເປັນກະ​ແສຂ່າວດ່ວນທີ່ຖືກເຜີຍແຜ່ຢ່າງວ່ອງໄວໃນສື່ສັງຄົມອອນລາຍ​ເພາະ​ຖືວ່າ​ເປັນ​ໄພ​ອັນຕະລາຍ​ໃກ້​ຕົວທີ່​ບໍ່​ຄ່ອຍ​ໄດ້​ຮັບ​ການ​​ໃສ່​ໃຈ​ຫລາຍ​ ​ແລະ ພວກ​ເຮົາ​ກໍ​ເບິ່ງ​ຂ້າມ​ມັນ​ມາ​ຕະຫລອດ, ຊຶ່ງມີຄົນຈໍານວນບໍ່ໜ້ອຍໄດ້ເຂົ້າມາສະແດງຄວາມຄິດເຫັນ, ໂດຍສະເພາະເຟສບຸກທີ່ຊື່ໂທລະໂຄ່ງທີ່ເຄີຍໄດ້ນໍາສະເໜີພາບອາຄານຫລັງດັ່ງກ່າວຜ່ານ​ສື່​ອອນ​ລາຍເມື່ອຫລາຍເດືອນກ່ອນພາຍຫລັງ​ເຫັນ​ສະພາບອາຄານມີ​ການແຕກ​ແຫງ​ເປັນ​ບໍລິ​ເວນກວ້າງເພື່ອໃຫ້ໜ່ວຍງານກ່ຽວຂ້ອງໄດ້ໄປກວດກາ, ​ແຕ່​ບໍ່​ມີ​ໃຫ້​ສົນ​ໃຈ​ວ່າ​ຈະ​ມີ​ເຫດ​ການ​ແບບ​ນີ້​ເກີດ​ຂຶ້ນ.

ນອກຈາກ, ສຽງວິຈານຂອງສັງຄົມສ່ວນໜຶ່ງກໍສະແດງຄວາມເປັນຫວ່ງ, ພ້ອມທັງຮຽກຮ້ອງເຖິງພາກສ່ວນກ່ຽວຂ້ອງເພີ່ມທະວີການເອົາ​ໃຈ​ໃສ່​ຕິດຕາມກວດກາບັນດາຕຶກອາຄານເກົ່າແກ່ໃນຕົວເມືອງເພື່ອຮັບປະກັນບໍ່ໃຫ້ເຫດການແບບນີ້ເກີດຂຶ້ນອີກ.