ການບຸກລຸກຢູ່ເຂດປ່າສະຫງວນແຫ່ງຊາດນ້ຳກ່ານຍັງບໍ່ໄດ້ຮັບການແກ້ໄຂ

           ການຖາງປ່າເຮັດໄຮ່, ລັກລອບຕັດໄມ້ ແລະ ລ່າສັດຢ່າງຜິດກົດໝາຍຢູ່ ເຂດປ່າສະຫງວນແຫ່ງ ຊາດນ້ຳກ່ານເມືອງຫ້ວຍຊາຍ ແຂວງບໍ່ແກ້ວ ທີ່ຍືດເຍື້ອມາ ເປັນເວລາຫຼາຍເດືອນ ໂດຍປະຊາ ຊົນທີ່ອາໄສ ຢູ່ໃນເຂດບໍລິເວນດັ່ງ ກ່າວ ແລະ ຜູ້ຄົນທີ່ບໍ່ຫວັງດີຈົນກາຍເປັນທີ່ວິພາກວິຈານຈາກສັງຄົມແລ້ວນັ້ນມາ ເຖິງປັດຈຸບັນ ກໍຍັງບໍ່ໄດ້ຮັບການແກ້ໄຂຍ້ອນຂາດເຂີນບຸກຄະລາກອນ, ພາຫະນະ ແລະ ເຄື່ອງມື ທີ່ຈຳເປັນ ເຂົ້າໃນການປະຕິບັດໜ້າທີ່.

            ທ່ານ ຝຣັ່ງຊົວ ປະທານບໍລິສັດ ອະນຸລັກຊີວະນາໆພັນ (ເຈົ້າຂອງສະຖານທີ່ທ່ອງທ່ຽວອະນຸລັກ ທຳມະຊາດ) ຢູ່ເຂດປ່າສະຫງວນແຫ່ງຊາດນ້ຳກ່ານໃຫ້ຮູ້ ວ່າ: ເຖິງວ່າໄດ້ສະເໜີໃຫ້ພາກສ່ວນກ່ຽວຂ້ອງຊ້ຳ ແລ້ວຊ້ຳອີກກັບຫາ ແລະ ຄວາມສູນເສຍທີ່ເກີດຂຶ້ນກໍຕາມແຕ່ຈົນເຖິງປັດຈຸບັນນີ້ ກໍຍັງບໍ່ໄດ້ຮັບການແກ້ໄຂ ຫຼື ນຳຜູ້ກະທຳຜິດມາລົງໂທດຕາມລະ ບຽບກົດໝາຍແຕ່ຢ່າງໃດຈົນເຮັດໃຫ້ເນື້ອທີ່ປ່າໄມ້ຢູ່ເຂດປ່າ ສະຫງວນແຫ່ງຊາດດັ່ງກ່າວໄດ້ຮັບຄວາມສູນເສຍຈາກການ

ຖາງປ່າເຮັດໄຮ່, ລັກລອບຕັດໄມ້ ແລະ ຈູດປ່າ ໂດຍກຸ່ມຄົນທີ່ອາໄສຢູ່ເຂດບໍລິເວນດັ່ງກ່າວເປັນບໍລິເວນກວ້າງ, ສັດປ່າຫຼາຍ ຊະນິດຖືກຂົມຂູ່ ແລະ ສົ່ງຜົນ ກະທົບຕໍ່ແຫຼ່ງທ່ອງທ່ຽວອະນຸລັກທຳມະຊາດຢູ່ເຂດນັ້ນ.

            ປະທານ ບໍລິສັດ ອະນຸລັກ ຊີວະນາໆພັນກ່າວວ່າ: ເພື່ອແກ້ ໄຂປາກົດການຫຍໍ້ທໍ້ຕ່າງໆທີ່ເກີດ ຂຶ້ນໃນໄລຍະຜ່ານມາ, ບໍລິສັດກໍໄດ້ນຳເອົາສ່ວນໜຶ່ງຂອງລາຍຮັບຈາກການໃຫ້ການບໍລິການທ່ອງທ່ຽວຊຸກ ຍູ້ເຂົ້າໃນການປົກ ປັກຮັກສາ ແລະ ອະນຸລັກ ປ່າສະຫງວນດັ່ງກ່າວຫຼາຍຮ້ອຍລ້ານກີບຕໍ່ປີປະກອບ ສ່ວນເຂົ້າໃນກອງທຶນອະນຸລັກປ່າໄມ້ - ສັດປ່າ, ຄ່າໃຊ້ຈ່າຍໃຫ້ໜ່ວຍງານ ລາດຕາເວັນ, ເຈົ້າໜ້າທີ່ກວດກາ ແລະ ຈ່າຍຄ່າບຸກເບີກນາໃຫ້ປະຊາຊົນເພື່ອໃຫ້ເຂົາເຈົ້າປະລະການຖາງປ່າ ເຮັດໄຮ່ໃຫ້ຫັນ ລົງມາເຮັດນາ ແຕ່ ສະພາບການຕ່າງໆເປັນຕົ້ນ: ການຖາງປ່າເຮັດໄຮ້ແບບເລື່ອນລອຍ, ການລັກລອບຕັດໄມ້, ລັກລອບຈູດປ່າ ແລະ ລ່າສັດຢ່າງຜິດກົດໝາຍຢູ່ເຂດປ່າສະຫງວນດັ່ງກ່າວຍັງມີໃຫ້ເຫັນ. ທ່ານຍັງຮຽກຮ້ອງພາກສ່ວນຕ່າງໆທີ່ກ່ຽວຂ້ອງຈົ່ງ ເຫັນຄວາມສຳຄັນ ແລະ ຄວາມຈຳເປັນຂອງການແກ້ໄຂບັນຫາດັ່ງກ່າວໂດຍໄວ.

            ປ່າສະຫງວນແຫ່ງຊາດ ນ້ຳກ່ານ ເປັນປ່າສະຫງວນແຫ່ງຊາດອັນດັບທີ 21 ຂອງປະເທດ, ມີເນື້ອ ທີ່ກວ້າງໃຫຍ່ເປັນ ອັນດັບ ທີ 5 ຂອງປະເທດ (136.000 ເຮັກ ຕາ) ເຊິ່ງກວມເອົາເນື້ອທີ່ປ່າໄມ້ ຂອງ 3 ເມືອງ ຄື ເມືອງຫ້ວຍຊາຍ, ເມືອງ ເມິງ ແຂວງ ບໍ່ແກ້ວ ແລະ ເມືອງວຽງພູຄາ ແຂວງຫຼວງນ້ຳທາ, ແຕ່ເນື້ອ ທີ່ສ່ວນໃຫຍ່ແມ່ນນອນຢູ່ເມືອງຫ້ວຍຊາຍ, ເປັນປ່າສະຫງວນ ແຫ່ງຊາດທີ່ມີຄວາມອຸດົມສົມບູນໄປດ້ວຍ ປ່າໄມ້ ແລະ ສັດປ່ານາໆຊະນິດເໝາະຕໍ່ການທ່ອງທ່ຽວທາງທຳມະຊາດ ແລະ ເປັນບ່ອນພັກຜ່ອນຢ່ອນໃຈ ຂອງນັກທ່ອງທ່ຽວ. ດັ່ງນັ້ນ, ໃນປີ 2003 ມີນັກລົງທຶນຈາກປະເທດ ຝຣັ່ງ ໄດ້ສ້າງຕັ້ງບໍລິສັດ ອະນຸລັກຊີ ວະນາໆພັນຂຶ້ນ ໂດຍມີຈຸດປະສົງເພື່ອຫາຊ່ອງທາງໃນການອະນຸລັກ ແລະ ປົກປັກຮັກສາຊີວະນາໆພັນ ເພື່ອໃຫ້ນັກທ່ອງທ່ຽວຈາກປະເທດຕ່າງໆເຂົ້າມາຮັບຊົມໂດຍທາງບໍລິສັດໄດ້ສ້າງຕູບເທິງຕົ້ນໄມ້ ແລະ ເນັ່ງ ສາຍສະລິງຫຼາຍສາຍຕາມຮ່ອມພູໃນປ່າເພື່ອໃຫ້ນັກທ່ອງທ່ຽວໄດ້ຊົມທັດສະນິຍະພາບ ແລະ ຊີວະນາໆພັນ ທີ່ຢູ່ໃນເຂດປ່າສະຫງວນແຕ່ປ່າສະຫງວນດັ່ງກ່າວມັກຖືກລົບກວນ ແລະ ທຳລາຍ ໂດຍຜູ້ຄົນທີ່ບໍ່ຫວັງດີ ເລື້ອຍໆຈົນເຮັດໃຫ້ເນື້ອທີ່ປ່າໄມ້ຢູ່ໃນເຂດດັ່ງກ່າວສູນເສຍໄປເປັນບໍລິເວນກວ້າງ ແລະ ສັດປ່າຫຼາຍຊະ ນິດຖືກຂົມຂູ່ໂດຍພວກນາຍພານເຊິ່ງນອກຈາກສົ່ງຜົນກະທົບຕໍ່ແຫຼ່ງທ່ອງທ່ຽວທາງທຳມະຊາດແລ້ວຍັງ ສົ່ງຜົນກະທົບຕໍ່ສະພາບແວດລ້ອມອີກດ້ວຍ. ແຕ່ອຳນາດການປົກຄອງທ້ອງຖິ່ນ ແລະ ພາກສ່ວນທີ່ກ່ຽວ ຂ້ອງຂອງເມືອງ ແລະ ແຂວງຍັງຂາດເຂີນບຸກຄະລາກອນ, ພາຫະນະ ແລະ ເຄື່ອງມືຕ່າງໆທີ່ຈຳເປັນຮັບໃຊ້

ເຂົ້າໃນການແກ້ໄຂ ແລະ ຄຸ້ມຄອງປ່າສະຫງວນແຫ່ງນີ້.