ການແກ້ໄຂບັນຫາສິ່ງເສບຕິດຕ້ອງເລີ່ມຈາກໃສ ? ( ຄໍລຳ ແລກປ່ຽນຄຳເຫັນ )

ໂດຍ : ແສງສຸລີ ຍາມອາລຸນ

      ການແກ້ໄຂບັນຫາເພື່ອຊ່ວຍ ເຮັດໃຫ້ສັງຄົມໜ້າຢູ່ຂຶ້ນມີຫລາຍຄົນໄດ້ມີຄຳຖາມ ແລະ ຄຳຕອບ ວ່າ: “ການທີ່ຈະກຳຈັດ ຢາບ້າ ອອກໄປໃຫ້ໝົດຈາກປະເທດລາວ ນີ້ຕ້ອງເຮັດແບບໃດ ? ຄຳຕອບ ມັນມີຫລາຍວິທີ ແຕ່ລະວິທີບໍ່ແມ່ນວ່າຈະເຮັດໄດ້ ງ່າຍແຕ່ມັນກໍບໍ່ແມ່ນບໍ່ສາມາດເຮັດໄດ້. ມີຄຳເຫັນບອກວ່າ: ກ່ອນອື່ນໝົດແມ່ນສະຖາບັນຄອບຄົວຕ້ອງເປັນຈຸດເລີ່ມຕົ້ນທີ່ດີ ໃນການສ້າງສາຍພົວພັນກັບລູກໆຂອງຕົນອັນເປັນຈຸລັງສຳຄັນໃນສັງຄົມນັ້ນ. ນັບແຕ່ມື້ລູກເກີດມາພໍ່ແມ່ເປັນຄົນເລີ່ມບົ່ມ ສອນເດັກເຮັດໃຫ້ເຂົາເຫັນໄດ້ຄວາມດີຄວາມຊົ່ວອັນນີ້ແມ່ນພື້ນຖານຕົ້ນຕໍຂອງສະຖາບັນຄອບຄົວ”. ທີ່ຜ່ານມາ, ພວກເຮົາ ສັງເກດເຫັນບໍ່ວ່າ: ສະຖາບັນຄອບຄົວທີ່ອ້າງເຖິງນີ້ໄດ້ເຮັດຫຍັງແດ່ ? ທີ່ເປັນເຈົ້າການໃນການອົບຮົມລູກເຕົ້າຂອງເຂົາເຈົ້າ ໃຫ້ເປັນຄົນດີເມື່ອເຂົາເຈົ້າໃຫຍ່ມາຈະບໍ່ສ້າງບັນຫາໃຫ້ສັງຄົມ ? ເຮັດແນວໃດວິທີສອນລູກມີນັກວິຊາການບອກວ່າ: “ການ ສອນລູກແຕ່ບໍ່ແມ່ນການຮ້າຍລູກໃນເມື່ອລູກເກີດມີພຶດຕິກຳອັນບໍ່ເໝາະສົມ, ແຕ່ຄວນເປັນການອະທິບາຍບັນຫາໃຫ້ລູກ ເຂົ້າໃຈ, ອະທິບາຍຜົນດີ ແລະ ບັນຫາໃຫ້ລູກໃນແຕ່ລະດ້ານ. ກ່ອນພໍ່ແມ່ຈະສອນລູກໄດ້ແນວນັ້ນພໍ່ແມ່ຕ້ອງເປັນແບບ ຢ່າງທີ່ດີໃນການປະພຶດຂອງຕົນໃຫ້ເປັນປະໂຫຍດຕໍ່ຄອບຄົວຊັກຊວນລູກບໍ່ໃຫ້ລູກຢູ່ລ້າໆພາຍຫລັງກັບມາແຕ່ໂຮງຮຽນຫາກ

ວ່າພໍ່ແມ່ບໍລິຫານເວລາໃຫ້ພໍເໝາະ ເພື່ອສະກັດກັ້ນບໍ່ໃຫ້ລູກມີເວລາວ່າງເພື່ອໄປເຮັດຢ່າງອື່ນທີ່ໄຮ້ປະໂຫຍດຈະເປັນການດີທີ່ ສຸດ. ຖາມວ່າເປັນຫຍັງຄອບຄົວທີ່ຄົນທັງຫລາຍວ່າເປັນຄອບຄົວດຸໝັ່ນນັ້ນ ຈຶ່ງມີໂອກາດໜ້ອຍທີ່ລູກຈະໄປມົ້ວກັບຢາເສບ ຕິດ ? ຫລື ໜ້ອຍທີ່ສຸດທີ່ລູກຂອງເຂົາເຈົ້າຈະໄປຕິດຢາບ້າ ? ເປັນຫຍັງເປັນແນວນັ້ນ ? ເພາະວ່າຄອບຄົວນັ້ນມີການບໍລິຫານ ເວລາທີ່ດີພໍ່ແມ່ຈະຈັດການວຽກງານໃຫ້ລູກແຕ່ລະຄົນຢ່າງເໝາະສົມໃນແຕ່ລະມື້, ລູກແຕ່ລະຄົນນັບແຕ່ການກັບມາຈາກໂຮງ ຮຽນຈົນຮອດຄ່ຳມືດເຂົາເຈົ້າຈະມີວຽກຕະຫລອດເວລາການມີວຽກບໍ່ວ່າງມືຍາມໃດນັ້ນເປັນເລື່ອງທີ່ດີທີ່ພາໃຫ້ຄົນເຮົາບໍ່ຄິດ ຫລາຍເພາະໃຊ້ເວລາສຸມໃສ່ແຕ່ວຽກເມື່ອແລ້ວວຽກກໍຄ່ຳມືດແລ້ວຊິຫາທາງໄປແນວອື່ນມັນກໍໝົດເວລາໄປແລ້ວຊ່ວຍໃຫ້ ລູກໆໃຊ້ເວລາໃຫ້ເປັນປະໂຫຍດຫລຸດຜ່ອນຄວາມຄິດທີ່ຈະໄປທາງອື່ນຢ່າງມີປະສິດທິຜົນ. ໃນຂະນະດຽວກັນພໍ່ແມ່ກໍຢ່າລືມ ຕ້ອງເວົ້າໂອ້ລົມກັບລູກຢ່າງມີສິນລະປະຫ້າມຮ້າຍໃຫ້ລູກຢ່າງເດັດຂາດຕ້ອງໃຊ້ການອະທິບາຍຊີ້ແຈງເຫດຜົນເທົ່ານັ້ນພໍການ ອະທິບາຍນັ້ນຄືການໃຊ້ຫລັກການເຫດ ແລະ ຜົນໃຫ້ຫລາຍທີ່ສຸດຫາກແມ່ນວ່າພໍ່ແມ່ເຮັດແບບນີ້ກັບລູກນັບແຕ່ມື້ທີ່ລູກຮູ້ ຄວາມ ແລະ ສຳຜັດກັບສັງຄົມແລ້ວນັບແຕ່ການເບິ່ງໜັງ, ຟັງເພງ, ລະຄອນໂທລະພາບນັ້ນກໍສຳຄັນ, ແຕ່ເວລາເບິ່ງຕ້ອງອະ ທິບາຍໃຫ້ລູກເຫັນ ແລະ ເຂົ້າໃຈບັນຫາທີ່ສະທ້ອນອອກມາໃນລະຄອນໂທລະພາບການທີ່ເຮັດແນວນັ້ນແມ່ນເຮົາຕ້ອງສະ ແດງຄວາມຄິດເຫັນໃຫ້ລູກຮູ້ເລື່ອງໃດທີ່ຖືກຕ້ອງ ແລະ ຜິດພາດຫາກວ່ານຳມາໃຊ້ໃນຊີວິດຈິງ. ສະນັ້ນ ມັນຈຶ່ງມີຄວາມສຳ ຄັນສຳລັບຊີວິດຂອງຜູ້ເປັນລູກກໍຄືພໍ່ແມ່. ມີບາງທ່ານພັດໃຫ້ທັດສະນະວ່າ: “ຈຳກັດສື່ຕ່າງໆທີ່ມີລັກສະນະບໍ່ເໝາະບໍ່ຄວນ ໃຫ້ໝົດເພື່ອບໍ່ໃຫ້ຄົນເບິ່ງແລ້ວນຳໄປເປັນແບບໃນການດຳລົງຊີວິດ” ທັດສະນະແບບນີ້ມັນອາດບໍ່ສາມາດເຮັດໄດ້ຢ່າງງ່າຍດາຍ ເທົ່າໃດເພາະໂລກເຕັກໂນໂລຊີມັນໄປໄກເກີນທີ່ເຮົາອາດຄວບຄຸມໄດ້. ສະນັ້ນ ຈຶ່ງເຫັນວ່າມັນມີວິທີດຽວທີ່ຈະສ້າງສັນສັງຄົມ ໄດ້ໂດຍການສັ່ງສອນອົບຮົມລູກເຕົ້າໃຫ້ຮູ້ເຫັນໂທດຂອງຢາເສບຕິດ ຫລື ຢາບ້າ. ຫາກແຕ່ລະຄອບຄົວເຮັດແນວ ນັ້ນໄດ້ ກໍຈະ ຊ່ວຍໃຫ້ສັງຄົມລວມໄປເຖິງສະຖາບັນຄອບຄົວໃນສັງຄົມລາວຈະສົມບູນໄດ້. ນອກຈາກນີ້ແລ້ວ, ຍັງມີຫລາຍທາງທີ່ເຮົາຈະ ສາມາດຊ່ວຍກັນໂດຍສະເພາະແມ່ນສະຖາບັນຕ່າງໆບໍ່ວ່າອົງການຂອງລັດ, ເອກະຊົນ ແລະ ທຸກໆອົງການຈັດຕັ້ງໃນສັງຄົມ ລາວຫາກເປັນເຈົ້າການຮ່ວມກັນແນ່ນອນວ່າຕ້ອງເຮັດໄດ້.