ນາຍົກເຂົ້າຮ່ວມພິທີຫລອມຄໍາໂອບຍອດພະທາດຫລວງ

           ພິທີຫລອມຄໍາໂອບຍອດພະທາດຫລວງວຽງຈັນ, ໄດ້ມີຂຶ້ນໃນຕອນບ່າຍວັນທີ 2 ຕຸລານີ້, ໂດຍມີທ່ານນາຍົກລັດຖະມົນຕີ ທອງລຸນ ສີສຸລິດ, ພ້ອມດ້ວຍຊາວນະຄອນຫລວງວຽງຈັນເຂົ້າຮ່ວມພິທີສໍາຄັນດັ່ງກ່າວຢ່າງຫລວງຫລາຍ.

            ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫລວງວຽງ ຈັນ ທັງເປັນຮອງປະທານຄະນະກໍາມະການປະຕິສັງຂອນພິພິທະພັນພະທາດຫລວງວຽງຈັນ ກ່າວວ່າ: ເນື່ອງໃນໂອກາດວັນກໍ່ສ້າງອົງພະທາດຫລວງວຽງຈັນໝູນວຽນມາບັນຈົບ

ຄົບຮອບ 450 ປີ, ທັງເປັນການປົກປັກຮັກສາພະທາດຫລວງທີ່ເປັນມໍລະດົກ ແລະ ມິ່ງຂວັນຂອງປວງຊົນລາວ ແລະ ເພື່ອເຮັດໃຫ້ງານສະເຫລີມສະຫລອງການສ້າງຕັ້ງພະທາດຫລວງຄົບຮອບ 450 ທີ່ຈະຈັດຂຶ້ນແຕ່ວັນທີ 12-14 ພະຈິກທີ່ຈະເຖິງນີ້ໃຫ້ດໍາເນີນໄປຢ່າງຄືກຄື້ນຕາມຮີດຄອງປະເພນີວັດທະນາທໍາອັນດີງາມຂອງຊາດ. ໃນໄລຍະຜ່ານມາຄະນະປະຕິສັງຂອນຄັ້ງທີ IV ໄດ້ລະດົມທຶນຮອນ, ວັດຖຸປັດໃຈຈາກປະຊາຊົນລາວທັງພາຍໃນ ແລະ ຕ່າງປະ ເທດ, ໂດຍສະເພາະຊາວນະຄອນຫລວງວຽງຈັນເຂົ້າໃນການປະຕິສັງຂອນພະທາດດັ່ງກ່າວຄື: ຄໍາຈໍານວນ 11 ກິໂລ, 24 ບາດ, 3 ສະຫລຶງ ແລະ 5 ຫູນ, ເງິນຈໍານວນ 167.750.000 ກີບ, 2.052.940 ບາດ(ສະກຸນເງິນໄທ), 345 ໂດລາສະຫະລັດ ແລະ 500 ຢວນ(ສະກຸນເງິນຈີນ).

      ທ່າຮອງເຈົ້າຄອງນະຄອນຫລວງກ່າວວ່າ: ສໍາລັບການປະຕິສັງຂອນພະທາດຫລວງຄັ້ງນີ້ແມ່ນການສືບຕໍ່ບູລະນະໜ້າວຽກສໍາຄັນຄື: ໂອບຄໍາຈອມພະທາດ, ໂບກຮອຍແຕກແຫງ ແລະ ຫໍໄຫວທັງ 4 ເບື້ອງ, ທາສີຄໍາອົງພະທາດໃຫຍ່-ນ້ອຍສາມສີບລູກ-ພະທາດສີທໍາມະຫາຍໂສກ ແລະ ກໍກວມ, ສ້ອມ ແປງຫລັງຄາກົມມະລຽນຄືນໃໝ່, ສ້ອມແປງປະຕູໃຫຍ່ 4 ເບື້ອງ, ປັບປຸງພື້ນ, ຮ່ອງນໍ້າ, ລະບຽງ ແລະ ລະບົບໄຟຟ້າ, ຊຶ່ງມີຄວາມຕ້ອງການທຶນທັງໝົດປະມານ 15 ຕື້ກີບເພື່ອປະຕິສັງຂອນພະທາດຫລວງວຽງຈັນໃຫ້ມີຄວາມຮຸ່ງເຮືອງສວຍງາມຄຽງຄູ່ຊາດລາວຕະຫລອດໄປ.