ຍັງມີໄວໜຸ່ມຍິງຈຳນວນຫຼາຍເສຍຊີວິດໃນໄລຍະການຖືພາ ແລະ ເກີດລູກ

          ຜູ້ຕາງໜ້າອົງການສະຫະປະຊາຊາດກອງທຶນສຳລັບປະຊາກອນປະຈຳລາວກ່າວໃນພິທີສະ ເຫຼີມສະຫຼອງວັນໄວໜຸ່ມສາກົນເມື່ອມໍ່ໆມານີ້ວ່າ: ປັດຈຸບັນໃນທຸກໆມື້ຢູ່ທົ່ວໂລກຍັງມີແມ່ຍິງຫຼາຍກວ່າ 500 ຄົນເສຍຊີວິດໃນໄລຍະການຖືພາ ແລະ ເກີດລູກ ແລະ ມີ 100 ລ້ານກວ່າຄົນທີ່ຕ້ອງການຄວາມຊ່ວຍຍເຫຼືອດ້ານມະນຸດສະທຳ, ໃນນັ້ນຫຼາຍກວ່າ 25 ລ້ານຄົນແມ່ນແມ່ຍິງ ແລະ ເດັກຍິງໃນໄວຈະ ເລີນພັນ ແລະ ເກືອບ 60 ລ້ານຄົນແມ່ນໄດ້ຮັບຜົນກະທົບໂດຍກົງຈາກຄວາມຂັດແຍ່ງ, ຊຶ່ງຫຼາຍທີ່ສຸດແມ່ນນັບແຕ່ສົງຄາມໂລກຄັ້ງທີ່ສອງສິ້ນສຸດລົງ ແລະ ສປປລາວເອງກໍເປັນໜຶ່ງໃນນັ້ນ, ດັ່ງນັ້ນປະເທດຕ່າງໆຕ້ອງໄດ້ລິ ເລີ່ມ

ສຶກສາເຖິງຄວາມຕ້ອງການຂອງແມ່ຍິງ, ເພື່ອເຮັດແນວໃດໃຫ້ແມ່ຍິງສາມາດລອດຊີວິດຈາກເຫດການທີ່ມີຄວາມສຽງ, ການເຂົ້າເຖິງການບໍລິການດ້ານສຸຂະພາບ ແລະ ການຊ່ວຍເຫຼືອທີ່ເຂົາເຈົ້າສາມາດເຂົ້າເຖິງໄດ້, ພ້ອມນັ້ນກໍຈະຕ້ອງໄດ້ມີກາລົງທືນໃສ່ມາດຕະການປ້ອງກັນ ແລະ ວິທີຮັບມືກັບຜົນກະທົບ ຫຼື ວິກິດການຕ່າງໆທີ່ອາດຈະເກີດຂຶ້ນໃນປັດຈຸບັນ ແລະ ສິ່ງສຳຄັນແມ່ນລັດຖະບານຂອງແຕ່ລະປະເທດຈະຕ້ອງໄດ້ຄຳນຶງເຖິງຮູບແບບຂອງການຮັບມືກັບຄວາມສ່ຽງ ແລະ ສິ່ງທ້າທາຍຕ່າງໆໃນວຽກງານດັ່ງກ່າວ, ໂດຍສະເພາະແມ່ນການຈັດຕັ້ງປະຕິບັດສິດທິພື້ນຖ່ານ, ພ້ອມນັ້ນກໍຕ້ອງມີການເຊື່ອມໂຍງລະຫວ່າງການຊ່ວຍເຫຼືອດ້ານມະນຸດສະທຳ ແລະ ການພັດທະນາເຂົ້າຫາກັນ, ເພື່ອເຮັດແນວໃດໃຫ້ແມ່ຍິງ ແລະ ເດັກຍິງໄດ້ຮັບການຊ່ວຍເຫຼືອໄດ້ທົ່ວເຖິງ.