ສະພາຮັບຮອງເອົາກົດໝາຍວ່າດ້ວຍການຕິດຕາມກວດກາຂອງສະພາ

          ເຊົ້າວັນທີ 15 ພະຈິກນີ້, ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 8, ພາຍໃຕ້ການເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດໄດ້ຮັບຮອງເອົາກົດໝາຍວ່າດ້ວຍການຕິດຕາມກວດກາຂອງ ສະພາແຫ່ງຊາດ ແລະ ສະພາປະຊາຊົນຂັ້ນສະບັບປັບ ປຸງ, ຊຶ່ງໄດ້ກຳນົດເຂົ້າໃໝ່ 3 ພາກ, 6 ໝວດ, 58 ມາດຕາ, ຊຶ່ງໄດ້ມີການປັບປຸງ 27 ມາດຕາ ແລະ ຮັກ ສາໄວ້ 18 ມາດຕາ ແລະ ເຖິງວ່າການຈັດຕັ້ງປະຕິບັດໃນຜ່ານມາມີຄວາມເປັນລະບົບ, ລະບຽບ ແລະ ມີປະສິດທິຜົນເປັນຢ່າງດີ, ແຕ່ເນື່ອງຈາກມີການປັບປຸງລັດ ຖະທຳມະນູນ, ກົດໝາຍວ່າດ້ວຍສະພາແຫ່ງຊາດ, ໂດຍ

ສະເພາະໄດ້ມີການປັບປຸງກົງ ຈັກການປົກຄອງໃໝ່ ແລະ ມີການສ້າງຕັ້ງສະ ພາປະຊາຊົນຂັ້ນແຂວງ, ມີການອອກ ກົດໝາຍວ່າດ້ວຍສະພາປະຊາຊົນຂັ້ນແຂວງ, ຈຶ່ງມີຄວາມຈຳເປັນຕ້ອງໄດ້ປັບປຸງກົດໝາຍດັ່ງກ່າວ ເພື່ອເຮັດໃຫ້ກົດໝາຍສະບັບນີ້ມີຄວາມລະອຽດ, ຄົບຖ້ວນສອດຄ່ອງກັບພາລະ ບົດບາດ, ສິດ ແລະ ໜ້າທີ່ຕາມທີ່ໄດ້ກຳນົດໄວ້ໃນກົດໝາຍທີ່ກ່ຽວຂ້ອງດັ່ງກ່າວ.

ທ່ານ ສົມພັນ ແພງຄຳມີ ປະທານກອງປະຊຸມ ໄດ້ມີຄຳເຫັນເຈາະຈີ້ມ ແລະ ໃຫ້ທິດ ຊີ້ນຳການປະກອບຄຳເຫັນເຂົ້າໃສ່ໃນແຕ່ລະດ້ານຂອງຮ່າງກົດໝາຍສະບັບປັບປຸງນີ້ຢ່າງລະອຽດແຕ່ລະໝວດ, ແຕ່ລະພາກ ແລະ ແຕ່ລະມາດຕາ ທີ່ເຫັນວ່າຍັງບໍ່ທັນລະອຽດ, ຮັດກຸມ ແລະ ມີຄວາມຈຳເປັນ ຕ້ອງໄດ້ເພີ່ມເນື້ອໃນຕ່າງໆເຂົ້າໃສ່ເພື່ອຮັບປະກັນ ເຮັດໃຫ້ຮ່າງກົດ ໝາຍສະບັບດັ່ງກ່າວ ມີເນື້ອໃນຄົບຖ້ວນສົມບູນ,​ ທັງສາມາດຮັບປະກັນໄດ້ຕາມລະດັບຄາດ ໝາຍໃນການຈັດຕັ້ງປະຕິບັດໃນຕໍ່ໜ້າ.

          ທ່ານນາງ ສວນສະຫວັນ ວິຍະເກດ ສະມາຊິກສະພາແຫ່ງຊາດ ປະຈຳເຂດເລືອກ ຕັ້ງທີ 14 ແຂວງສາລະວັນ, ໄດ້ມີຄຳເຫັນໃສ່ກົດໝາຍສະບັບນີ້ວ່າ: ໃນມາດຕາ 6, 8, 13, 21 ແລະ 24 ເຫັນວ່າເນື້ອໃນຍັງບໍ່ທັນກົມກຽວກັນ, ໂດຍສະເພາະວັກຂອງກົດໝາຍທີ່ເວົ້າ ເຖິງການລະເມີດກົດໝາຍ ຄວນໃຫ້ມີການແຍກອອກເປັນແຕ່ລະດ້ານ ເພື່ອສາມາດກຳນົດ ເນື້ອໃນ ແລະ ໃຈຄວາມຂອງກົດໝາຍໃຫ້ມີຄວາມລະອຽດ ແລະ ຄົບຖ້ວນຕື່ມ.

          ພາຍຫລັງການປະກອບຄຳເຫັນຂອງສະມາຊິກສະພາແຫ່ງຊາດ ແຕ່ລະເຂດເລືອກ ຕັ້ງ, ຕາງໜ້າອະນຸກຳມະການກົດໝາຍຂອງສະພາແຫ່ງຊາດ ໄດ້ຂຶ້ນຊີ້ແຈງແຕ່ລະບັນຫາ ທີ່ຜູ້ແທນມີຄວາມສົນ ໃຈແລ້ວ, ປະທານກອງປະຊຸມ ໄດ້ສະຫລຸບສັງລວມການປະກອບຄຳເຫັນຂອງສະມາຊິກ, ພ້ອມທັງລົງຄະແນນສຽງຮັບຮອງເອົາຮ່າງກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງສະບັບປັບປຸງດ້ວຍຄະແນນສຽງສ່ວນຫລາຍ.