ເພື່ອຄວາມຢູ່ດີກິນດີຂອງປະຊາຊົນ

ໂດຍ : ວິເສດ ສະແຫວງສຶກສາ

     ເປົ້າໝາຍສູ້ຊົນໃຫ້ປະເທດຮັ່ງມີ, ຜາສຸກ, ປະຊາຊົນຢູ່ດີກິນດີນັ້ນ ເຖິງຈະບໍ່ໄດ້ກຳນົດໄວ້ເປັນຄຳຂວັນ, ເປັນບົດກະວີ ໃຫ້ຟັງມ່ວນຊວນຈື່, ແຕ່ລັດຖະບານຂອງທຸກໆປະເທດກໍຖືເປັນວຽກບູລິມະສິດ. ຢູ່ ສປປ ລາວ ພວກເຮົາເປົ້າ ໝາຍຮັບປະ ກັນຄວາມຢູ່ດີກິນດີຂອງປະຊາຊົນລາວນັ້ນຕິດພັນໂດຍກົງກັບແຜນຍຸດທະສາດໃນການຫລຸດຜ່ອນກ້າວໄປເຖິງບ່ອນລຶບລ້າງ ຄວາມທຸກຍາກຢ່າງສິ້ນເຊີງ. ກ່ອນອື່ນໝົດໃນອີກ 7 ປີ ຂ້າງໜ້ານີ້ (ປີ 2020) ຕ້ອງສາມາດຍ້າຍສຳມະໂນຄົວ ສປປ ລາວ ພວກເຮົາອອກຈາກສະພາບດ້ອຍພັດທະນາ.

    ງວາກໄປເບິ່ງປະເທດຢູ່ອ້ອມຂ້າງອ້ອມແອວພວກເຮົາ, ຜູ້ຂຽນຮູ້ສຶກອຸ່ນໃຈຂຶ້ນທີ່ຮູ້ວ່າ: ຄວາມຢູ່ດີກິນດີຂອງປະຊາຊົນ ແມ່ນຍອດປາຖະໜາຂອງລັດຖະບານທຸກໆປະເທດ. ຍິ່ງໄປກວ່ານັ້ນ, ປະຊາຄົມສາມເສົາຄ້ຳອາຊຽນ ເຊິ່ງຈະສ້າງໃຫ້ສຳເລັດ ພາຍໃນປີ 2015 ນີ້ ຍັງຖືເອົາປະຊາຊົນເປັນໃຈກາງບໍ່ວ່າຈະເປັນເສົາຄ້ຳທາງການເມືອງ-ຄວາມໝັ້ນຄົງ, ເສດຖະກິດ ກໍຄືດ້ານ ສັງຄົມ-ວັດທະນະທຳ. ຕົວຢ່າງທີ່ຢັ້ງຢືນເຖິງຄວາມພະຍາຍາມດັ່ງກ່າວຂອງແຕ່ລະປະເທດນັ້ນພໍສັງລວມໄດ້ດັ່ງນີ້ ຄືໃນເດືອນ ກຸມພາຜ່ານມາ, ລັດຖະບານມາເລເຊຍໄດ້ປະກາດປຸກເຮືອນລາຄາຖືກໃຫ້ປະຊາຊົນຊື້ເອົາຈຳນວນ 20.000 ຫລັງ. ໂຄງການນີ້ ຈະເລີ່ມຂຶ້ນພາຍຫລັງການເລືອກຕັ້ງເຊິ່ງຈະມີຂຶ້ນໃນຕໍ່ໜ້ານີ້. ບໍ່ພຽງແຕ່ເທົ່ານັ້ນ, ລັດຖະບານຍັງຈະສ້າງລົດໄຟສາຍດ່ຽວ ບໍລິ ການປະຊາຊົນທີ່ອາໄສຢູ່ເຮືອນລາຄາປະຢັດເຫລົ່ານັ້ນ. ໃນທ້າຍເດືອນມັງກອນປີນີ້, ຢູ່ປະເທດຟີລິບປິນ, ປະທານາທິບໍດີ

ອາກີໂນໄດ້ເຊັນຮັບຮອງເອົາກົດໝາຍວ່າດ້ວຍການປົກປ້ອງສິດ ແລະ ສົ່ງເສີມສະຫວັດດີພາບຂອງຄົນຮັບໃຊ້ປະຈຳຄອບຄົວ. ກົດໝາຍສະບັບນີ້ເຮັດໜ້າທີ່ເປັນພື້ນຖານດ້ານນິຕິກຳໃນການກຳນົດລະດັບຄ່າແຮງງານໜ້ອຍສຸດກໍຄືຜົນປະໂຫຍດອືນໆສຳ ລັບຜູ້ປະກອບອາຊີບເປັນຄົນໃຊ້ປະຈຳຄອບຄົວໃນທົ່ວປະເທດເຊິ່ງມີປະມານ 2 ລ້ານຄົນ. ໃນໄລຍະດຽວກັນນີ້ ຢູ່ກຳປູເຈຍ, ກອງປະຊຸມກ່ຽວກັບວຽກງານພັດທະນາສັງຄົມ ແລະ ຄວາມໝັ້ນຄົງດ້ານພັດທະນາຊັບພະຍາກອນມະນຸດ ກໍໄດ້ຊຸກຍູ້ໃຫ້ສະ ມາຄົມຜະລິດເຄື່ອງນຸ່ງຂຶ້ນເງິນເດືອນໃຫ້ພະນັກງານຂະແໜງການຜະລິດ ເຄື່ອງນຸ່ງ ແລະ ເກີບຈາກລະດັບ ເງິນເດືອນໜ້ອຍສຸດ 61 ໂດລາຕໍ່ ເດືອນ ເປັນ 120 ໂດລາຕໍ່ເດືອນ. ກຳປູເຈຍມີພະນັກງານຕັດຫຍິບຈຳນວນ 335.400 ຄົນ, ໃນນັ້ນ 91% ແມ່ນ ເພດຍິງ. ຢູ່ສິງກະໂປ, ລັດຖະບານໄດ້ປະກາດເພີ່ມລາງວັນເງິນສົດໃຫ້ຄອບຄົວທີ່ມີເດັກເກີດໃໝ່ເພື່ອກະຕຸ້ນການເກີດ ໃຫ້ໄດ້ ຕາມແຜນເພີ່ມພົນລະເມືອງ. ນະໂຍບາຍນີ້ປະກາດອອກມາໃນທ້າຍເດືອນມັງກອນຜ່ານມານີ້ເອງ. ສຳລັບຜູ້ທີ່ມີລູກ 2 ຄົນທຳ ອິດຈະໄດ້ຮັບເງິນລາງວັນຈຳນວນ 6 ພັນໂດລາສິງກະໂປ ເພີ່ມຈາກ 3 ພັນໂດລາໃນເມື່ອກ່ອນ. ສຳລັບຜູ້ທີ່ມີລູກຄົນທີ 3 ແລະ ທີ 4 ຈະໄດ້ຮັບລາງວັນເພີ່ມເປັນ 8 ພັນ ໂດລາສິງກະໂປ. ສຳລັບຜູ້ເປັນພໍ່ ນັ້ນກໍມີສິດລາພັກໄປລ້ຽງລູກໄດ້ໂດຍມາດຕະຖານ ດຽວກັບການລາພັກເພື່ອເກີດລູກຄື 16 ເດືອນ. ຢູ່ ສປ ຈີນ ເຊິ່ງເປັນປະເທດຮຸ້ນສ່ວນໃນອາຊຽນ+3 ນັ້ນ ກໍປະກາດຂຶ້ນຄ່າ ແຮງງານຂັ້ນຕ່ຳເພື່ອຫລຸດຊ່ອງຫວ່າງຄົນຮັ່ງກັບຄົນທຸກຍາກ. ແຫລ່ງຂ່າວແຈ້ງວ່າ: ແຮງງານຂັ້ນຕ່ຳຈະເພີ່ມຂຶ້ນ 40% ຂອງ ເງິນເດືອນສະເລ່ຍ.

    ຂໍປິດທ້າຍໂດຍເລື່ອງທີ່ເກີດຂຶ້ນຢູ່ຂອບຟ້າແດນໄກ, ແຕ່ເປົ້າໝາຍແມ່ນເພື່ອຄວາມຢູ່ດີກິນດີຂອງປະຊາຊົນພົນລະ ເມືອງໃນ ປະເທດນັ້ນຄືທ່ານນາງ ຈອຍ ບັນດາປະທານາທິບໍດີປະເທດມາລາວີ (ອາຟຣິກກາ) ປະກາດຂາຍຍົນປະຈຳຕຳແໜ່ງເພື່ອເອົາ ເງິນໄປຊ່ວຍປະຊາຊົນທີ່ທຸກຍາກ. ການເປີດປະມູນຂາຍເຮືອບິນ 14 ບ່ອນ ນັ່ງດັ່ງກ່າວມີຂຶ້ນໃນວັນທີ 20 ກຸມພາຜ່ານມາ ນັບ ແຕ່ມື້ເຂົ້າຮັບຕຳແໜ່ງໃນເດືອນເມສາ 2012, ທ່ານນາງ ຈອຍບັນດາ ປະຕິເສດ ທີ່ຈະເດີນທາງໂດຍເຮືອບິນພິເສດດັ່ງກ່າວ. ຕົວຢ່າງເດັດໆຂອງປະທານາທິບໍດີປະເທດມາລາວີໄດ້ກາຍເປັນເລື່ອງກ່າວຂານກັນໃນທົ່ວໂລກ.