laophatthananewspaper: ໄລຍະປີໃໝ່ຫວຽດນາມ ແລະ ຈີນ ເປັນໂອກາດໜຶ່ງໃຫ້ນັກທ່ອງທ່ຽວຈີນເຂົ້າໄປເມືອງຫລວງພະບາງຫລາຍຂຶ້ນ

ເມືອງຫລວງພະບາງທີ່ເປັນເມືອງເກົ່າທີ່ມີຊື່ສຽງຂອງລາວ ເຊິ່ງຖືກອົງການການສຶກສາ, ວິ ທະຍາສາດ ແລະ ວັດທະນະທຳ ຫລື ຢູເນັດສໂກ ຈັດເຂົ້າໃນບັນຊີລາຍຊື່ມໍລະດົກໂລກ ໃນປີ 1995. ໃນຫລາຍມື້ມານີ້ ມີຄົນອັ່ງອໍເຕັມເມືອງ ຍ້ອນວ່າໃນໄລຍະນີ້ພໍດີແມ່ນນັກທ່ອງທ່ຽວຕາເວັນຕົກມັກໄປທ່ຽວເມືອງຫລວງ, ພໍດີຖືກກັບໄລຍະບຸນປີໃໝ່ຫວຽດນາມ ກໍຄືຊາວຈີນ ອັນໄດ້ເຮັດໃຫ້ເມືອງຫລວງທີ່ມີເນື້ອທີ່ບໍ່ຮອດ 10 ກິໂລແມັດມົນທົນນັ້ນ ມີນັກທ່ອງທ່ຽວເກືອບເຕັມເມືອງ.

ວັນທີ 12 ກຸມພານີ້, ແມ່ນມື້ຂຶ້ນ 3 ຄ່ຳເດືອນຈຽງ, ທ້າວ ເສິນ ເປັນຄົນຈີນທີ່ເຮັດວຽກຢູ່ນະຄອນ ຫລວງວຽງຈັນ ບໍ່ໄດ້ກັບປະເທດ ຫາກໄດ້ພາຄອບຄົວໄປຫລິ້ນບຸນຢູ່ເມືອງຫລວງພະບາງ ຍ້ອນວ່າບໍ່ໄດ້ສັ່ງຈອງບ່ອນພັກລ່ວງໜ້າ, ເມື່ອຮອດເມືອງຫລວງພະບາງແລ້ວ ໄດ້ຖາມຈ່ອງໂຮງແຮມ ຫລື ເຮືອນພັກ 20 ຫາ 30 ແຫ່ງ ແຕ່ກໍພຽງໄດ້ຄຳຕອບວ່າ: “ບໍ່ມີຫ້ອງແລ້ວ”.

ບໍ່ພຽງແຕ່ທ້າວ ເສິນ ເທົ່ານັ້ນ, ນັກຂ່າວໄດ້ເຫັນນັກທ່ອງທ່ຽວຫລາຍໆຄົນໄດ້ເປ້ຖົງໃຫຍ່ຖົງນ້ອຍຊອກຫາບ່ອນພັກຢູ່ຕາມຖະໜົນຫົນທາງຂອງຕົວເມືອງດັ່ງກ່າວ, ເຖິງວ່າເປັນເມືອງທີ່ມີລີຊອດ ແລະ ໂຮງແຮມຫລາຍໆແຫ່ງ, ແຕ່ສ່ວນຫລາຍກໍມີແຕ່ໄດ້ຂຽນຕົວໜັງສືຕິດໄວ້ຢູ່ໜ້າປະຕູວ່າ: “ແຂກເຕັມແລ້ວ”.

ຄົນຈີນທີ່ໄປທ່ຽວລາວສ່ວນຫລາຍແມ່ນຂັບລົດສ່ວນຕົວມາຈາກຈີນ. ຫລາຍມື້ມານີ້ ຢູ່ເມືອງຫລວງພະບາງໄດ້ເຫັນຫລາຍຂະບວນລົດທີ່ຕິດປ້າຍຂອງແຂວງຢຸນນານ, ແຂວງເສສວນ ແລະ ນະຄອນຈຸ່ງກິ່ງ ຂອງຈີນ, ໃນນັ້ນ ມີສ່ວນໜຶ່ງແມ່ນສະມາຄົມຜູ້ຮັກລົດຈັດໃຫ້, ມີສ່ວນໜຶ່ງແມ່ນບໍລິ ສັດທ່ອງທ່ຽວເປັນຜູ້ຈັດໃຫ້.

ທ່ານ ຈ່າງ ຢ້າວກົວ ຜູ້ອຳ ນວຍການໃຫຍ່ຂອງບໍລິສັດທ່ອງທ່ຽວແຫ່ງໜຶ່ງຂອງແຂວງຢຸນ ນານ ໄດ້ນຳພາຂະບວນລົດທີ່ມີລົດເກັງ 20 ກວ່າຄັນ ໄປທ່ຽວລາວ. ທ່ານບອກນັກຂ່າວວ່າ: ຂະບວນລົດຂອງລາວຈະເຂົ້າມາທ່ຽວເມືອງຫລວງພະບາງ, ນະ ຄອນຫລວງວຽງຈັນ ແລະ ເມືອງວັງວຽງ ເປັນເວລາຢ່າງໜ້ອຍ 7 ມື້ 6 ຄືນ. ປັດຈຸບັນ ທາງຫລວງຈາກແຂວງຢຸນນານເຂົ້າມາລາວສະດວກສະບາຍຫລາຍ. ນອກ ຈາກສາມາດທ່ຽວຊົມຮີດຄອງປະເພນີ ແລະ ທິວທັດທຳມະຊາດຂອງລາວແລ້ວ, ຄ່າໃຊ້ຈ່າຍກໍບໍ່ຫລາຍປານໃດ. ສະນັ້ນ ການໄປທ່ຽວລາວຈຶ່ງໄດ້ຮັບຄວາມນິຍົມຊົມຊອບຈາກເຈົ້າຂອງລົດ.

ນາງ ໝ້າ ແລະ ຜົວ ທີ່ເປັນຊາວເມືອງຄຸນມິງ ແຂວງຢຸນ ນານ ໄດ້ເຂົ້າຮ່ວມຂະບວນລົດຈຳນວນ 56 ຄັນ ໄດ້ເດີນທາງເຂົ້າມາຮອດເມືອງຫລວງພະບາງໃນໄລຍະບຸນກຸດຈີນ. ນາງໃຫ້ສຳພາດຕໍ່ນັກຂ່າວວ່າ: ເມື່ອຮອດຍາມພັກ ນາງກໍມັກຂັບລົດໄປຫລິ້ນຢູ່ບ່ອນໃກ້ຄຽງ. ພ້ອມກັນນັ້ນ ນາງຍັງເປັນຄົນທີ່ນັບຖືສາສະໜາພຸດ. ສະ ນັ້ນ ຈຶ່ງຖືໂອກາດຍາມພັກນີ້ເຂົ້າມາທ່ຽວລາວທີ່ເປັນປະເທດນັບຖືສາສະໜາພຸດ ແລະ ມີຄວາມຫລາກຫລາຍທາງດ້ານວັດທະນະທຳອັນເກົ່າແກ່ ເຊິ່ງເປັນສິ່ງດຶງດູດໃຈຂອງຂ້າ ພະເຈົ້າ.