ສາລະວັນກຽມຮັບມືພາຍຸຫົວໃຫຍ່ຂະນະທີ່ອັດຕະປືສຸມແກ້ໄຂຜົນກະທົບຈາກພາຍຸດີເປຣຊັນ

              ຫລັງບັນດາແຂວງພາກໃຕ້ໄດ້ຮັບຜົນສະທ້ອນຈາກພາຍຸດີເປຣຊັນ ເຊິ່ງ ໜຶ່ງໃນນີ້ກໍແມ່ນມືອງຄົງເຊໂດນ ແຂວງ ສາລະວັນ ແຕ່ວັນທີ 17-24 ເດືອນນີ້ ໂດຍສ້າງຄວາມເສຍຫາຍເປັນຈຳນວນຫລາຍຕາມການຄາດຄະເນເບື້ອງຕົ້ນ, ຄະນະກໍາມະການປ້ອງກັນ ແລະ ຄວບຄຸມໄພພິບັດເມືອງໃຫ້ຮູ້ວ່າ: ເມືອງຂອງ ຕົນມີປະຊາຊົນກວ່າ 9.500 ຄອບຄົວໄດ້ຮັບຄວາມ ເດືອດຮ້ອນ, ເນື້ອທີ່ນາຖືກ ນ້ຳຖ້ວມກວ່າ 12.500 ເຮັກຕາ, ເນື້ອທີ່ປູກພືດ 780 ເຮັກຕາ, ເສັ້ນທາງຖືກຖ້ວມ 14 ເສັ້ນໄດ້ ຮັບຜົນກະທົບ ແລະ ໃນນັ້ນຄາດວ່າປະມານ 64 ກິໂລ ແມັດເປ່ເພ, ສຸກ ສາລາ 4 ແຫ່ງ, ຊົນລະປະທານ 29 ແຫ່ງ, ຝາຍນໍ້າ ລົ້ນ 3 ແຫ່ງ,ໂຮງຮຽນ 36 ແຫ່ງ, ສັດລ້ຽງກວ່າ  4 ພັນໂຕ, ເລົ້າເຂົ້າ 4 830  ຫລັງ, ໜອງປາ ເກືອບ 2 ພັນໜອງໄດ້ຮັບ ຄວາມເສຍຫາຍນອກນີ້ຍັງມີຂົວ 7 ແຫ່ງເປ່ເພຈົນໃຊ້ການບໍ່ໄດ້. ຂະນະທີ່ປັດຈຸບັນໄດ້ມີຫລາຍພາກສ່ວນເຂົ້າໄປຊ່ວຍເຫລືອ ບັນເທົາທຸກຜູ້ປະສົບໄພເບື້ອງຕົ້ນແລ້ວ ແລະ ອຳນາດການປົກ ແຂວງສາລະວັນ ກໍໄດ້ແຈ້ງເຕືອນປະຊາຊົນຕື່ມ ວ່າ:ໃນວັນທີ 25-26 ກັນຍານີ້ ຈະມີພາຍຸປາມຶກ (pabuk) ຫົວທີ 20 ພັດຜ່ານ ເຊ່ິງຈະເຮັດໃຫ້ຝົນຕົກໜັກໂດຍສະເພາະເຂດ ເມືອງຄົງເຊ ໂດນອາດຈະເຮັດໃຫ້ແມ່ນ້ຳເຊໂດນສູງຂຶ້ນໃນລະດັບ 13,79 ແມັດ ເຊ່ິງກາຍເຂດອັນຕະລາຍ 13,30  ແມັດ ສະນັ້ນຈຶ່ງໃຫ້ລະມັດລະວັງຈາກໄພນ້ຳຖ້ວມທີ່ອາດຈະເກີດຂຶ້ນ ມາອີກຮອບໃໝ່.                    

             ແຫລ່ງຂ່າວຈາກແຂວງ ອັດຕະປືລາຍງານວ່າ: ພາຍຫລັງພາຍຸ ດີເປຣຊັນ ພັດຜ່ານພາກໃຕ້ຂອງລາວເລີ່ມແຕ່ວັນທີ 17 ກັນຍາ 2013 ເຖິງປັດຈຸບັນ ໄດ້ສົ່ງຜົນເຮັດໃຫ້ມີຝົນຕົກໜັກ ແລະ ເກີດມີສະພາບນ້ຳຖ້ວມ, ນ້ຳອັ່ງຕາມສາຂາແມ່ນ້ຳເຊ ກອງ, ເຊຂະໝານ, ເຮັດໃຫ້ພື້ນທີ່ 5 ເມືອງ ທົ່ວແຂວງອັດຕະປືເກີດມີສະພາບນ້ຳຖ້ວມໜັກໜ່ວງ, ສົ່ງຜົນໃຫ້ການສັນຈອນ ທາງບົກລະຫວ່າງ ເມືອງຕ່າງໆຖືກຕັດຂາດ, ລະດັບນ້ຳເຊກອງສູງຂຶ້ນສະເລ່ຍ ກວ່າ 15  ແມັດ ເຊິ່ງເກີນເຂດເຕືອນໄພອັນ ຕະລາຍ.                    

         ຄະນະກຳມະການປ້ອງກັນ ແລະ ຕ້ານໄພພິບັດຂັ້ນແຂວງໄດ້ລາຍງານໃຫ້ຮູ້ເບື້ອງຕົ້ນວ່າ: ຜົນເສຍຫາຍຈາກໄພນ້ຳ ຖ້ວມຄັ້ງນີ້ ເຮັດໃຫ້ 16 ບ້ານ ຂອງເມືອງມະຫາໄຊ ຖືກນ້ຳຖ້ວມ ໃນນັ້ນມີ ເຮືອນຸ 8 ຫລັງຖືກນ້ຳຊຸໄຫລໄປ, ຟາມໄກ່ພັນໄຂ່ ເສຍ ຫາຍ 4.500 ໂຕ, ໄກ່ພັນຊີ້ນ 400 ໂຕ,  ປາກະ ຊັງເສຍຫາຍເປັນຈຳນວນຫລາຍ. ເມືອງໄຊເສດຖາຖືກ ນ້ຳຖ້ວມ 6 ບ້ານ , ເນື້ອທີ່ນາ 250 ເຮັກຕາ, ສວນ 35 ເຮັກຕາ ຖືກນ້ຳຖ້ວມ ໜັກ, ໜອງປາ 36 ໜອງ, ຄວາຍ, ງົວ 24 ໂຕ, ແບ້ 11 ໂຕ ແລະ ສັດປີກເສຍຫາຍ ເປັນຈຳນວນ ຫລາຍ. ເມືອງ ຊານໄຊ ຖືກນ້ຳ ຖ້ວມ 5 ບ້ານ, ເມືອງ ພູວົງ ເນື້ອທີ່ກະສິກຳ 15 ເຮັກຕາ ຖືກນ້ຳຖ້ວມ ສ່ວນເມືອງສະໜາມໄຊ ມີ 7 ບ້ານ ຢູ່ລຽບຕາມສາຍທາງ 18 A ຄື ບ້ານໃໝ່-ຫີນລາດ, ບ້ານໜອງຫີນ, ໜອງ ແຂ້, ກະແຊະ ແລະບ້ານ ພອນມະນີ ມີຄວາມເສຍຫາຍໜັກໜ່ວງຍ້ອນເປັນພື້ນທີ່ຕ່ຳ.                

            ມາເຖິງ ປັດຈຸບັນຄວາມຕ້ອງການຊ່ວຍເຫລືອຮີບດ່ວນຂອງປະຊາຊົນພື້ນທີ່ດັ່ງກ່າວແມ່ນນ້ຳດື່ມ, ນຳ້ໃຊ້ຍ້ອນ ເຂົາ ເຈົ້ານຳສ້າງ ແລະ ນ້ຳບາດານ ຖືກນ້ຳຖ້ວມໄປແລ້ວ. ປັດຈຸບັນທາງຄະນະກຳມະການຄວບຄຸມ ແລະ ຕ້ານ ໄພພິບັດຂັ້ນແຂວງ ແລະ ເມືອງໄດ້ຈັດຕັ້ງກຳລັງຄົນ ແລະ ອຸປະກອນຈຳເປັນລົງຊ່ວຍເຫລືອເຂດນ້ຳຖ້ວມເປັນການສຸກເສີນແລ້ວ ພ້ອມທັງເກັບ ກຳ ຜົນເສຍຫາຍໃຫ້ຊັດເຈນ ເພື່ອຫາວິທີຊ່ວຍເຫລືອ ແລະ ແກ້ໄຂຜົນກະທົບໃຫ້ມີປະສິດທິຜົນ.