ເຮັດບຸນເພື່ອເອົາບຸນ ( ຄໍລຳ ແລກປ່ຽນຄຳເຫັນ )

ໂດຍ : ຊາຍຄຳ ຈຳປາອຸທຸມ

     ເດືອນພະຈິກນີ້ ຖືວ່າຢູ່ບ້ານ ເຮົາເມືອງເຮົາກໍຈະມີບຸນໃຫຍ່ຄືບຸນນະມັດສະການພະທາດ ຫລວງ ເຊິ່ງຖືວ່າ ເປັນບຸນປະເພ ນີທີ່ສຳຄັນຂອງຊາດ ແລະ ບໍ່ແມ່ນພຽງບຸນຂອງຊາວນະຄອນຫລວງເທົ່ານັ້ນ ມັນແມ່ນບຸນຂອງ ທົ່ວປວງຊົນລາວທັງຊາດ.

     ຄຳວ່າ: ບຸນ ແມ່ນຄຳທີ່ມີມາ ແຕ່ບູຮານນະການ ໂດຍສະເພາະ ພຸດທະສາສະໜາທີ່ພວກເຮົາເຈົ້າຂ້ອຍໃຫ້ ຄວາມເຄົາລົບ ນັບຖືສືບຕໍ່ກັນມາ ແລະ ເປັນຄຳທີ່ນິຍົມໃຊ້ກັນຫລາຍໃນພຸດທະສາສະໜາເພາະວ່າບຸນໝາຍເຖິງ ຜົນກໍ ໄດ້ເຊັ່ນ: ຄົນທີ່ຮັ່ງ ມີລ້ຳລວຍ ກໍເອີ້ນວ່າ: ຄົນມີບຸນ, ແຕ່ເມື່ອກ່າວ ໂດຍການກະທຳກໍຄືບຸກຄົນໃດເຮັດວຽກ ງານທາງກາຍ, ວາຈາ ແລະ ຈິດໃຈ ດ້ວຍຄວາມບໍລິສຸດເພື່ອຜົນປະໂຫຍດຕົນເອງ ແລະ ຄົນອື່ນ, ບໍ່ແມ່ນເຮັດເພື່ອ ບຽດບຽນ, ວຽກງານນັ້ນກໍໄດ້ຊື່ວ່າເປັນບຸນຍ້ອນ ຜົນທີ່ເກີດຈາກການກະທຳບຸນຄືຄວາມສຸກ.

     ດັ່ງນັ້ນ, ໃນພຸດທະສາສະໜາ ຈຶ່ງສະແດງຫລັກການວິທີເຮັດ ບຸນໄວ້ 10 ຂໍ້ ຄື 1. ການໃຫ້ທານ. 2. ການຮັກສາ ກາຍ, ວາຈາໃຫ້ ຖືກຕ້ອງ. 3. ການອົບຮົມຈິດໃຈ ໃຫ້ສະຫງົບ ແລະ ໃຫ້ເກີດປັນຍາ. 4. ການອ່ອນນ້ອມຖ່ອມ ໂຕຕໍ່ບຸກຄົນຢ່າງ ເໝາະສົມ. 5. ຊ່ວຍຂົນ ຂວາຍການກະທຳຄວາມດີ ຂອງຄົນອື່ນ. 6. ການຟັງທຳ. 7. ການສະແດງ ທຳ ຫລື ຊີ້ແຈງທຳ ໃຫ້ຄົນອື່ນຟັງ. 8. ການແບ່ງປັນ ສ່ວນບຸນໃຫ້ຄົນອື່ນ ຫລື ເພື່ອແຜ່ ຄວາມດີໃຫ້ແກ່ຄົນອື່ນ. 9.

ການອະນຸໂມທະນາສ່ວນບຸນຂອງຄົນອື່ນ ຄືຍິນດີກັບການກະທຳຄວາມ ດີຂອງຄົນອື່ນ. 10. ການເຮັດໃຫ້ຄວາມ ຄິດເຫັນ ຂອງຕົນເອງໃຫ້ ຖືກຕ້ອງ ເຊັ່ນເຫັນວ່າເຮັດຄວາມ ດີແລ້ວຍ່ອມໄດ້ຄວາມດີ, ເຮັດຄວາມຊົ່ວຍ່ອມໄດ້ຮັບ ຄວາມຊົ່ວເປັນຕົ້ນ.

      ໃນຫລັກການທັງ 10 ຂໍ້ນີ້ ເຫັນວ່າການເຮັດບຸນທີ່ຈະຕ້ອງ ໄດ້ໃຊ້ເງິນໃຊ້ທຶນມີພຽງຂໍ້ທີ 1 ເທົ່ານັ້ນ, ສ່ວນ 9 ຂໍ້ແມ່ນ ການປະກອບຄຸນງາມຄວາມດີຢ່າງອື່ນ ເຊິ່ງເລີ່ມຕົ້ນຈາກຕົນເອງເປັນ ຫລັກກໍສາມາດໄດ້ບຸນແລ້ວ, ແຕ່ ຄົນສ່ວນຫລາຍ ເຂົ້າໃຈກັນວ່າ: ການເຮັດບຸນຈະຕ້ອງມີເງິນຈຶ່ງຈະເຮັດໄດ້ຖ້າເປັນຄືແນວນັ້ນບຸນກໍຕ້ອງໃຊ້ເງິນຊື້ ເອົາ, ຄົນທຸກຍາກຂາດເຂີນ ກໍອາດຈະເຮັດບຸນ ບໍ່ໄດ້.

     ແຕ່ຖ້າຢຶດໝັ້ນຫລັກການ ເຮັດບຸນທັງ 10 ຂໍ້ທີ່ໄດ້ຍົກຂຶ້ນມາ ຫົນທາງທີ່ຈະເຮັດບຸນ ແລະ ໄດ້ບຸນນັ້ນກໍມີ ຫລາຍປະການ, ຄົນ ທຸກຍາກຂາດເຂີນບາງຄົນອາດ ຈະເຮັດບຸນ ແລະ ໄດ້ບຸນຫລາຍ ກວ່າຄົນຮັ່ງມີກໍໄດ້ ຖ້າເຂົ້າໃຈ ແລະ ເຮັດເປັນ.

     ທ່ານຜູ້ອ່ານລອງພິສູດໂດຍ ການນຳໄປປະຕິບັດເບິ່ງກໍໄດ້ ວ່າ: ທ່ານຈະໄດ້ບຸນສົມຕາມຄວາມຕ້ອງການຢາກເອົາ ບຸນ ຫລື ບໍ່.