ລາວ-ຍີ່ປຸ່ນ ເພີ່ມທະວີຮັດແຫນ້ນການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນຫລາຍດ້ານ

             ຕາມ​ການ​ເຊື້ອ​ເຊີນ​ຂອງ​ພະນະ​ທ່ານ ຊິ​ນ​ໂຊ ອ​າ​ເບະ ນາ ຍ​ົກລັດຖະມົນຕີ​ຍີ່ປຸ່ນ ​ເພື່ອ​ເຂົ້າ ຮ່ວມ​ກອງ​ປະຊຸມ​ສຸດ​ຍອດອາ​ຊຽນ-ຍີ່ປຸ່ນ ​ແລະ ກອງ​ປະຊຸມ​ສຸດ​ຍອດ ​ແມ່ນ້ຳຂອງ-ຍີ່ປຸ່ນ ຢູ່​ໂຕ​ກຽວ ​ແຕ່​ວັນ​ທີ 13-16 ທັນວາ 2013, ພະນະ​ທ່ານ ທອງ​ສິງ ທຳ​ມະ​ວົງ ນາຍົກລັດຖະມົນຕີ ​ແຫ່ງ ສປປ ລາວ ​ໄດ້​ເຂົ້າຮ່ວມ​ກອງ​ປະ ຊຸມ​ພົບ​ປະ​ສອງ​ຝ່າຍ​ກັບ​ພະນະ​ທ່ານ ຊິນ​ໂຊ ອາ​ເບະ ນາຍົກລັດ ຖະມົນຕີຍີ່ປຸ່ນ ຢູ່​ເຮືອນ​ພັກ​ທາງ​ການ​ຂອງ​ນາຍົກ​ເອງ ​ໃນ​ວັນ​ທີ 15 ທັນວາ 2013. ການ​ພົບ​ປະ​ດັ່ງ ກ່າວ​ໄດ້​ມີ​ຂຶ້ນ​ເປັນຄັ້ງທີ​ສອງ ຫລັງ​ຈາກ​ການ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ​ຂອງ​ທ່ານ​ນາຍົກລັດຖະມົນຕີຍີ່ປຸ່ນ, ໃນ​ວັນ​ທີ 17 ພະຈິກ 2013, ທັງ​ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ລະຫວ່າງ ສປປ ລາວ ແລະ ຍີ່ປຸ່ນ ທີ່ ພວມໄດ້ຮັບກາຂະຫຍາຍຕົວ ແລະ ແຕກດອກອອກຜົນພ້ອມທັງເປັນການຜັນຂະຫຍາຍເນື້ອໃນຈິດໃຈ ແລະ ຄຳໝັ້ນສັນຍາ

ຂອງການນຳສູງສຸດຂອງສອງປະເທດທີ່ໄດ້ຍົກລະດັບການຮ່ວມມືເປັນປະເທດຄູ່ຮ່ວມມືຮອບດ້ານເພື່ອສັນຕິພາບອັນຍາວນານ ແລະ ຄວາມວັດ ທະນາຖາວອນຂອງຂົງເຂດ. ພ້ອມດຽວກັນນີ້, ທ່ານນາຍົກ ລັດຖະມົນຕີ ແຫ່ງ ສປປ ລາວ ໄດ້ສະແດງ ຄວາມຊົມເຊີຍຕໍ່ຜົນສຳເລັດຂອງກອງປະຊຸມສຸດຍອດອາຊຽນ-ຍີ່ປຸ່ນເພື່ອສະເຫລີມ ສະຫລອງການເປັນຄູ່ຮ່ວມມື ອາຊຽນ-ຍີ່ປຸ່ນ ຄົບຮອບ 40 ປີ ແລະ ກອງປະຊຸມສຸດຍອດແມ່ນ້ຳຂອງ-ຍີ່ປຸ່ນເພື່ອເປັນການເສີມຂະຫຍາຍສັນຕິພາບ ແລະ ຄວາມຮັ່ງ ມີຜາສຸກຮ່ວມກັນບົນພື້ນຖານຕ່າງຝ່າຍຕ່າງມີຜົນປະໂຫຍດ. ພ້ອມດຽວກັນນີ້, ຝ່າຍຍີ່ປຸ່ນໄດ້ປະກາດອະນຸມັດການເຫັນດີຍົກ ເວັ້ນວີຊາໃຫ້ແກ່ປະຊາຊົນລາວຜູ້ທີ່ຖືໜັງສືຜ່ານແດນທາງລັດຖະການເພື່ອເຮັດໃຫ້ການແລກປ່ຽນການໄປມາຫາສູ່ເຊິ່ງກັນ ແລະ ກັນໃຫ້ສະດວກຍິ່ງຂຶ້ນ ແລະ ສອງຝ່າຍຍັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາທີ່ພົ້ນເດັ່ນຂອງພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ.

         ຫລັງຈາກສຳເລັດກອງປະ ຊຸມດັ່ງກ່າວ, ທັງສອງນາຍົກລັດ ຖະມົນຕີໄດ້ເຂົ້າຮ່ວມເປັນສັກຂີພະຍານໃນການລົງນາມ ເອກະສານແລກປ່ຽນ (Exchange of Notes) ​ເພື່ອ​ຮັບ​ເອົາ​ການ​ຊ່ວຍ​ເຫລືອ​ທາງ​ການ​ເພື່ອການ​ພັດທະ ນາ (ODA) ຈຳ ນວນ 4 ​ໂຄງການ​ດັ່ງນີ້: ​ໂຄງການ​ຊ່ວຍ​ເຫລືອ 2 ໂຄງການ ຄື​ໂຄງການ​ອອກ​ແບບ​ເພື່ອ​ການ​ກໍ່ສ້າງ​ຂົວ​ເຊ​ກອງ (Progect for Construction of Sekong Bridge on NR16B in the Southern Region of Laos (Detailed Design)) ມູນ​ຄ່າ 84 ລ້ານ​ເຢນ ຫລື ປະມານ 840.176 ​ໂດ​ລາ​ສະຫະລັດ ​ແລະ ​ໂຄງການ​ເກັບ​ກູ້​ລະ​ເບີດ​ທີ່​ຍັງ​ບໍ່​ທັນ​ແຕກ (The Project for Acceleration of UXO Clearance for Rural Development and Poverty Eradication) ມູນ​ຄ່າ 864 ລ້ານ​ເຢນ ຫລື ປະມານ 8,64 ລ້ານ​ກວ່າ​ໂດ​ລາ​ສະຫະລັດ; ​ໂຄງການ​ກູ້​ຢືມ​ດອກ​ເບ້ຍ​ຕ່ຳ ປະກອບ​ມີ​ໂຄງການ​ຂະຫຍາຍ​ອາຄານ​ໂດຍ ສານ​ສະໜາມ​ບິນ​ສາກົນ​ວັດ​ໄຕ (Vientiane International Airport Terminal Expansion Project Phase) ມູນ​ຄ່າ 9 ຕື້​ເຢນ ຫລື ປະມານ 90 ລ້ານ​ກວ່າ​ໂດ​ລາ​ສະຫະລັດ ​ແລະ ​ໂຄງການ​ຫລຸດ ຜ່ອນ​ຄວາມທຸກ​ຍາກ (Ninth Poverty Reduction Support Operation) ມູນ​ຄ່າ 500 ລ້ານ​ເຢນ ຫລື ປະມານ 5 ລ້ານ​ກວ່າ​ໂດ​ລາ​ສະຫະລັດ.

          ຮ່ວມ​ລົງ​ນາມ​ເອກະສານ​ແລກປ່ຽນ​ດັ່ງກ່າວ, ຕາງໜ້າ​ໃຫ້​ແກ່​ລັດຖະບານ​ລາວ​ແມ່ນ​ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດ ຖະມົນຕີ​ຊ່ວຍ​ວ່າການ​ກະຊວງ​ການ​ຕ່າງປະ​ເທດ ​ແລະ ຕາງໜ້າ​ໃຫ້​ແກ່​ລັດ ຖະບານ​ຍີ່ປຸ່ນ​ແມ່ນ​ທ່ານ ຮິ​ໂຣຢຸກິ ກິ​ຊິ​ໂນະ ​ເອກ​ອັກຄະຣາຊະ​ທູດ​ຍີ່ ປຸ່ນ​ປະຈຳ​ ສປປ ລາວ. ​ໂຄງການ​ດັ່ງກ່າວ​ແມ່ນ​ນອນ​ຢູ່​ໃນ​ແຜນ​ງານ​ຂອງ​ລັດຖະບານ​ລາວ​ທີ່​ໄດ້​ສະ​ເໜີ​ຂໍ​ການ​ຊ່ວຍ​ເຫລືອ​ຈາກ​ລັດຖະບານ​ຍີ່ປຸ່ນ ​ໃນ​ປີ 2012 ເຊິ່ງຈະ​ປະກອບສ່ວນ​ອັນ​ໃຫຍ່​ຫລວງ​ໃຫ້​ແກ່​ແຜນ​ພັດທະນາ​ເສດຖະ ກິດ-ສັງຄົມ ​ເພື່​ອ​ແນ​ໃສ່​ສ້າງ​ເງື່ອນ​ໄຂ​ອຳນວຍ​ຄວາມ​ສະ ດວກ​ໃຫ້​ແກ່​ການຈັດຕັ້ງປະຕິບັດ​ເປົ້າໝາຍ​ສະຫັດ​ສະ​ວັດ​ເພື່ອ​ການ​ພັດທະນາ ​ແລະ ນຳ​ພາ​ປະ​ເທດ​ຊາດ​ຫລຸດ​ພົ້ນອອກ​ຈາກ​ສະຖາ ນະ​ພາບ​ດ້ອຍ​ພັດທະນາ​ເທື່ອ​ລະ​ກ້າວ​ພາຍ​ໃນ​ປີ 2020. ນອກ ຈາກ​ນັ້ນ ກໍ​ໄດ້​ມີ​ການ​ລົງ​ນາມ​ບົດ​ບັນທຶກ​ການ​ຮ່ວມ​ມືວ່າ​ດ້ວຍ​ການ​ສ້າງຕັ້ງຫ້ອງການ​ຜູ້ຕາງໜ້າ​ອົງການ​ການ​ຄ້າ​ສາກົນ​ຍີ່ປຸ່ນ​ປະ ຈຳ ສປປ ລາວ ​ເພື່ອ​ເປັນ​ການ​ອຳນວຍ​ຄວາມ​ສະດວກ, ຊຸກຍູ້ ​ແລະ ຕິດຕາມ​ການ​ດຳ​ເນີນ​ທຸລະ​ກິດ​ຂອງ​ນັກ​ລົງທຶນ​ຍີ່ປຸ່ນ​ຢູ່ ສປປ ລາວ ​ໄດ້​ຢ່າງ​ໃກ້ຊິດ.