ການອອກໃບຕາດິນຊະຊາຍມີແຜ່ຫລາຍ

        ປັດຈຸບັນ, ບັນຫາຂໍ້ຂັດແຍ່ງດ້ານທີ່ດິນຢູ່ປະເທດເຮົາແມ່ນເກີດຂຶ້ນໃນຫລາຍກໍລະນີ ແລະ ການອອກໃບຕາດິນຊະ ຊາຍ,ທັບຊ້ອນ ໂດຍຖືເບົາຕໍ່ການກວດກາຂອງພາກສ່ວນ ກ່ຽວຂ້ອງນີ້ ແມ່ນສາເຫດໜຶ່ງ ທີ່ພາໃຫ້ເກີດມີຂໍ້ຂັດແຍ່ງດັ່ງ ກ່າວໃນສັງຄົມຈົນເຖິງຂັ້ນຂຶ້ນຮ້ອງຟ້ອງຕໍ່ສານມາແລ້ວຫລາຍກໍລະນີ. ດັ່ງກໍລະນີຕົວຢ່າງໜຶ່ງທີ່ເກີດຂຶ້ນຢູ່ບ້ານ ນາກຸງ ເມືອງໄຊທານີ, ນະຄອນຫລວງວຽງຈັນ ໂດຍປະຊາຊົນທ່ານໜຶ່ງ ໄດ້ນຳເອກະສານສຳຄັນຈຳນວນໜຶ່ງທີ່ລາວໄດ້ປະກອບ ໃນການສູ້ຄະດີໃນຊັ້ນສານເພື່ອທວງເອົາທີ່ດິນມູນຂອງຕົນກັບຄືນມາເປັນກຳມະສິດຂອງວົງຕະກູນເໝືອນເດີມ, ປະຊາຊົນ ດັ່ງກ່າວເລົ່າສູ່ນັກຂ່າວພວກເຮົາ ຟັງວ່າ: ກ່ອນໜ້ານີ້ ຄືໃນປີ 2010, ມີສະມາຊິກຄອບຄົວ ໄດ້ ນຳເອົາໃບຕາດິນ 3 ຕອນໃນນີ້, ຢູ່ບ້ານນາກຸງ ເມືອງ ໄຊທານີ 2 ຕອນ ແລະ ຢູ່ບ້ານ ໄຊມຸງຄຸນ ເມືອງນາຊາຍທອງ 1 ຕອນມີ ເນື້ອທີ່ ຫລາຍພັນຕາແມັດ ໄປ ຊວດຈຳນຳພວກປ່ອຍເງິນກູ້ນອກລະບົບ ເພື່ອເອົາເງິນມາລົງ ທຶນໃສ່ການລ້ຽງໝູ, ຫລັງຈາກນັ້ນກໍມີການໃຊ້ແທນຄືນທັງຕົ້ນ ທຶນທີ່ກູ້ຢືມ ແລະ ອັດຕາດອກເບ້ຍ ທີ່ໄດ້ຕົກລົງກັນຕາມສັນຍາ, ແຕ່ກໍເກີດມີບັນຫາຄືວ່າຜູ້ທີ່ປ່ອຍເງິນກູ້ໃຫ້ນັ້ນໄດ້ລັກເອົາໃບ ຕາດິນທັງ 3 ຕອນ ທີ່ມາຈຳນັ້ນໄປເຮັດໃບຕາດິນໃໝ່ໂດຍອອກເປັນຊື່ຕົນ ແລະ ໄດ້ນຳໄປຂາຍຕໍ່ໃຫ້ກັບນັກທຸລະກິດອີກຕໍ່ໜຶ່ງ ເມື່ອກວດກາແລ້ວເຫັນວ່າໃບຕາດິນທີ່ເຮັດໃໝ່ນັ້ນອອກໃຫ້ໂດຍພະແນກຊັບພະຍາກອນທຳມະຊາດ ແລະ ສິ່ງແວດລ້ອມນະ

ຄອນຫລວງວຽງຈັນ ແລະ ຈາກບັນ ຫາຄວາມສັບສົນດັ່ງກ່າວຈຶ່ງ ເປັນສະນວນສຳຄັນທີ່ກໍໃຫ້ເກີດຂໍ້ຂັດແຍ່ງທາງທີ່ດິນລະ ຫວ່າງສອງຝ່າຍອັນເປັນປະກົດການຫຍໍ້ທໍ້ຂອງສັງຄົມ ແລະ ມີການຮ້ອງຟ້ອງຕໍ່ສານເພື່ອຕັດສີນບັນຫາແກ້ໄຂຂໍ້ຂັດແຍ່ງດັ່ງ ກ່າວ ເຊິ່ງຜ່ານການພິຈາລະນາຢ່າງຮອບຄອບຂອງສານປະຊາຊົນສູງສຸດເມື່ອບໍ່ດົນມານີ້, ຈຶ່ງໄດ້ຕັດສີນໃຫ້ລົບລ້າງໃບ ຕາດິນທີ່ ມີການສວຍໂອກາດເຮັດອອກມາໃໝ່ ແລະ ໃຫ້ເຮັດໃບຕາດິນໃໝ່ໃຫ້ເຈົ້າຂອງທີ່ດິນເດີມ ແລະ ໃຫ້ພວກທີ່ລັກເຮັດໃບຕາ ດິນສົ່ງເງິນຄືນຕາມຈຳນວນທີ່ຝ່າຍເຈົ້າຂອງດິນເດີມຈ່າຍເກີນໃນໄລຍະຜ່ານມາພ້ອມທັງອອກໜັງສືເຖິງພາກສ່ວນກ່ຽວຂ້ອງ ໃຫ້ຈັດຕັ້ງປະຕິບັດຄຳຕັດສີນຂອງສານທັນທີ.

         ນີ້ເປັນພຽງຕົວຢ່າງໜຶ່ງທີ່ສະແດງໃຫ້ເຫັນວ່າ: ສະພາບການຂັດແຍ່ງດ້ານທີ່ດິນຢູ່ສັງຄົມເຮົາແມ່ນມີລັກສະນະນັບມື້ ເພີ່ມຂຶ້ນ, ຂໍ້ຂັດແຍ່ງດັ່ງກ່າວຕົ້ນຕໍແມ່ນເກີດຂຶ້ນຈາກຄວາມບໍ່ເຂົ້າໃຈເລິກເຊິ່ງຕໍ່ລະບຽບກົດໝາຍທີ່ກ່ຽວພັນກັບບັນຫາທີ່ດິນ ຂອງບຸກຄົນຈຳນວນໜຶ່ງອັນກໍໃຫ້ເກີດຄວາມສັບສົນ ແລະ ຄວາມບໍ່ສະຫງົບຂອງສັງຄົມ, ນອກຈາກນີ້ ພະນັກງານກ່ຽວຂ້ອງ ຈຳນວນໜຶ່ງແມ່ນມີການສວຍໂອກາດສວຍໃຊ້ຕຳແໜ່ງໜ້າທີ່ຂອງຕົນເອື້ອອຳນວຍໃຫ້ກັບບຸກຄົນອື່ນເພື່ອວິ້ງເຕັ້​ນກະທຳໃ​ນ ສິ່ງທີ່ບໍ່ຖືກຕ້ອງຕາມລະບຽບກົດໝາຍເພື່ອຫວັງຜົນ​ປະໂຫຍດໃສ່ຕົ​ນໂດຍບໍ່ຄຳໜຶ່ງເຖິງຜົນ​ສະທ້ອ​ນທີ່ຈະກໍໃຫ້ເກີດຄວາມເສຍ ຫາຍຕໍ່ຜົນ​ປະໂຫຍດຂອງປະຊາຊົ​ນແລະ ສ່ວ​ນລວມ ເວົ້າສະເພາະກໍແມ່​ນສ້າງຄວາມບໍ່ເຊື່ອໝັ້​ນຂອງປະຊາຊົ​ນ ຕໍ່ແນ​ວທາງ​ນະ ໂຍບາຍຂອງພັກ ແລະ ລັດເຮົາ.