ລາວຕ້ອງລົງທຶນໃສ່ການພັດທະນາໄວໜຸ່ມໃຫ້ຫລາຍກວ່າເກົ່າ

ພາບປະກອບ

    ອົງການສະຫະປະຊາຊາດເພື່ອການພັດທະນາ (ສປຊ)ປະຈຳລາວ ລາຍງານ ໃຫ້ຮູ້ວ່າ: ສປປ ລາວ, ເປັນໜຶ່ງໃນປະເທດ ອາຊີຕາເວັນອອກສ່ຽງໃຕ້ທີ່ມີປະ ຊາກອນໄວໜຸ່ມຈຳນວນຫລາຍ, ສະເລ່ຍອາຍຸຕ່ຳກວ່າ 24 ປີກວມປະມານ 60% ຂອງ ປະຊາກອນທັງໝົດ, ເຊິ່ງນັບວ່າຈະໄດ້ຮັບຜົນປະໂຫຍດຈາກປະຊາ ກອນ ຫລວງຫລາຍຖ້າຫາກເພີ່ມ ການລົງທຶນໃສ່ການພັດ ທະນາຊັບພະຍາກອນມະນຸດ ໂດຍສະເພາະຂົງເຂດສຶກສາ, ສຸຂະພາບ ແລະ ການສ້າງວຽກເຮັດງານທຳ.

     ຫລາຍປີຜ່ານມາ, ເສດຖະກິດຂອງລາວໄດ້ຂະຫຍາຍໂຕໄວ, ຊຶ່ງນຳມາທັງໂອກາດ ແລະ ສິ່ງທ້າທາຍໃຫ້ແກ່ປະຊາກອນ, ໂດຍສະເພາະແມ່ນໄວໜຸ່ມ, ເນື່ອງຈາກວ່າພວກເຂົາຍັງຈະຕ້ອງປະເຊີນໜ້າກັບສິ່ງທ້າທາຍ ແລະ ຄວາມສ່ຽງຫລາຍຢ່າງ ເປັນ ຕົ້ນ: ມີຄວາມຈຳກັດການເຂົ້າເຖິງຂໍ້ມູນຂ່າວສານ ແລະ ການບໍລິການສຸຂະພາບຈະເລີນພັນ, ບົດບາດຍິງ-ຊາຍ, ຊົນເຜົ່າ, ຖາ ນະທາງເສດຖະກິດ, ການສຶກສາ ແລະ ອື່ນໆ.

    ອົງການ ສປຊ ໃຫ້ຮູ້ວ່າ: ສິດທາງດ້ານສຸຂະພາບທາງເພດ ແລະ ສຸຂະພາບຈະເລີນພັນ ແມ່ນມີຄວາມສຳຄັນຕໍ່ການປ່ຽນ ແປງການຈະເລີນເຕີບໂຕຈາກໄວໜຸ່ມກາຍເປັນຜູ້ໃຫຍ່, ສະນັ້ນທຸກໆທາງເລືອກ ແລະການຕັດສິນໃຈຂອງໄວໜຸ່ມແມ່ນມີ ສ່ວນສຳຄັນໃນໂອກາດທາງການສຶກສາ, ການມີວຽກເຮັດງານທຳ ແລະ ມີສ່ວນຮ່ວມໃນທາງການເມືອງ. ເພື່ອຮັບປະກັນ ໃຫ້ໄວໜຸ່ມສາມາດນຳໃຊ້ທ່າແຮງຂອງພວກເຂົາຢ່າງເຕັມສ່ວນເຂົ້າໃນການພັດທະນາສ້າງສາປະເທດຊາດໃນອານາຄົດ.