ລະດົມແນວຄິດໃສ່ຮ່າງກົດໝາຍເຂດເສດຖະກິດພິເສດ

    ຄະນະກຳມະການແຫ່ງຊາດເພື່ອຄຸ້ມຄອງເຂດເສດຖະກິດພິເສດ ແລະ ສະເພາະ (ຄຂສພ), ໄດ້ຮ່ວມກັນຫາລືເພື່ອ ລະດົມແນວຄິດໃສ່ຮ່າງກົດໝາຍວ່າດ້ວຍເຂດ ເສດຖະກິດພິເສດ ແລະ ສະເພາະໃຫ້ມີຄວາມຮັດກຸມ ແລະ ສອດຄ່ອງ, ເນື່ອງຈາກ ວ່າປັດຈຸບັນເຂດດັ່ງກ່າວພວມມີການຂະຫຍາຍຕົວໄວ ແລະ ການລົງທຶນນັບມື້ເພີ່ມ ຂຶ້ນ, ຈຶ່ງເຫັນວ່າມີຄວາມ ຈຳເປັນຍົກລະດັບການຄຸ້ມຄອງດ້ວຍດຳລັດຂຶ້ນເປັນ ກົດໝາຍ.

    ການຫາລືຄັ້ງນີ້ຕົ້ນຕໍແມ່ນການສ້າງຄວາມເຂັ້ມແຂງດ້ານນິຕິກຳ ແລະ ຄວາມເຊື່ອໝັ້ນໃຫ້ແກ່ຜູ້ພັດທະນາ, ສິ່ງສຳຄັນແມ່ນ ຮັບປະກັນນະໂຍບາຍສົ່ງເສີມການລົງທຶນຈາກພາຍໃນ ແລະ ສາກົນໃຫ້ມີປະສິດທິຜົນສູງຂຶ້ນກວ່າເກົ່າ, ປັດຈຸບັນການພັດ ທະນາເຂດເສດຖະກິດພິເສດ ແລະ ສະເພາະຢູ່ລາວ ແມ່ນນັບມື້ມີບາດກ້າວຂະຫຍາຍຕົວ, ໂດຍມີບໍລິສັດມາຈົດທະບຽນ ແລະ ລົງທຶນແລ້ວ 198 ຫົວໜ່ວຍ ແລະ 217 ຫ້າງຮ້ານ, ມີມູນຄ່າການລົງທຶນຕາມສັນຍາຫລາຍກວ່າ 6 ຕື້ໂດລາສະຫະລັດ ແລະ ມີການລົງທຶນຕົວຈິງແລ້ວຫລາຍກວ່າ 1 ຕື້ໂດລາສະຫະລັດ, ອັນໄດ້ປະກອບສ່ວນສຳຄັນເຂົ້າໃນການພັດທະນາເສດ

ຖະກິດ-ສັງຄົມຂອງຊາດ, ເວົ້າສະເພາະແມ່ນການສ້າງຕົວເມືອງນ້ອຍໃນຊົນນະບົດ, ສ້າງເຂດນິຄົມໃຫ້ປາກົດຜົນເປັນຈິງ, ສ້າງວຽກເຮັດງານທຳໃຫ້ປະຊາຊົນໄດ້ຫລາຍກວ່າ 10 ພັນຕຳແໜ່ງງານ ແລະ ການພັດທະນາພື້ນຖານໂຄງລ່າງອື່ນໆ. ສະນັ້ນ, ເພື່ອຮອງຮັບໃຫ້ແກ່ການດຶງດູດ ແລະ ສົ່ງເສີມການລົງທຶນ ໂດຍສະເພາະໃຫ້ ຂພສ ກາຍເປັນຈຸດເຊື່ອມໂຍງທາງດ້ານເສດ ຖະກິດກັບບັນດາປະເທດໃນພາກພື້ນກໍຄືການເຂົ້າຮ່ວມປະຊາຄົມເສດຖະກິດອາຊຽນ(AEC) ໃນທ້າຍປີ 2015 ນີ້, ຈຶ່ງ ຕ້ອງເຮັດໃຫ້ຮ່າງກົດໝາຍດັ່ງກ່າວມີຄວາມຊັດເຈນ ແລະ ຮັດກຸມດີ.

    ກອງປະຊຸມຫາລືດັ່ງກ່າວມີຂຶ້ນໃນວັນທີ 17 ມີນານີ້, ຢູ່ສູນປະຊຸມແຫ່ງຊາດ, ນະຄອນຫລວງວຽງຈັນ, ໂດຍການເປັນ ປະທານຂອງທ່ານນາງ ບົວທາ ຂັດທິຍະ ລັດຖະມົນຕີຊ່ວຍ, ຫົວໜ້າກອງເລຂາຄະນະກຳມະການແຫ່ງຊາດເພື່ອຄຸ້ມຄອງເຂດ ເສດຖະກິດພິເສດ ແລະ ສະເພາະ, ມີບັນດາລັດຖະມົນຕີ, ເຈົ້າແຂວງ ແລະ ພະນັກງານກ່ຽວຂ້ອງເຂົ້າຮ່ວມເປັນຈຳນວນ ຫລາຍ.